Игътибар! Җылы температура шартларында боз куркыныч, сак булыгыз

- Хәзерге вакытта республиканың су объектларында вәзгыять гаять катлаулы һәм киеренке. Бу Татарстанда бер атна инде плюс температуралар саклануга, яңгыр явуга бәйле. Боз тискәре йогынтыга дучар була, анда яңгыр суы җыела, ә астан су агымнары көчәя, ул язгы процесслардан бөтенләй аерылмый диярлек. Бу процесслар тәэсирендә безнең сулыкларның боз катламы бик куркыныч. Аның калынлыгы, төзелеше һәм, димәк, ныклыгы бозыла.

Мондый шартларда бозга чыгу балыкчылар өчен аеруча куркыныч. Бозда булган кар суы аның астында гомумән боз булу-булмавы турындагы мәгълүматны кешеләргә күрергә комачаулый.

Бозга җәяүле генә чыгарга кирәк.

Бозның хәрәкәтләнүе дә ихтимал. Ягъни, ул ярдан аерылырга мөмкин, һәм кешенең туп-туры яр буенда суга эләгү куркынычы бар, өстәвенә, бозда ярыклар да була.

Хәзер таныш һәм куркынычсыз урыннарда балык тоту яхшырак. Балыкка ялгыз гына чыгарга ярамый, шулай ук бозның ныклыгын тикшерегез.

Әмма иң яхшысы мондый һава торышында бозга чыгудан тотрыклы салкыннар кайтканчы тыелырга кирәк. Шулай ук карда йөрүче техниканы да кулланырга ярамый. Бу бик куркыныч, бәлагә очрарга мөмкин.

Бозлыкларда чаңгыда һәм җәяү йөрергә кирәкми. Чаңгыда шуу, су объектларында кешеләрнең тормышын саклау кагыйдәләре нигезендә, гомумән регламентка кертелмәгән. Боз буенча җәяү йөрү генә мөмкин. Әгәр кеше чаңгыда бозга чыга икән, чаңгылар аны суга сөйрәп алып китмәсен һәм суга батуга китермәсен өчен, ул беркетүләрне чишәргә тиеш.

Тагын бер кат кисәтәм, бозга чыгу куркыныч. Татарстан Республикасында су объектларында кешеләрнең гомерен саклау кагыйдәләренең 8.4 пункты нигезендә - 7 см калынлыктагы яшелсу төстәге боз йөрү өчен куркынычсыз санала.7 смдан кимрәк калынлыктагы бозга чыккан очракта граждан ТР Коап 3.10 маддәсенең 2 өлеше буенча административ җаваплылыкка тартылачак. Һәр муниципаль берәмлектә мобиль патруль төркемнәре оештырылган, алар әлеге маддә буенча административ җаваплылыкка тартырга вәкаләтле. Татарстанда елгаларда бозлавык чорыннан алып 25 граждан административ җаваплылыкка тартылган.

Бозның калынлыгы төрле шартларга бәйле. Хәзер елгаларның югары агымында ерганаклар күзәтелә, бигрәк тә агымның текә борылышларында. Күлләр, буаларда боз калынлыгы 20 см дан 25 см га кадәр. Ул елга култыкларында да шундый ук калынлыкта, ләкин, кабатлап әйтәм, инде үзенең ныклыгын һәм структурасын югалта. Фарватерда да боз куркыныч, ерганаклар һәм ачык су участоклары бар, - дип билгеләде Юрий Венедиктов.