Гервяты гэта тое месца, якое, мабыць, ведае кожны, хто хоць раз вандраваў па Беларусі. Гэта месца абавязкова ёсць на кожным буклеце ці постэры пра турыстычную Беларусь, а колькі здымкаў з Гервятаў ёсць у інстаграме і іншых сацыяльных сетках. Спадзяюся, кожны з вас хаця б аднойчы, але чуў параўнанне Касцёла Найсвяцейшай Тройцы ў Гервятах з Швейцарыяй ці іншай еўрапейскай краінай. А ўсё таму што гэта сапраўды вельмі чароўнае і прыгожае месца якое знаходзіцца ў звычайнай беларускай вёсцы і гэта, калі бачыш яго ў першы раз, вызывае нейкі дысананс ўспрымання, калі ты едзеш сярод звычайнай вёскі з драўлянымі і цэглавымі хатамі, хіба перад табой можа праехаць стары калгасны трактар і вось нечаканна перад табой адчыняецца як іншы свет: шыкоўны парк са статуямі і вялікі будынак Касцёла ў неагатычным стылі. Гэта сапраўды выглядае як цуд.
Але вернемся да гісторыі гэтага месца. Гервяты хаця і невялікія, але гэта мястэчка з назвай якая пайшла ад саміх літоўскіх князёў (тут трэба адрозніваць гістарычных літоўцаў / літвінаў і сучасных і пра назву будзе самастойны допіс) і з багатай гісторыяй.
Першы драўляны Касцёл тут быў пабудаваны яшчэ ў 1526 годзе. Нажаль не засталося звестак як ён выглядаў, вядома толькі, што над Касцёлам была званіца. А прыблізна ў 1735 годзе Касцёл перабудавалі: зрабілі дзве вежы, і пабудавалі чатыры алтара , адзін з якіх меў вобраз Найсвяцейшай Тройцы.
А ўжо напрыканцы XIX ст., дакладней у 1899 пры ксёндзе Ўладзіславе Альшэўскам пачалося будаўніцтва новага цэглавага Касцёла. Архітэктарам быў Аляксей Полазаў. Цікава, але спачатку будынак павінен быў быць меньш у вышыню, але дзеля просьбы мясцовых жыхароў праэкт перарабілі і будынак стаў 61 метр у вышыню.
Частка матэрыялаў была мясцовай, напрыклад, цэглу рабілі з гліны здабытай на рацэ Лошы ў саміх Гервятах. Гэта месца мясцовые жыхары яшчэ доўгі час называлі "цагельняй". У мясцовых жыхароў сабіралі таксама яйкі, якія выкарыстоўвалі ў растворы для будаўніцтва. А вось чарапіца для даха была прывезена ажно з Германіі.
Далей на працягу ўсёй гісторыі гэта месца суправаджал сапраўдны цуд. Ён застаўся некранутым у першую і другую сусветную вайну. Ён таксама працягваў сваю працу і несці слова Пана і падчас савецкай улады, калі было зачынена і перабудована пад склады, клубы і крамы вельмі многа розных рэлігіёзных будынкаў у Беларусі. Нават, калі ксёндза Станіслава Хадыка саслалі ў Сібыр людзі прыходзілі ў Касцёл і ён працягваў працаваць.
Але не толькі будынак Касцёла падабаецца шматлікім турыстам і вернікам пры наведванні Гервят. Вялікае ўражанне застаецца і ад тэрыторыі вакол Касцёла. Гэта тэрыторыя - вялікая праца ксёндза Леаніда Нясцюка. Раней вакол будынка расло шмат вялікіх дрэваў, але яны былі ўжо вельмі старыя дрэвы і таму было вырашана іх спілаваць. На іх месцы быў зроблены сапраўдны дэндрапарк у якім расце каля 500 відаў розных дрэваў і кустоў. Ксёндз Нясцюк прывозіў з кожнага падарожжа па два віда кожнай расліны, бо лічыў, што хаця адна ды прыжывецца. Сярод раслін можна ўбачыць чатыры цудоўных драўляных крыжа. Гэта традыцыя прыйшла ў Гервяты з сучаснай Літвы, дзе побач з Касцёлам ставяць крыж у гонар нейкай падзеі. Такім чынам у Гервятах былі ўсталяваны крыжы ў гонар: адзін у гонар 100 гадоў Касцёлу, другі ў гоанр стварэнню літоўскай дыяспары (у самім Касцёле нават ёсць імша на літоўскай мове), і трэцці ў гонар стварэння Літоўскага цэнтра культуры, адукацыі і інфармацыі ў Рымдзюнах. Нажаль пра чацтвёрты крыж інфармацыі няма. Але можа хто з чытачоў падкажа ў каментарыях?
Яшчэ кожны з вас бачыў парк скульптур побач з Касцёлам. Іх таксама ўсталявалі пры ксёндзе Леанідзе Нясцюке. Фігур усяго 12 і, як вы ўжо здагадаліся, гэта 12 Апосталаў. А ў цэнтры гэтай кампазіцыі знаходзіцца стэла Арханёла Міхаіла. Усе статуі знаходзяцца на невялікай плошчы між прыгожых кветак і сцяжынак з лаўкамі для адпачынку. Шаноўнае спадарства вельмі спадзяюся, што Вам падабаўся гэты допіс. І яшчэ раю вам, калі вы яшчэ не былі ў Гервятах абавязкова туды трапіць нягледзячы на частку года. Там заўсёды прыгожа і ўвесну і ўлетку і ўвосень і таксама ўзіму.
Дзякуй Вам, што даглядзелі і дачыталі гэты допіс. Калі Вам падабаўся допіс, калі ласка, падпісывайцеся на мой канал, будзе яшчэ шмат чаго цікавага і таксама не забывайцеся паставіць лайк да гэтага допіса.