Был креатив бизнес вәкилдәре өсөн “ҡайнау нөктәһе” буласаҡ

2025 йылдан Башҡортостанда “Минең бизнесым” үҙәге базаһында ике яңы бүлексә эшләй башланы: “Минең креатив бизнесым” үҙәге һәм Мәғариф программалары һәм консалтинг дирекцияһы. Социаль өлкә инновациялары үҙәге (ЦИСС) эшләүен дауам итә. – Яңы структур подразделениелар “Минең бизнесым” үҙәге структураһының айырылғыһыҙ өлөшө буласаҡ һәм уларҙың эшмәкәрлеге “Һөҙөмтәле һәм конкурентлы иҡтисад” милли проекты (национальный проект “Эффективная и конкурентная экономика”) буйынса эшҡыуарҙарға ярҙам итеүгә йүнәлтеләсәк. Бизнес өсөн хеҙмәттәр спектрын киңәйтеү, стартаптарға һәм креатив индустрияларға ярҙам итеүгә йүнәлтелгән сифатлы белем биреүҙе тәьмин итеү планлаштырыла, – тип яңылыҡтар менән уртаҡлашты Башҡортостандың эшҡыуарлыҡ һәм туризм министры Зөһрә Гордиенко. “Минең креатив бизнесым” үҙәгенең һәм Мәғариф программалары һәм консалтинг дирекцияһының бурысы – ижади тармаҡтарҙың бәләкәй һәм урта предприятиеларына консультациялар биреү һәм эшҡыуарлыҡ компетенцияларын уңышлы башлауға һәм үҫтереүгә йүнәлтелгән уҡытыу программаларын, оҫталыҡ дәрестәрен, семинарҙар һәм тренингтар ойоштороу. Шулай уҡ тауарҙы сертификатлау, декларациялау, аттестациялау, патент тикшеренеүҙәре үткәреү, интеллектуаль эшмәкәрлек һөҙөмтәләренә хоҡуҡтарҙы яҡлау, тауар билдәһен теркәү һәм “Хәләл” стандарттары буйынса аттестация алыу буйынса хеҙмәттәр күрһәтеү дауам итәсәк. “Минең бизнесым” үҙәгенең ҙур коворкингтарының береһе креатив эшҡыуарҙарҙы йәлеп итеү урыны буласаҡ, ул Өфө ҡалаһы, Тыныслыҡ урамы, 14-се йорт адресы буйынса “Киләсәк фабрикаһы” инновацион эшҡыуарлыҡ йортонда урынлашҡан. Быйыл 600 квадрат метр майҙанда подкастар, фото һәм видеостудия яҙҙырыу өсөн зона булдырыласаҡ, шулай уҡ ижади эшҡыуарҙар өсөн саралар үткәреү планлаштырыла. – Был креатив бизнес вәкилдәре өсөн “ҡайнау нөктәһе” буласаҡ, унда улар үҙҙәренең тауарҙарын (хеҙмәттәрен) йәки шәхси брендын танытыу өсөн контент булдырыу хеҙмәттәренән файҙалана аласаҡ. Бынан тыш, коворкинг киңлеге фекерҙәштәр табырға һәм берлектәге ижади проекттар булдырырға мөмкинлек бирәсәк, – тип билдәләне “Минең креатив бизнесым” үҙәге етәксеһе Аделя Литягина. “Киләсәк фабрикаһы” коворкингы көн һайын 10:00 сәғәттән 22:00 сәғәткә тиклем, ял көндәрендә 10:00 сәғәттән 18:00 сәғәткә тиклем эшләй. Бәйләнеш телефоны: 8-919-61-61-939, “ҡыҙыу” линияның берҙәм номеры: +7 (347) 224-99-99 (доб.800). Белешмә: 2024 йылда Башҡортостанда Стратегик башланғыстар агентлығы (АСИ) күҙәтеүе аҫтында Креатив индустрияларҙы үҫтереү концепцияһы раҫланды. Был өлкә 17 йүнәлеште берләштерә, шул иҫәптән музыка, кино, анимация, видеоуйындар, дизайн, архитектура, мәҙәни мираҫ һәм гастрономия кеүек өлкәләрҙе лә үҙ эсенә ала. Фото сығанағы: pravitelstvorb.ru.