Ул һаман да улын көтә

Яҡындарын махсус-хәрби операцияға оҙатҡан замандаштарыбыҙ өсөн һәр бер көн һынау. Йөрәктәре янһа ла, быны йөҙҙәрен сығармаҫҡа тырыша улар. Сираттағы командировка мәлендә Ишембай районының Ишәй ауылында “Сайка” позывнойлы батыр яугиребеҙҙең ғаиләһен күреп сыҡтыҡ. Әсәһе эштә булыуы сәбәпле, әңгәмәбеҙ һалдаттың атаһы Илшат Сәйфетдинов менән барҙы. Был ғаиләлә дүрт бала үҫә. Уларҙың барыһы ла үҙ аллы, яуаплы итеп тәрбиәләнә. Иң кеселәре 2022 йылда өлөшләтә мобилизация ваҡытында махсус хәрби операцияға юллана. –“Ил саҡыра икән, барам” тине улым. Кемдер бит илде һаҡларға тейеш. Уның ҡарарын хупланым. Бәләкәйҙән бик яуаплы булып үҫте ул. Ҡушҡан эште еренә еткереп үтәй торғайны. Спорт менән дә шөғөлләнде. Волейбол, баскетбол, еңел атлетиканы яратты. Район кимәлендәге ярыштарҙа ҡатнашты. Армияла махсус тәғәйенләнештәге ғәскәрҙәрҙә хеҙмәт итеп ҡайтты. “Армияға бар, был ир-егеттәрҙең бурысы” тинем улыма, – тип һөйләне заманында үҙе лә ике йыл Польшала ракета-артиллерия часында хәрби бурысын үтәгән Илшат Үзбәк улы. Егеттәргә өлгөнө атай кеше күрһәтә. Илшат ағайҙың ике улы ла хәрби хеҙмәттә булған. – Армия егеттәрҙең донъяға ҡарашын үҙгәртеп ҡайтара. Физик һәм рухи яҡтан нығыта. Кеше менән аралашырға ла өйрәтә ул. Ике йыл хеҙмәт иткәндә күберәк нәмәгә өйрәнәһең, – тип өҫтәп ҡуйҙы әңгәмәсем. Махсус хәрби операцияға юлланғас, Ишәй егете нарадаларға ла лайыҡ була. Былтыр күрһәткән батырлығы өсөн уға “Шайморатов” миҙалы тапшырыла. Бер нисә тапҡыр ялға ла ҡайтып киткән. –Шылтыратып торҙо. Бер ҡасан зарланманы. Һуңғы осор ғына аралашыу өҙөлдө. Ноябрь башынан бәйләнеш юҡ. Шуныһы бик ныҡ хафаландыра, ләкин өмөт өҙөлмәй, – тине сабыр ғына итеп атай кеше. Ауылдаштарынан да “Сайка” позывнойлы егет тураһында әллә күпме ыңғай фекерҙәр ишеттек. – Кешеләргә ярҙамсыл, изгелекле, бер ҡасан да тәртип боҙоп йөрөмәне. Ауылыбыҙҙың ҡарап торорлоҡ матур, аҡыллы егете, – тинеләр. Сабырлығы, түҙемлелеге барлыҡ булмышында сағылған атай, Илшат Үзбәк улының үҙе тураһында ла һораштыҡ. Һөнәре буйынса тракторсы-механизатор булған замандашыбыҙ өс тиҫтә йылдан ашыу “III Интернационал” колхозында хеҙмәт итә. Ауылда йорт һалып, үҙ хужалығында ла күпләп мал аҫрап донъя көтә уңған ғаилә. Олоғая килә уларҙың һанын кәметәләр. Илшат Үзбәк улының үҙ техникаһы булыуы ла хужалыҡ мәшәҡәттәрен алып барыуҙа ныҡлы ярҙам. –Миңә ҡарап улдарым да техника яратты. Оло улым 10 йәшендә тракторҙа эргәмдә ярҙамсы булып йөрөнө. Кесеһендә лә техникаға ҡыҙыҡыһыныу булды. Атайым да заманында мехнизатор булып эшләне. Атай-әсәй ғүмер иткән ер ҡәҙерле. Шуға ла Ишәйҙән ситкә китәһем килмәне. Бала сағым бында үтте, бөтә туғанарым ошонда. Киләсәктә лә туғандарым, дуҫтарым менән берҙәм, татыу булып йәшәргә булһын. Һуғыштар бөтөп, донъялар тынысланһын, – тигән иң изге теләктәр ҙә яңғыраны. Туғыҙ ейән-ейәнсәрҙәре булыуы тураһында ла ғорурланып һөйләне Илшат Үзбәк улы. Уларға ҡарап күңел баҫып, киләсәккә өмөттәр бағлап тормош дауам итә. Автор фотоһы. Ишембай районы.