Республикала бер юлы 20 фельдшер-акушерлыҡ пункты асылды

Яңы йыл алдынан Башҡортостанда «Һаулыҡ һаҡлау» милли проектын тормошҡа ашырыу барышында 20 фельдшер-акушерлыҡ пункты, дүрт табип амбулаторияһы һәм дөйөм практика табибының бер офисы асылды. Рәсәй Һаулыҡ һаҡлау министрлығының матбуғат хеҙмәте мәғлүмәттәре буйынса, яңы объекттар заманса талаптарға һәм стандарттарға ярашлы итеп төҙөлгән. Улар халыҡҡа сифатлы медицина ярҙамы күрһәтеү һәм хеҙмәткәрҙәргә эшләү өсөн барлыҡ кәрәкле ҡорамалдар менән йыһазландырылған. Оло йәштәгеләр һәм хәрәкәттәре сикле граждандар өсөн пандус бар. «Башҡортостан Рәсәйҙә төҙөлгән модулле фельдшер-акушерлыҡ пункттары һәм табип амбулаториялары һаны буйынса лидерҙарҙың береһе булып тора. Һуңғы биш йылда ғына беҙ беренсел звеноның 19 капиталь объектын төҙөнөк һәм файҙаланыуға тапшырҙыҡ, 2025 йылда республика райондарында заманса стандарттар буйынса йыһазландырылған тағы ла алты яңы поликлиника, 135 модулле фельдшер-акушерлыҡ пункты асыласаҡ», - тип хәбәр итте Башҡортостандың һаулыҡ һаҡлау министры Айрат Рәхмәтуллин. «Һанлы фельдшер-акушерлыҡ пункты» проекты ярҙамында хәҙер ауыл халҡы һанлы медицина хеҙмәттәре менән файҙалана аласаҡ. Медицина хеҙмәткәрҙәре ситтән тороп ваҡытлыса эшкә һәләтһеҙлек ҡағыҙын аса, электрон рецепт яҙҙыра, табип менән телемедицина консультацияһы үткәрә һәм медицина мәғлүмәттәрен икенсе учреждениеға - мәҫәлән, ЭКГ, Йөрәк-ҡан тамырҙары хәүефе менән идара итеү үҙәгенә ебәрә ала. Рәсәй Президенты Владимир Путиндың май указдарына ярашлы, 2024 йылға ил үҫешенең төп маҡсаттарына өлгәшергә кәрәк. Шуларҙың араһында халыҡ һанын арттырыу, граждандарҙың тормош сифатын яҡшыртыу, иҡтисадҡа һәм социаль өлкәгә һанлы технологияларҙы индереү мөһим бурыстарҙың береһе булып тора. ”Һаулыҡ һаҡлау” милли проектының (национальный проект “Здравоохранение) төп маҡсаты – хеҙмәткә һәләтле йәштәге халыҡтың үлем күрһәткесен, ҡан әйләнеше сирҙәренән, яман шештәрҙән үлем осраҡтарын кәметеү, инновацион медицина технологияларын индереү, шул иҫәптән пациенттар сәләмәтлеген иртә диагностикалау һәм дистанциянан тороп мониторинг үткәреү алымдарын ҡулланыу. Фото: “Башинформ”