2025 йылда Башҡортостан халҡын торлаҡ-коммуналь хужалыҡ өлкәһендә нимә көтә?

2024 йылда Башҡортостан Республикаһының Торлаҡ-коммуналь хужалыҡ министрлығы эшмәкәрлеге ҡала мөхитенең сифатын яҡшыртыуға, коммуналь инфраструктураны яңыртыуға, милли проекттарҙы тормошҡа ашырыуға, төбәк граждандарының уңайлы һәм хәүефһеҙ йәшәүен тәьмин итеүгә, хеҙмәттәрҙе ышаныслы һәм өҙлөкһөҙ күрһәтеүгә йүнәлтелде. Үтеп барған йыл етди ҡаҙаныштары, ведомствоның эш йомғаҡтары һәм киләһе йылға пландар тураһында республиканың торлаҡ-коммуналь хужалыҡ министры Ирина Голованова таныштырҙы. Министр әйтеүенсә, ҡатмарлы шарттарға ҡарамаҫтан, ведомство бөтә милли һәм федераль проекттарҙы уңышлы тормошҡа ашырҙы. 2024 йылда республика коммуналь инфраструктураны яңыртыуҙа әүҙем ҡатнашыуын дауам итте, быға федераль һәм республика аҡсаһы ярҙамында өлгәшелде. Министрлыҡ бер программаны ла юғалтманы һәм бүленгән аҡсаны һөҙөмтәле үҙләштерҙе. - Һәр проект - ул яуаплылыҡ, миллиардтар, уларҙы үҙләштерергә генә түгел, ә дөрөҫ эш итергә лә кәрәк. Проекттарҙың береһен дә һуңға ҡалдырмайынса тамамланыҡ, - тип һыҙыҡ өҫтөнә ала Ирина Александровна. Ихата биләмәләрен төҙөкләндереү программаһы сиктәрендә республика Башлығы Радий Хәбировтың башланғысы буйынса 2012 йылда уҡ эшләй башлаған «Башҡорт ихаталары» проектын тормошҡа ашырыуҙ дауам ителде. 2024 йылда 33 муниципалитетта 123 ихата биләмәһе төҙөкләндерелгән һәм 2025 йылға яҡшыртыу өсөн яңы объекттар исемлеге планлаштырылған да инде. Күмертауҙа ҡала ландшафтын яҡшыртҡан һәм халыҡтың ял итеүе өсөн уңайлы зона булдырған Советтар майҙанын төҙөкләндереү - быға сағыу миҫалдарҙың береһе. Яңы проекттарға етди әҙерлек алып барыла ла инде. 2025 йылға республика милли проекттарҙа, шул иҫәптән йәмәғәт киңлектәрен һәм коммуналь селтәрҙәрҙе модернизациялауҙы үҙ эсенә алған «Йәшәү өсөн инфраструктура» проектында ҡатнашыуын дауам итәсәк. Министрлыҡ республика хөкүмәте хуплаған ҡатнашыуға ғаризалар тапшырған да инде, хәҙер улар Рәсәйҙең Төҙөлөш һәм торлаҡ-коммуналь хужалыҡ министрлығында раҫлана. - Беҙ яңы саҡырыуҙарға әҙер һәм граждандарҙың йәшәү сифатын яҡшыртыу өҫтөндә эшләүҙе дауам итәбеҙ. Яңы проекттарға заявкалар бирелгән, һәм беҙ средстволарҙы һөҙөмтәле үҙләштереп, ҡуйылған бурыстарҙың барыһын да үтәй алырбыҙ, тип ышанабыҙ, - тип белдерҙе Ирина Александровна. Торлаҡ-коммуналь хужалыҡ өлкәһен һанлаштырыу - министрлыҡтың мөһим аҙымдарының береһе. Торлаҡ-коммуналь хужалыҡтың дәүләт мәғлүмәт системаһы ҡушымтаһын индереү торлаҡ-коммуналь хужалыҡ өлкәһендә идара итеүҙе һәм контролде яҡшыртыу өсөн мөһим ҡорал булып тора, торлаҡ-коммуналь хужалыҡ баҙарында ҡатнашыусылар - власть органдарынан алып идара итеүсе компанияларға һәм халыҡҡа тиклем берҙәм мәғлүмәт киңлеген булдырырға мөмкинлек бирә. Бынан тыш, торлаҡ-коммуналь хужалыҡты һанлаштырыу сиктәрендә коммуналь хеҙмәттәрҙе иҫәпләү һәм түләү процестарын автоматлаштырыу буйынса эш дауам ителәсәк. Торлаҡ-коммуналь хужалыҡтың дәүләт мәғлүмәт системаһында яңы һанлы ҡоралдарҙың барлыҡҡа килеүе граждандар өсөн уңайлыраҡ шарттар булдырасаҡ, шулай уҡ күрһәтелгән хеҙмәттәрҙең сифаты өсөн идара итеүсе компанияларҙың яуаплылығын арттырасаҡ. 2024 йыл Башҡортостандың Торлаҡ-коммуналь хужалыҡ министрлығы өсөн ҙур проекттарҙы тормошҡа ашырыу, инфраструктураны яңыртыу һәм граждандар менән эшләү осоро булды. 2025 йылға ведомство милли проекттарҙа һәм коммуналь селтәрҙәрҙе модернизациялауҙа әүҙем ҡатнашыуын дауам итергә, шулай уҡ хеҙмәттәрҙең асыҡлығын һәм сифатын күтәреү өсөн һанлы инструменттарҙы үҫтерергә ниәтләй. Фото: mgazeta.com