20 і 21 лістапада прайшла VI Міжнародная навуковая канферэнцыя «Сімяон Полацкі: светапогляд, грамадска-палітычная і літаратурная дзейнасць», якая была прысвечана 395-годдзю з дня нараджэння асветніка і 30-годдзю Музея-бібліятэкі Сімяона Полацкага. Канферэнцыя традыцыйна праводзіцца кожныя 5 год і збірае навукоўцаў, што займаюцца даследаваннямі жыцця і творчасці Сімяона Полацкага ў кантэксце эпохі, аналізам уплыву яго дзейнасці на сучасную культуру; праблемамі этнаканфесійнага і сацыякультурнага развіцця Беларускага Падзвіння ў ХVI—ХVIII стст. У 2019 г. у праблемнае поле канферэнцыі былі ўключаны пытанні захавання, прэзентацыі і інтэрпрэтацыі помнікаў кніжнай культуры Беларусі ў музеях, бібліятэках і прыватных зборах. За мінулыя 25 год амаль 90 удзельнікаў з розных краін свету прадставілі вынікі даследаванняў па шырокаму колу пытанняў гісторыі, археалогіі, мовазнаўства, літаратуразнаўства, культуралогіі, этналогіі, філасофіі, музеязнаўства, кнігазнаўства, педагогікі і мастацтвазнаўства.
У мерапрыемстве прынялі ўдзел вучоныя Інстытута гісторыі НАН Беларусі:
- Калечыц Іна Леанідаўна, вядучы навуковы супрацоўнік Цэнтра гісторыі навукі і архіўнай справы. Тэма даклада: “Графіці XVI—XVIII стст. полацкай Спаса-Праабражэнскай царквы”
- Дзярновіч Алег Іванавіч, вядучы навуковы супрацоўнік аддзела гісторыі Беларусі IX—XVIII стагоддзяў і археаграфіі. Тэма даклада: “Лёс рукапісу паэмы Мацея Стрыйкоўскага «Бітва пад Улай»: да гісторыі перамешчаных збораў”
- Палтаржыцкая Надзея Мікалаеўна, старшы навуковы супрацоўнік аддзела гісторыі Беларусі IX—XVIII стагоддзяў і археаграфіі. Тэма даклада: “Звесткі па гісторыі медыцыны ў менскіх магістрацкіх кнігах за другую палову XVII ст.”
Удзельнікам канферэнцыі была прадстаўлена выстава «Но буди правый писаний читатель, не слов ловитель, но ума искатель», якая прысвечана 25-годдзю канферэнцыі. Менавіта 25 год назад, у 1999 г., была арганізавана першая навуковая канферэнцыя «Сімяон Полацкі: светапогляд, грамадска-палітычная і літаратурная дзейнасць» з нагоды 370-годдзя асветніка. Акрамя таго, была падрыхтавана багатая культурная праграма: канцэрт арганнай музыкі і экскурсія ў Сафійскім саборы, наведванне Спаса-Еўфрасіннеўскага манастыра, Мастацкай галерэі, экскурсія ў Музеі беларускага кнігадрукавання і Музеі-бібліятэцы Сімяона Полацкага. Многія ўдзельнікі скарысталіся магчымасцю наведаць і іншыя музеі запаведніка.
Навуковы форум адбываўся ў атмасферы агульнай зацікаўленасці ў прадстаўленых даследаваннях, з навуковымі дыскусіямі і абмеркаваннямі, планаваннем супрацоўніцтва на бліжэйшы час і аддаленую перспектыву.
Крыніца: Музей беларускага кнігадрукавання