Өфөлә билбау көрәше буйынса халыҡ-ара ярыштар башланды

Башҡортостан Хөкүмәтенән хәбәр итеүҙәренсә, Өфөнөң Көрәш һарайында Халыҡ-ара билбау көрәше федерацияһының беренсе президенты Риф Фәтҡелбаян улы Ғәйнанов иҫтәлегенә билбау көрәше буйынса халыҡ-ара турнир башланды. Билдәләп үтергә кәрәк, был - яңы спорт объектын ҡабул иткән тәүге халыҡ-ара ярыштар. Ярыштарҙа донъяның 14 иленән: Рәсәй Федерацияһынан, Беларусь,Ҡаҙағстан, Монголия, Үзбәкстан, Ҡырғыҙстан, Азербайжан, Төркмәнстан, Әрмәнстан, Иран, Төркиәнән, Грузия һәм Абхазиянан 228 спортсы ҡатнаша. Башҡортостан Республикаһынан турнирҙа 30 көрәшсе сығыш яһай. Ирекле стилдәге спортсылар араһында ярыштар түбәндәге ауырлыҡ категорияларында үтә: ир-егеттәр (57 кг, 62 кг, 68 кг, 75 кг, 82 кг, 90 кг, 100 кг, 100 кг); ҡатын-ҡыҙҙар (52 кг, 58 кг, 66 кг, 76 кг). «Беҙгә билбау көрәше - халыҡ-ара феномен, мең йыл иҫәпләнгән спорт йолаһы. Ул йәшәй, йылдам үҫешә һәм бөтә ҡитғаларҙа йәш спортсыларҙы йәлеп итә. Ә Башҡортостан күптән инде билбау көрәше үҙәгенә әүерелде - уның традициялары республикабыҙҙа ҡәҙерләп һаҡлана, быуындан быуынға тапшырыла. Бөгөнгө ярыштарҙың күренекле спортсы һәм тренер, Бөтә донъя һәм Бөтә Рәсәй билбау көрәше федерацияһына нигеҙ һалыусы яҡташыбыҙ Риф Фәтҡелбаян улы Ғәйнанов исемен йөрөтөүе ҙур әһәмиәткә эйә», - тип сәләмләне ярыштарҙа ҡатнашыусыларҙы һәм ҡунаҡтарҙы Башҡортостан Республикаһының спорт министры Руслан Хәбибов. Әйткәндәй, Риф Фәтҡелбаян улы Ғәйнанов Октябрьский ҡалаһында тыуған. Ул Бөтә донъя һәм Бөтә Рәсәй билбау көрәше федерацияһына нигеҙ һалған, грек-рим көрәше буйынса СССР-ҙың спорт мастеры, классик көрәш буйынса Рәсәйҙең атҡаҙанған тренеры. 2006 йылда Өфөлә билбау көрәше буйынса донъя чемпионаты үтте, унда Рәсәй Президенты Владимир Путин да ҡатнашҡан. 2016 - 2024 йылдарҙа Башҡортостан Республикаһында билбау көрәше буйынса Рәсәйҙең спорт мастерлығына 335 кандидат, Рәсәйҙең 50 спорт мастеры, һигеҙ халыҡ-ара класлы спорт мастеры һәм Рәсәйҙең дүрт атҡаҙанған спорт мастеры әҙерләнгән. Тәүге «БРИКС илдәренең халыҡ-ара уйындары»нда Башҡортостан спортсылары алты миҙал яулаған: өс алтын һәм өс көмөш. Фото: БР Хөкүмәте сайтынан.