Компанияның пландары ҙур

Бөгөн Башҡортостан Башлығы Радий Хәбиров уҙғарған оператив кәңәшмәлә “Элипсмол” яуаплылығы сикләнгән йәмғиәтен ойоштороусы Егор Захторенко сығыш яһаны. Әлшәй районының Раевка ауылынан был компания 2025 йылдың аҙағына тиклем айына 360 тоннанан ашыу моцарелла етештереү ҡеүәтенә өлгәшергә ниәтләй. Предприятие 2022 йылда, аҡ май һәм “Кальята” ярымфабрикатын етештереү маҡсатында, ойошторола. Тейешле проект 2023 йылдың авгусында Башҡортостандың Инвестиция комитеты тарафынан хуплау таба. Республика был башланғысты тормошҡа ашырыуҙа ярҙам күрһәткән һәм технологик ҡорамалдар һатып алыуға сығымдарҙың бер өлөшөн ҡаплаған. – Завод 2024 йылдың майында эшләй башлай. Эш башланғандан алып, 19 мең тонна һөт эшкәртелгән, 1 мең тонна аҡ май һәм 1,4 мең тонна “Кальята” ярымфабрикаты етештерелгән, – тип хәбәр итте Егор Захторенко. – Бынан тыш, быйыл беҙ моцарелла етештереү цехын астыҡ, уның өлгөләрен клиенттарға тәҡдим иттек. Проектҡа инвестицияларҙың дөйөм күләме – 405 миллион һум. Предприятиеның әҙер продуктты оҙатыу географияһы Рәсәй төбәктәрен үҙ эсенә ала. Бынан тыш, 2024 йылдың декабрендә компания Үзбәкстанға тәүге продукцияһын ебәргән. Егор Захторенко шулай уҡ һөт һәм эремсек һыуын эшкәртеү буйынса киптереү цехы төҙөүҙе күҙ уңында тотҡан производствоны артабан үҫтереү пландары тураһында хәбәр итте. Республика предприятиеның яңы башланғыстарын хупларға әҙер, тип билдәләне Башҡортостан Башлығы. – Бындай заманса производствоны башлап булдырыуығыҙ, сифатлы һәм ихтыяж менән файҙаланылған продукция сығарыуығыҙ бик шәп, – тине Радий Хәбиров. – Мотлаҡ “Инвестиция сәғәте”нә яңы проекттар менән килегеҙ, уларҙы тормошҡа ашырыуҙа ниндәй ярҙам күрһәтә алыуыбыҙ хаҡында фекер алышырбыҙ. Оператив кәңәшмәлә шулай уҡ төбәктә һөт эшкәртеүҙе үҫтереүҙең урта сроклы стратегияһын ҡаранылар. Башҡортостан Хөкүмәтенең Премьер-министры урынбаҫары – ауыл хужалығы министры Илшат Фәзрахманов билдәләүенсә, 2030 йылға тиклем республика биләмәһендә 30-ға яҡын һөт фермаһы төҙөләсәк. Уларҙың продукцияһын эшкәртеү өсөн яңы производстволар булдырыу талап ителә. Мәҫәлән, 2025 йыл башында Бәләбәй һөт комбинатында йомшаҡ сырҙар етештереү буйынса махсуслаштырылған цех асырға планлаштыралар. Төбәк етәксеһе яңы технологик комплексты сафҡа индереү тантанаһына барырға ниәтләүен белдерҙе. Фото: Башҡортостан Башлығы сайты.