Исемле йылға әҙерлек башланды

Башҡортостанда Махсус хәрби операцияла ҡатнашыусыларға һәм уларҙың ғаилә ағзаларына ярҙам йылын үткәреү планы 100-гә яҡын сараны үҙ эсенә ала. Был хаҡта бөгөн Хөкүмәттең аҙналыҡ кәңәшмәһендә ғаилә, хеҙмәт һәм халыҡты социаль яҡлау министрының беренсе урынбаҫары Юрий Мельников хәбәр итте. Барлыҡ саралар ҙа тематик бүлектәргә берләштерелгән. Бында ойоштороу мәсьәләләре, гуманитар ярҙам күрһәтеү, муниципалитеттарҙа үткәреүгә тәҡдим ителгән иҫтәлекле даталар календары, һаулыҡ һаҡлау һәм социаль-хеҙмәт адаптацияһы буйынса, шулай уҡ мәҙәни-ял, спорт һәм патриотик саралар күҙ уңында тотола. Тематик йылды асыу тантанаһы Өфөлә 2025 йылдың 23 февралендә Ватанды һаҡлаусылар көнөнә арналған саралар сиктәрендә үтәсәк. Бынан тыш, Башҡортостанда Махсус хәрби операцияла ҡатнашыусыларға һәм уларҙың ғаилә ағзаларына ярҙам йылы сиктәрендә ҙур проекттарҙы тормошҡа ашырыу күҙаллана. Улар иҫәбендә – «Ҙур ғаилә ялдары», «Үҙебеҙҙекеләр хаҡында хәстәрлек менән», «Ҡыйыулыҡ», «Армия мәҙәниәте көндәре» акциялары, «Геройҙар ваҡыты» патриотик йыр конкурсы, «Ирҙәрсә һөйләшеү» форумы, «Уңышҡа үҙ юлың» йәштәр фестивале, махсус хәрби операция ветерандары араһында «Яугир» ярыштары, республиканың исемле батальондары байраҡтарын ҡаршылау марафоны, шулай уҡ «Ватанды һаҡлаусылар» Дәүләт фонды филиалдары етәкселәре өсөн Бөтә Рәсәй семинар-кәңәшмәһе. – Барлыҡ саралар ҙа махсус хәрби операцияла ҡатнашыусыларҙы һәм уларҙың ғаилә ағзаларын йәштәрҙе илһөйәрлек рухында тәрбиәләүгә, тарихи хәҡиҡәтте һәм хәтерҙе һаҡлауға йәлеп итеүгә йүнәлтелгән, – тине Юрий Мельников. – Шулай уҡ яугирҙәребеҙгә, үҙҙәре Тыуған ил алдындағы бурысын үтәгәндә, улар тураһында хәтерләйҙәр, ышаналар, ғаиләләре хаҡында хәстәрлек күрәләр һәм ярҙам итәләр тигән ышаныс та өҫтәй. Тәҡдим ителгән тематик йыл планы махсус хәрби операцияла ҡатнашыусыларға һәм уларҙың ғаиләләренә ярҙам саралары комплексын системалаштырыу мөмкинлеген бирәсәк, тип билдәләне Башҡортостан Башлығы. Төбәк етәксеһе республиканың ҡала һәм райондары етәкселәренә тейешле муниципаль пландар әҙерләргә ҡушты. – Эште башлау өсөн, ғинуар уртаһына барыһы ла әҙер булырға тейеш, – тине Радий Хәбиров. Фото: Башҡортостан Башлығы сайты.