Ҡырҡыуға ҡарағанда күберәк ултыртабыҙ

2024 йылда Башҡортостанда 16 мең гектарҙан ашыу майҙанда урмандарҙы тергеҙеү эштәре башҡарылған. Был ҡырҡылған урмандар майҙанынан 18 процентҡа күберәк. Был хаҡта Радий Хәбиров рәйеслегендә үткән аҙналыҡ оператив кәңәшмәлә республиканың урман хужалығы министры вазифаһын башҡарыусы Алла Аникина белдерҙе. Башҡортостан ултыртылған урмандар майҙаны буйынса Волга буйы федераль округында лидер булып тора. Был эштә барлыҡ халыҡ әүҙем ҡатнаша. 2024 йылда республика “Хәтер баҡсаһы” халыҡ-ара акцияһы сиктәрендә ултыртылған ағастар һаны буйынса Рәсәйҙә өсөнсө урынды алды. Ә “Урманды һаҡлайыҡ” көҙгө акция йомғаҡтары буйынса Башҡортостан илдең урмандарҙы тергеҙеү буйынса иң яҡшы 10 төбәге иҫәбенә инде. Урмансыларҙы үҫентеләр менән тәьмин итеү өсөн 2024 йылда республикала дүрт тонна самаһы орлоҡ әҙерләнгән, шул иҫәптән 320 килограмы - яҡшыртылған орлоҡтар. Йыл һайын республикала 50 миллионға яҡын ҡиммәтле үҫенте үҫтерелә. Был республика урман ҡулланыусыларының ихтыяжын тулыһынса ҡаплай һәм үҫентеләрҙе күрше төбәктәргә һатыуҙы ойошторорға мөмкинлек бирә. Урман хужалығы бурыстарының береһе – ағас эшкәртеү предприятиеларын сеймал менән тәьмин итеү. 2024 йылда республикала өлгөргән һәм оҙаҡ ултыртылған ағастар буйынса иҫәпләнгән диләнкә күләме 10,6 миллион кубометр кимәлендә билдәләнгән. Ағас әҙерләү өсөн йыл һайын 3,8 миллион кубометр ағас әҙерләү күләме менән бөтәһе 1,48 миллион гектар майҙанда 234 урман участкаһы ҡуртымға бирелгән. 2018 йылдан Башҡортостан биләмәһендә урман үҫентеләрен законһыҙ ҡырҡыуға ҡаршы көрәш сиктәрендә урмандарҙы файҙаланыуға дистанцион йыһан мониторингы уҙғарыла. 2024 йылда мониторинг 5,3 миллион гектар урман фондын үҙ эсенә алған. Шунлыҡтан 1,1 мең кубометр күләмендә законһыҙ ҡырҡыуҙар асыҡланған. Урмансыларҙың берҙәм эшләүе арҡаһында былтыр урман янғындары майҙанын – 97 тапҡырға, ә янғындар һанын 10 тапҡырға ҡыҫҡартыуға өлгәшелде. Теркәлгән бөтә янғындар тәүге тәүлектә үк һүндерелде. Быға матди-техник базаны системалы яңыртыу ҙа булышлыҡ итә. 2024 йылда Башҡортостан урман хужалығын алып барыуға федераль бюджеттан 1,1 миллиард һум йәлеп иткән. Алынған средстволар суммаһы буйынса республика Волга буйы федераль округында беренсе урынды биләй. Урмансылар махсус хәрби операцияла ҡатнашыусыларға һәм уларҙың ғаиләләренә ярҙам итеүгә айырыуса ҙур иғтибар бүлә, тип билдәләне Алла Аникина. Мәҫәлән, 7 933 ғаилә 89 990 кубометр утын алған. Ағасты һаҡлау ҡоролмаларын урынлаштырыу өсөн хәрби хәрәкәттәр райондарына ла йүнәлтәләр. 2025 йылда “Экологик именлек” яңы милли проектының “Урмандарҙы һаҡлау” яңыртылған федераль проекты сиктәрендә урмандарҙы тергеҙеү эшен дауам итәсәктәр. Башҡортостан Башлығы ентекле әҙерлекте ойошторорға һәм яҙғыһын Бөйөк Ватан һуғышында Еңеүҙең 80 йыллығы уңайынан “Хәтер баҡсаһы” халыҡ-ара акцияһын үткәрергә ҡушты. - Үҙ ваҡытында урмандарҙың ситкә китеү һаны урмандарҙы тергеҙеү сиктәрендә плюс менән ҡапланырға тейеш, тип килештек. Һуңғы йылдарҙа был эште яйға һалдыҡ. Бының өсөн ҙур рәхмәт, - тине Радий Хәбиров. Фото: Башҡортостан Башлығы сайты.