Мәскәүҙә Рәсәй Федерацияһы Хөкүмәтенең мәҙәниәт өлкәһендәге премияһын тапшырыу тантанаһы үтте. Лауреаттар араһында Башҡортостандың халыҡ шағиры, башҡорт әҙәбиәте классигы Мостай Кәримдең 100 йыллығына арнап төшөрөлгән “Мостай” документаль фильмын төшөрөүсе команда ла бар. Фильмдың продюсеры – М. Кәрим исемендәге фондты ойоштороусы, арҙаҡлы шәхесебеҙҙең ейәне Тимербулат Кәримов, фильмдың һәм уны төшөргән “Мастерская” кино компанияһының генераль продюсеры – Саида Медведева, ҡуйыусы режиссеры – Александр Смирнов. Документаль таҫмала Мостай Кәримдең уникаль биографияһы илебеҙ тормошондағы тарихи мәлдәр, мөһим ваҡиғалар һәм осрашыуҙар аша асыла. Уның премьераһы тәүҙә – Мәскәүҙә Бәләкәй театрҙа, ә Өфөлә әҙиптең 100 йыллығын билдәләгән көндә “Торатау” конгресс-холында күрһәтелде, “Рәсәй” телеканалы аша тапшырылды. “Мостай” документаль киноһында әҙиптең шиғырҙары, проза әҫәрҙәренән, көндәлектәренән өҙөктәр, замандаштарының хәтирәләре урын алған. Фильм өҫтөндә эш бер нисә йыл дауам итә һәм уны төшөрөүҙә Рәсәйҙең билдәле мәҙәниәт һәм сәнғәт эшмәкәрҙәре, актерҙар ҡатнаша. Владимир Спиваков, Никита Михалков, Иосиф Кобзон, билдәле шағир Андрей Дементьевтың исемдәрен генә атау ҙа етә. Был кино – документаль кадрҙар аша геройҙың йәнле портретын тыуҙырыуҙа юғары оҫталыҡ өлгөһө, шуға ла уның илебеҙ Хөкүмәте премияһына лайыҡ булыуы осраҡлы түгел. Мәғлүмәт, фото: М. Кәрим исемендәге фонд.