"Яугирҙәргә ҡушылып беҙ ҙә иланыҡ..."

Ошо көндәрҙә Х. Әхмәтов исемендәге Башҡорт дәүләт филармонияһының бер төркөм артисы махсус хәрби операция биләмәһенән йөрөп ҡайтты. Башҡортостандың халыҡ артистары – йырсылар Әлфиә Юлсурина һәм Заһир Иҫәнсурин, ҡурайсы Рушан Биктимеров, атҡаҙанған артистар Тимур Рамаҙанов, Венера Юлгилдина, баянсы Рэм Гәрәев һәм таыш операторы Илдар Ғәниев Луганск Халыҡ Республикаһында булды. Башҡортостан артистары махсус хәрби операция биләмәһенә йыш килә. Улар ДХР һәм ЛХР-ҙа фронт эргәһендәге госпиталдәрҙә, мәктәптәрҙә һәм мәҙәниәт учреждениеларында, республикабыҙ шефлыҡ иткән Красный Луч ҡалаһында, хәрби хәрәкәттәр барған ерҙә сығыш яһай. Был яу шарттарында һалдаттарҙың хәрби рухын күтәреү, Рәсәйҙең яңы төбәктәре халҡын Башҡортостан мәҙәниәте һәм сәнғәте менән таныштырыуға булышлыҡ итә. Филармония артистары ЛХР-ҙағы Ровеньки ҡалаһындағы госпиталдә концерт бирҙе – унда яугирҙәр реабилитация үтә. Шулай уҡ Петровскоелағы М. Шайморатов исемендәге мәктәптә лә сығыш яһанылар. – Был Луганскиға икенсе сәйәхәтем, – ти Заһир Иҫәнсурин. – Командабыҙ һәйбәт, юл буйына йырлап, бер-беребеҙҙе рухландырып барҙыҡ. Беренсе көн легендар комдивыбыҙ исемен йөрөткән мәктәптә булдыҡ. Уҡытыусылар ҙа, балалар ҙа республикабыҙ тураһында белә һәм Бөйөк Ватан һуғышында батырлыҡ күрһәткән башҡорт һалдаттарының иҫтәлеген ҡәҙерләп һаҡлай. Үҙҙәренә килгән һәр башҡортостанлыны шатланып ҡаршылайҙар. Мәктәпкә килгәс, мине күптәнге таныштары һымаҡ күреп йылы ҡаршы алдылыр – был ғәжәпләндерҙе лә, күңелгә рәхәт тә булды. Беренсе йырымды башҡортса йырлаһам да, зал аяғүрә баҫып алҡышланы, хатта күҙемә йәш эркелде. Икенсе көнөнә Ровенькиҙағы госпиталгә барҙыҡ. Яугирҙәр алдында сығыш яһау ныҡ тулҡынландырһа ла, тәү ҡарашҡа ҡырыҫ күренгән ир-егеттәр ихлас ҡабул итте. Һәр сығышыбыҙҙы ҡул сабып ҡаршы алып, алҡышлап оҙаттылар, ҡушылып йырланылар ҙа, хатта бейенеләр. Концерттан һуң сәй артында һөйләшеп ултырҙыҡ. Яугирҙәр беҙҙең турала, республикабыҙ хаҡында һорашты, яуҙаштары тураһында һөйләне. Был сәйәхәт күңелдә тик йылы тойғолар ҡалдырҙы, – тип уртаҡлашты. Тимур Рамаҙанов әйтеүенсә, сәйәхәттән йәш ҡатыш йылы тойғолар ҡалған. – Мәктәптә сығыш яһағанда балаларҙың күҙҙәренә иғтибар иттем. Уларҙа ҡурҡыу менән шатлыҡ бергә ҡушылған ине. Концерт ваҡытында ҡараштары тоҡанып китте. Беҙ йырлағанда бер генә уҡыусы ла ултырып торманы. Етеҙ йыр булһа, рәхәтләнеп бейенеләр. Үҙҙәренә саҡ ҡына булһа ла байрам тойғоһо өҫтәгеләре килгәндер. Ошондай бәләкәй генә ҡыуанысты ла был балалар күптән татығаны юҡ бит... Киске 11-ҙә комендант сәғәте башлана һәм бөтә ер ҙә тынып ҡала. Был тынлыҡтан күңелгә хатта шом оялай. Ровеньки яу барған ерҙән сағыштырмаса 50 саҡрымда ята. Был Өфө менән Ҡырмыҫҡалы араһы, тигән һүҙ. Беҙ сығыш яһаған госпиталдә башлыса штурмлаусылар дауалана, улар – яу барған ерҙең алғы һыҙығында. Егеттәргә 20-25 йәштер – минән дә кесерәктәр, әммә уларҙың күҙҙәре тормоштоң әсеһен-сөсөһөн татыған кешеләрҙеке кеүек... Бында беҙ башҡа репертуарҙы һайланыҡ. Әсәй, тыуған яҡ, Ватан, балалар тураһында йырлағанда, яугирҙәр иланы. Уларға ҡушылып, беҙ ҙә, – ти Тимур Рамаҙанов. – Нимә күргәнбеҙ, бөтәһен иҫәпкә алып, шуны ышаныслы әйтә алам: Рәсәй үҙ кешеләре менән көслө! Тағы ла барырға тәҡдим итһәләр, һис шикләнмәй риза булырмын! Башҡорт дәүләт филармонияһы патриотик рухтағы, шулай уҡ хәйриәлек акцияларын күпләп үткәрә. Шул иҫәптән, яугирҙәргә ярҙам йыйыуҙы ла күтәреп ала. Шундай ҙур сараның береһен филармония эстрадаһының художество етәксеһе вазифаһын башҡарыусы, Башҡортостандың халыҡ артисы Мәхмүт Нәҙершин ойошторҙо. Йыйылған аҡсаға УАЗ-52 машинаһы һатып алып, Мәхмүт Нәсим улы уны үҙе махсус хәрби операциялағы яҡташтарға алып барып тапшырҙы. Филармония “Ватанды һаҡлаусылар” фондының Башҡортостандағы филиалы менән дә тығыҙ бәйләнештә. Улар ҡурсыуындағы яҡташтарҙы концерттарға, байрам сараларына саҡырып торалар. Ә инде Х. Әхмәтов исемендәге Башҡорт дәүләт филармонияһының солисы, Башҡортостандың халыҡ артисы Радик Динәхмәтовтың 2023 йылдың июленән алып “Башҡортостан” полкы менән бергә махсус хәрби операцияла ҡатнашҡаны бөтәгебеҙгә лә мәғлүм. Мәғлүмәт, фото: БДФ матбуғат хеҙмәте.