Башҡортостан тәүге 10 төбәк иҫәбенә инде

Мәскәүҙә ТАСС матбуғат үҙәгендә 2024-2025 йылдарҙағы "Халҡыңа хеҙмәт итеү" муниципаль премияһының ғариза кампанияһына йомғаҡ яһалды. Бөтәһе 41 313 ғариза килгән, был былтыр бирелгән ғаризалар һанынан ике тапҡырға күберәк (18 891 ғариза). Премияның ғариза кампанияһында бөтә федераль округтар ҡатнаша. Ғаризалар һаны буйынса беренсе урында – Үҙәк федераль округ (9 617), икенсе урында – Волга буйы федераль округы (8 688) һәм топ-3 исемлеген Себер федераль округы (4 895) яба. Башҡортостандан конкурсҡа бөтә 63 муниципалитеттан 890 ғариза килгән - был Волга буйы федераль округында - 2-се, Рәсәйҙә 6-сы урын. Былтыр еңеүселәр иҫәбенә Салауат районының Миәшәгәр ауыл биләмәһе башлығы Илнара Сафина ингәйне. Награданы уға шәхсән Рәсәй Президенты тапшырҙы. Рәсәй Президентының эске сәйәсәт буйынса идаралығы начальнигы урынбаҫары Евгений Грачев билдәләүенсә, премияла 10 номинация әҙерләнгән: уларҙың бер өлөшө былтыр тәҡдим ителгән, бер өлөшө тәүге тапҡыр индерелгән. Бөтә Рәсәй урындағы үҙидараны үҫтереү ассоциацияһы рәйестәше Ирина Гусева, быйыл бик ҙур күләмгә өлгәшелде, тип белдерҙе. Премияға ғаризалар илдең 15 мең муниципалитетынан килде. Был дөйөм һандың 78 проценты. «Башҡортостан Республикаһының муниципаль берәмектәр советы» ассоциацияһының башҡарма директоры Марат Ғәлиуллин билдәләүенсә, «Халҡыңа хеҙмәт итеү» Бөтә Рәсәй премияһы Владимир Путин ҡушыуы буйынса үткәрелә һәм муниципалитеттар үҫешенә һәм кешеләрҙең йәшәү сифатын яҡшыртыуға ҙур өлөш индергән өсөн 10 номинация буйынса муниципаль берләшмәнең күренекле вәкилдәренә бирелә. - Ғаризалар ҡабул итеү этабы тамамланды. Беҙҙең муниципалитеттар бик яҡшы эшләне! Апрелдә Мәскәүҙән яҡшы хәбәрҙәр һәм наградалар көтәбеҙ, - тип өҫтәне Марат Ғәлиуллин. 2025 йылдың 10 февралендә конкурсанттарҙан ғаризаларҙы беренсел анализлау тамамлана, 3 мартта ғаризаларҙы премияның эксперт советы баһалай, уға йәмғиәттең төрлө өлкәләренән 300-ҙән ашыу эксперт инә. 31 мартта Дәүләт хеҙмәте сайтында Премия ҡатнашыусылары өсөн тауыш биреү башлана. 2025 йылдың апрелендә Мәскәүҙә «Рәсәй» Милли үҙәгендә II «Халҡыңа хеҙмәт итеү» Бөтә Рәсәй муниципаль премияһын тапшырыу тантанаһы үтәсәк. ФОТО: ВАРМСУ.