Башҡортостан Хөкүмәтендә кәңәшмә үтте

БР Премьер-министры Андрей Назаров етәкселегендә үткән Башҡортостан Республикаһы Хөкүмәте ултырышында 2024 йылда граждандарҙы авария хәлендәге торлаҡ фондынан күсереү буйынса сараларҙы тормошҡа ашырыу йомғаҡтары иғлан ителде. Былтыр граждандарҙы авария хәлендәге торлаҡ фондынан алдағы алты йылға (2024-2030 йылдарға) күсереү буйынса адреслы программа ҡабул ителде, тип билдәләне Премьер-министр. Программа 227 мең квадрат метр майҙанда 565 авария хәлендәге йортто үҙ эсенә ала. 15 мең самаһы граждан күсерелергә тейеш. - Программа алты этапта тормошҡа ашырыласаҡ. Беренсе этап сиктәрендә былтыр Өфөлә һәм Бөрөлә ете йорт күсерелгән. Был маҡсатҡа 134 миллион һумдан ашыу аҡса бүленгән, - тип билдәләне Андрей Назаров. Ултырышта шулай уҡ 2024 йылда торлаҡ-коммуналь хужалыҡ өлкәһен үҫтереү мәсьәләләре тикшерелде һәм 2025 йылдың I кварталына төп бурыстар билдәләнде. Башҡортостанда торлаҡ-коммуналь хужалыҡ һәм төҙөкләндереү өлкәһендәге программаларҙы тормошҡа ашырыуға ҙур иғтибар бүленә, тип билдәләне Андрей Назаров. Йыл һайын парктар яңыртыла һәм төҙөкләндерелә, ихаталар, күп фатирлы йорттар ремонтлана, коммуналь инфраструктура яңыртыла. «Торлаҡ һәм ҡала мөхите» милли проектының «Уңайлы ҡала мөхитен булдырыу» федераль проекты сиктәрендә 2024 йылда 1,2 миллиард һумлыҡ 123 йәмәғәт биләмәһе төҙөкләндерелгән. Бынан тыш, республика бәләкәй ҡалаларҙа һәм ауылдарҙа уңайлы ҡала мөхитен булдырыу буйынса Бөтә Рәсәй конкурсында әүҙем ҡатнаша. Былтыр Ағиҙел, Яңауыл, Дүртөйлө, Ишембай, Мәләүез ҡалаларында конкурста еңгән биш проектты ғәмәлгә ашырыу тамамланды, ә Баймаҡ ҡалаһында һәм Ишембай районының Верхотор ауылында беренсе этап эштәре тамамланды. 2025 йылда Бәләбәй, Благовещен, Нефтекама, Салауат, Учалы ҡалаларында тағы биш проект тормошҡа ашырыла башлаясаҡ. Средстволар күләме 1,3 миллиард һумдан ашыу тәшкил итәсәк. Башҡортостанда йорт яны биләмәләрен комплекслы төҙөкләндереү буйынса «Башҡорт ихаталары» программаһын тормошҡа ашырыу дауам итә. 2024 йылда 33 муниципаль берәмектә 143 ихата биләмәһе төҙөкләндерелгән, был 213 күп фатирлы йорт тигәнде аңлата. Программаны тормошҡа ашырыуға 2025 йылда бер миллиард һумдан ашыу аҡса ҡаралған, 98 ихата яңыртыласаҡ. «Торлаҡ һәм ҡала мөхите» милли проектының «Таҙа һыу» федераль проектын тормошҡа ашыра башлағандан алып (2019-2024 йй.) үҙәкләштерелгән һыу менән тәьмин итеү системаларынан сифатлы эсәр һыу менән тәьмин ителгән республика халҡының өлөшө 3,3 процентҡа артҡан һәм 90,9 процент тәшкил иткән. Төбәктә 25 эсәр һыу менән тәьмин итеү объекты төҙөлгән һәм файҙаланыуға тапшырылған. Үҙәкләштерелгән һыу менән тәьмин итеү системаларынан эсәр һыу сифаты 174 меңдән ашыу кеше өсөн яҡшырған. Был программа буйынса йәлеп ителгән федераль средстволар күләме буйынса республика Волга буйы федераль округында - 1-се, Рәсәй Федерацияһында 8-се урынды алды. Сығанаҡ: https://pravitelstvorb.ru/news/