"Ишембайҙар менән ғорурланам"

Ошо көндәрҙә бар Башҡортостан өсөн ҡыуаныслы яңылыҡ билдәле булды. “Берҙәм Рәсәй”партияһының Генераль советы секретары Владимир Якушев Рәсәй Президенты Владимир Путинға Ишембай ҡалаһына “Хеҙмәт ҡаһарманлығы ҡалаһы” исемен биреү тураһында мөрәжәғәт итте. Был туралағы указға 15 ғинуарҙа ҡул ҡуйылды. Ишембай Рәсәйҙең был исем бирелгән башҡа ете ҡалаһы иҫәбенә инде. Улар – Ҡурған (Ҡурған өлкәһе), Үрге Пышма (Свердловск өлкәһе), Ишембай (Башҡортостан Республикаһы), Ковров (Владимир өлкәһе), Мейәс (Силәбе өлкәһе), Зеленодольск (Татарстан Республикаһы), Ленинск-Кузнецкий (Кемеров өлкәһе) һәм Салехард (Ямал-Ненец автономиялы округы). Президент, Ишембайҙа һуғыш йылдарында нефть күләменең 25 процентын, ә Ленинск-Кузнецк халҡы ул ваҡытта фронтҡа 20 миллион тоннанан ашыу күмер һәм 1,5 миллион һумдан ашыу аҡса биргән, тип билдәләне. Был яңылыҡты ишембайҙар үҙҙәре лә ҙур ҡыуаныс менән ҡабул итте. Ишембай Ҡала советы депутаты, махсус хәрби операция ветераны Ринат Күлтоманов беҙгә тәьҫораттары тураһында һөйләне. – Баш командующий – илебеҙ Президентына был ҡарары өсөн оло рәхмәтемде белдерәм. Ишембайға “Хеҙмәт ҡаһарманлығы ҡалаһы” исеме бирелеүе беҙҙең өсөн бик әһәмиәтле ваҡиға, был ҡалабыҙҙы формалаштырған тарихыбыҙҙы, хеҙмәт традицияларыбыҙҙы һәм ҡаҙаныштарыбыҙҙы айырып күрһәтә. Был исем лайыҡлы рәүештә бирелде, тип уйлайым, сөнки Бөйөк Ватан һуғышы йылдарында Ишембайҙы – “икенсе Баҡы” тип тә йөрөтәләр. Ул саҡта 4,5 миллион тонна нефть сығарыла һәм фронтҡа оҙатыла. Ишембай һәм барлыҡ ил мәнфәғәте өсөн артабан да тырышып хеҙмәт итергә этәргес көс бирә. Беҙ тарихыбыҙ һәм үҙ көсө, хеҙмәте менән ҡалабыҙҙы төҙөгән, үҫтергән һәм һаҡлаған кешеләребеҙ менән ғорурланабыҙ. Был маҡтаулы исем ғорурлыҡ ҡына түгел, яңы үрҙәргә әйҙәп тә торасаҡ, сөнки ауыр йылдарҙа илдең үҫешенә баһалап бөткөһөҙ өлөш индергән эшсән яҡташтарыбыҙҙы баһалап, беҙ үҙебеҙ ҙә үрнәк алырға һәм лайыҡлы алмаш булырға тигән маҡсат ҡуябыҙ. – Ишембай ҡалаһы һәм районы Бөйөк Ватан һуғышы йылдарында ҡаһарманлыҡ өлгөһө күрһәтә, ә бөгөн махсус хәрби операцияға ишембайҙар нисек ярҙам итә? – тип һорайбыҙ унан. – Илгә ярҙам кәрәк булғанда ишембайҙар бер ваҡытта ла ситтә тороп ҡалманы. Ишембай ул саҡта фронтҡа 10 меңдән ашыу һалдат һәм офицер бирә, шуларҙың өс меңгә яҡыны яу яландарында ятып ҡала. Шулай уҡ Ишембай ҡалаһы һуғыш барған ерҙәрҙән ике меңдән ашыу кешене ҡабул иткән. Ике мәктәптә хәрби госпиталдәр булған. Улар аша меңдәрсә һалдат һәм офицер үткән, уларҙың күбеһе йәнә сафҡа баҫҡан. Оборона ихтыяждары өсөн аҡса йыйыуҙа ла әүҙем ҡатнашалар. Ишембай предприятиелары күрһәткән хеҙмәттәре өсөн күсмә ҡыҙыл байраҡтар менән дә бүләкләнгән. 80 йыл элек кеүек үк, бөгөн дә ҡала халҡы көсөнән килгәнсә махсус хәрби операцияға ярҙам итә һәм бөтә Башҡортостан менән бергә патриот булыуын иҫбатлай. Ишембайҙар махсус хәрби операцияла Ватанды һаҡлаусы яугирҙәргә әүҙем ярҙам итә. Ябай кешеләр һәм эшҡыуарҙар, ойошмалар һәм предприятиелар хеҙмәткәрҙәре, студенттар һәм пенсионерҙар – уларҙың һәммәһе лә хәрбиҙәргә ярҙам итеү өсөн ваҡытын да, көсөн дә, сараһын да таба. Хакимиәт вәкилдәре даими рәүештә махсус хәрби операция зонаһына барып, яугирҙәр менән осраша, уларға посылкалар һәм кәрәкле техника алып бара. Әгәр ҙә тәүҙәрәк аҙыҡ-түлек, көнкүреш әйберҙәре алып барылһа, хәҙер ҡиммәтле махсуслаштырылған техника ташыйҙар. Квадрокоптерҙар бик кәрәк. Шулай уҡ алғы һыҙыҡҡа яугирҙәр өсөн кәрәкле радиоэлектрон комплекстар, спутник бәйләнеше өсөн комплекттар, 3D-принтерҙар алып барҙылар. Яугирҙәргә һәр ваҡыт маскировкалау селтәрҙәре лә кәрәк – уларҙы битараф булмаған ишембайҙар әҙерләй. Был эш бер мәлгә лә туҡтатылмай, бының өсөн ирекмәндәргә сикһеҙ рәхмәтлемен. Бөгөн дә беҙ граждандарыбыҙ асылында ҡаһарманлыҡ һәм батырлыҡ булыуын улар күрһәткән яҡшылыҡ, күңел йылылығы һәм берҙәмлек аша күрәбеҙ. Фото: геройҙың шәхси архивынан.