16 сѣчніа од стартоваго стола во Флоридѣ почѧше своі първы изпытны полет ракета New Glenn, что іе достала имѧ в почесті Джона Гленна – първаго американскаго космонавта, бывшаго в колобѣжному (орбиталному) полету. New Glenn іе ракетоі компаніи Blue Origin, коіеіѫ влада Джеф Безос (Amazon).
Супротив худаго повѣтріа, ракета имаше успѣх на возлету и послаше на колобѣг (орбиту) Земли вторы стѫпені, что іе было цѣліу мисіи, але първы стѫпені быше утрачен в час сниженіа. Blue Origin хоче повторити успѣх SpaceX – опускати първы стѫпені на водну платформу, абы послѣ снова и опѧт пускати іу в космос. Не іе дивным, же първы крат не іе был успѣшным – колико крат іе трѣбал Илон Маск абы наконец успѣшно опустити ракету на хвосту огніа!
Овы пуск ракеты New Glenn спеціалисты мыслѧт както веліми важным, бо днесі SpaceX іе достал серіознаго конкурента, а конкуренціа приводи к сниженіу цѣны пуска и воздвиженіа бремени на колобѣг. До днешнаго пуска Blue Origin іе была познана само както организатор космичнаго туризма, корыстаіѫчи малку суборбиталну ракету New Shepard для своіых смѣлых клиентов, ктора іе не дості мочна абы воздвигнути бремѧ на колобѣг.
New Glenn же има вышину близко 100 метров и може воздвигнути около 45 тон бремени на колобѣг (Falcon у SpaceX има способності воздвигати само 22 тоны). Але настѫпна ракета Маска Starship има надѣіу, же бѫди мочна послати аж до 300 тон всіакы крат – то и іе конкуренціа. Безос такоже има веліки планы: он хоче сбудовати своіу посебну колобѣжну станціу Orbital Reef, ктора бѫде замѣноі МКС. В далных планах или мѣчтах Безос хте премѣстити промысл (индустріу) внѣ Земли в космос, претворѧіѫчи планету в іедины велікы парк.
Blue Origin сѧ мысли както компаніа, ктора сѧ труди медло и усилно, іеднак не приіима компромисов. Компаніа‐та има талисман, ктор досылаіе к баснѣ «Жолва и Заіѧц» с мораліу: «Поспѣх ‐ ліудіам на смѣх». Безос казаше в 2016 году: «Мыслиме, же медло значи гладко, а гладко значи скоро», ставѧчи сѧ антиподом SpaceX с іеіным способом проб и хыбок дліа скораго добытіа небес. Бѫдеме чакати, каков способ хте сѧ іави наі‐ефективным.
Доднесі Маск и Безос всіакы крат жартоваху о компаніи суперника, але нынѣ Маск просто написаше в X: «Добраго пѫти!».
