Яңы йыл алдынан Радий Хәбиров МХО ветераны менән осрашты

30 декабрҙә Өфө районының Миловка ауылында Башҡортостан Башлығы Радий Хәбиров махсус хәрби операцияла ҡатнашҡан прапорщик Вячеслав Евстифеев менән осрашты. 33 йәшлек яугир-десантсы иңендә – бай хәрби тәжрибә. Ул Төньяҡ Кавказ территорияһында хеҙмәт итә, Сүриәлә ике тапҡыр командировкала була. Вячеслав махсус хәрби операцияның тәүге көндәренән үк ҡатнаша. Күрһәткән ҡаһарманлығы өсөн Батырлыҡ ордены һәм Суворов миҙалы менән бүләкләнгән. 2022 йылдың 17 сентябрендә һөжүм ваҡытында Вячеслав ауыр яралана, һул аяғы имгәнә һәм һул ҡулын юғалта. Башҡортостан Башлығы яугир менән 2024 йылдың октябрендә гумконвойҙы оҙатҡанда танышып, уны килеп күрергә вәғәҙә биргән. Радий Хәбиров яугирҙең ата-әсәһе Алексей Николаевичҡа һәм Гүзәл Әйүп ҡыҙына ысын ир-егет тәрбиәләгәндәре өсөн рәхмәт әйтте. Вячеславтан тыш, ғаиләлә тағы өс бала – ул һәм ике ҡыҙ бар. Ә улар үҙҙәре Благовар районында йәшәй. Радий Хәбиров Евстифеевтар ғаиләһен яҡынлашып килгән Яңы йыл менән ҡотланы һәм яугиргә күрһәткән батырлығы һәм ҡаһарманлығы өсөн генерал Шайморатов орденын тапшырҙы. Республика етәксеһе Вячеславтың пландары менән ҡыҙыҡһынды. МХО ветераны 2025 йылда яңы һөнәр алыу өсөн университетҡа уҡырға инергә йыйыныуы тураһында һөйләне. Ә әлегә ул Республика һуғыш ветерандары клиник госпиталенең Медицина реабилитацияһы һәм тергеҙеү- дауалау үҙәгендә һаулығын нығыта. - Һеҙгә, Радий Фәрит улы, яугирҙәребеҙгә ярҙам иткәнегеҙ өсөн рәхмәт. Беҙ быларҙың барыһын да баһалайбыҙ, – тине Вячеславтың ата-әсәһе. - Һәләк булғандарҙың ғаиләләре менән осрашыу өсөн һәр ваҡыт ваҡыт табыуығыҙ ҙа һәм бөтә республиканың уларға ярҙам итеүе лә бик мөһим. Радий Хәбиров, власть органдарының төп бурысы, һис шикһеҙ, хәрби хеҙмәткәрҙәргә һәм уларҙың ғаилә ағзаларына ярҙам итеү, тип билдәләне. - Мин Вячеславты бер сарала осраттым, уға ҡунаҡҡа килергә, тормошо тураһында һөйләшергә вәғәҙә иткәйнем. Бына бөгөн килдем. Өйләнергә ҡарар иткәндә, уның туйына килермен, тип килештек, – тине Радий Хәбиров. - Һәм, әлбиттә, уға һәм өйҙәренә ҡайтҡан барлыҡ егеттәргә ярҙам итәсәкбеҙ. Киләһе йыл Башҡортостанда Махсус хәрби операцияла ҡатнашыусыларға һәм уларҙың ғаиләләренә ярҙам итеү йылы буласаҡ. Егеттәребеҙҙе һәм яҡындарыбыҙҙы хәстәрлек менән уратып алайыҡ, бер нәмәгә лә мохтаж булмаһын өсөн барыһын да эшләйек. Фото һәм мәғлүмәт: https://glavarb.ru/rus/press_serv/novosti/188879.html