Роберт Юлдашевтың тәүге фестивале була!

Был хәбәр туған мәҙәниәтен үҙ иткән, уның сәнғәтенә, көйҙәренә ғашиҡ кешеләр өсөн үтә лә һөйөнөслө булыр. Баш ҡалабыҙ Өфөлә беренсе тапҡыр милли көй һәм бейеүҙәребеҙ фестивале уҙғарыла. Ойоштороусыһы – танылған ҡурайсы, Башҡортостандың халыҡ артисы, Ш. Бабич исемендәге дәүләт йәштәр премияһы лауреаты, Салауат Юлаев ордены кавалеры, күп халыҡ-ара конкурстар лауреаты Роберт Юлдашев. Өр-яңы ижади проект “Ел моңо” тип атала. Шул уңайҙан бөгөн “Башҡортостан” дәүләт телерадиокомпанияһының медиаүҙәгендә матбуғат конференцияһы ойошторолдо. Унда билдәле ҡурайсы үҙе, сараны ойоштороусы Регина Ағылова, “Ҡурайсы” төркөмө барабансыһы Рәфис Лоғаманов, төркөмдөң саунд-продюсеры Сыңғыҙ Юлдашевтар ҡатнашты. Роберт Нәжип улы менән командаһы матбуға конференцияһын алып барыусының, хәбәрселәрҙең һорауҙарына яуап бирҙе. Республиканың мәҙәни даирәһендә ҙур ваҡиға булырлыҡ был фестиваль 7–9 февралдә үтә. Өс көн буйы тамашасылар Роберт Юлдашев менән “Ҡурайсы” төркөмөнөң концертын, Бейеү һәм музыка, этно-музыка фестивалдәрен ҡарай ала. Роберт Нәжип улы халыҡтың боронғо музыка ҡоралдарына бик һаҡсыл һәм ихтирамлы ҡарашта, уларға айырым мәғәнә һалынғанына инанған ижадсы. – Байрамда боронғо музыка ҡоралдары яңғыраһа, тимәк, ул ныҡ шәп булды, тигән һүҙ! – тине ул был хаҡта. – Фестивалдең беренсе көнөнә музыкаға мөкиббән бирелгән, уйнағанда уның эсенә инеп ирерлек итеп башҡарған һәләтле музыканттарҙы саҡырҙыҡ, улар – тыңлаусы менән көй араһында үҙенә күрә бер тапшырыусы булып торған кимәлгә еткән ижадсылар”. Фестивалдең икенсе көнө бейеүгә арнала. – Үҙ ваҡытында атаҡлы бейеү ансамлебеҙҙә практика үтергә насип булғайны. Шул саҡтарҙан алып бейеүҙе ныҡ яраттым. Беҙҙең был сәнғәт төрө тураһында бер заман Японияла гастролдә булғанда бер кеше: “Бейеүҙәрегеҙ ниндәй һоҡланғыс!.. Унда ер менән күк тоташа”, – тип сағыштырыуы менән ғәжәпләндергәйне, – тип уртаҡлашты күренекле ҡурайсы. Әйкәндәй, бейеүҙәр “тере” музыкаға, милли уйын ҡоралдары оҙатыуында башҡарылырға тейеш. Р. Юлдашев һүҙҙәренсә, был көн музыка менән хореографиянан торған сағыу, ҡабатланмаҫ үҙесәлекле шоу итеп күҙаллана. Өсөнсө көн милли көйҙәрҙе, фольклорҙы һәм замансалыҡы бергә туплаған сығыштар – фестивалгә исем биргән “Ел көйҙәре” программаһы. Р.Юлдашев уның тарихын һөйләп үтте: ул 2013 йылда ижад ителгән һәм шунан бирле этник сәнғәтте үҙ итеүселәрҙең күңелендә йәшәй. Бында музыкаль сығыштар бейеү менән аралашып бара, йәғни программа бик хәрәкәтсән, дәртле. Тамашасы “Ете ҡыҙ”ҙы, “Бөрйән ҡыҙҙары бейеүе”н, “Хан ҡыҙы”н ҡарай ала. Ойоштороуылар әйтеүенсә, фестивалдә профессионалдар ғына түгел, ә бар булмышы менән музыканы яратҡан ҡатнашыусылар ҙа биҙәй, улар республикабыҙҙың төрлө тарафтарынан йыйыла. Фестиваль бер уҙғарыу менән генә тамамланмай, киләсәктә уны дауам итергә, хатта йәй көнө асыҡ һауала үткәреү ниәте лә бар. Роберт Нәжип улы һәм ул етәкселек иткән “Ҡурайсы” төркөмөнөң был йәһәттән ғәжәйеп ҙур ниәттәре бар. Уларға тормошҡа ашырға насип итһен! Бына шулай, дуҫтар. Әгәр ҙә уникаль проектты башлап күрергә теләһәгеҙ, баш ҡалабыҙҙың “Башҡортостан” дәүләт концерт залында үтәсәк беренсе Моң һәм бейеү фестиваленә килегеҙ! Рәүилә Ғатауллина. Фотолар: https://vk.com/albums-2392551