Атайҙарҙың көслө ҡанаты ел-ямғыр тейҙермәҫ

Бынан байтаҡ йылдар инде республикала ғаилә ҡиммәттәрен һаҡлауға, ғаилә статусын нығытыуға, ир-аттарҙың ролен күтәреүгә ҙур иғтибар бирелә. Яҡшы башланғыстар йәмғиәт тарафынан хуплап ҡаршы алынды. Республикала быйыл бишенсе тапҡыр үткәрелгән “Атайҙар ҡаһарманлығы” йәмәғәт наградаһын тапшырыу тантанаһы шуға сағыу миҫал. Атайҙар – ил терәге, балалары өсөн ҙур таяныс та, дәрт-ҡеүәт биреп тороусы маяҡ та. Атай йорто– тормош ҡото, күпме генә йылдар үтһә лә, ул һине магниттай тартып, бала саҡ хәтирәләрен яңыртып тора. Атайҙарҙың үткер күҙе, ел-ямғыр тейҙермәҫлек көслө ҡанаты һәм һөйөүе аҫтында үҫкән балалар тормошҡа ҙур әҙерлек менән аяҡ баҫа. Улар үҙҙәренең хеҙмәте, ғаиләһенә, тыуған яғына, яҡындарына йылы ҡарашы менән, яңғырауыҡлы һүҙҙәрҙән тыш та, ул һәм ҡыҙҙарында йәшәгән төйәгенә, Ватанына, тарихына, мәҙәниәтенә сикһеҙ хөрмәт, илһөйәрлек тәрбиәләй. “Күп балалы атайҙар” номинацияһында наградаға лайыҡ булған Алмас Фәрит улы Ибраһимов - тап шундай өлгөлө атайҙарҙың береһе. Ҙур ғаилә ҡороп, иңдәренә оло яуаплылыҡ алған ир-ат өсөн атай булыу - аңлы рәүештә һайлап алынған бурыс. Ундай атайҙарҙың балалары яҡшы уҡыу менән бергә, республиканың спорт, ижади һәм йәмәғәт тормошона әүҙем йәлеп ителгән. Ғаилә ҡиммәттәрен үҫтереүгә уларҙың индергән өлөштәре баһалап бөткөһөҙ. “Атайҙар ҡаһарманлығы” наградаһы Ғаилә йылында уларҙың шәхес тәрбиәләүҙәге ошо ябай һәм бик мөһим ҡаҙаныштарын таныу, хөрмәт күрһәтеү тигән һүҙ. Танышыбыҙ Алмас Ибраһимовты Дүртөйлө районында белмәгән кеше юҡтыр, сөнки ул райондың ҡаҙандай ҡайнап торған мәҙәни тормошоноң уртаһында ҡатнашып йәшәй. Ул райондың Мәҙәни-ял итеү үҙәгендә баянсы булып эшләй, “Илһам” гармунсылар ансамбле етәксеһе лә. Бер мәҙәниәт сараһы уның ҡатнашлығынан башҡа үтмәй. Алмас бик етди, төплө фекерле, асыҡ йөҙлө егет булып сыҡты. Илеш районының Иҫке Ҡырғыҙлы ауылында тыуып үҫә. Өфөләге 2-се педагогия училищеһын һәм М. Аҡмулла исемендәге Башҡорт дәүләт педагогия университетын уңышлы тамамлай. Үрге Йәркәйҙә бер нисә йыл музыка уҡытыусыһы булып эшләгәндән һуң хеҙмәт юлын Дүртөйлө районында дауам итә. – Йыр-моңға, гармунда уйнауға һөйөү бала саҡтан һалынды. Өс кенә йәшлек сағымда ҡартатайым гармун һатып алып бирмәһә, бөгөн кем булыр, ниндәй вазифала эшләр инем икән? – тип хәтергә ала үҙенә юл күрһәткән яҡындарын Алмаз. – Әле лә ул иҫтәлекле гармун бар, ауылда тороп ҡалды. Әсәйем өйҙә йырларға ярата торғайны, мин уға эйәрергә тырышып, гармунда көй һайлаған булам. Эй, матур бала саҡ, һиҙелмәй генә үтте лә китте... Тормош иптәше, Балтас ҡыҙы Ғәлиә менән Өфө ҡалаһында танышалар. Хәҙер уларҙың татыу ғаиләһендә өс малай үҫә. Атанан күргән – уҡ юнған, тигәндәй, барыһы ла бөгөн музыка менән шөғөлләнә. Искәндәр 6-сы класта уҡыу менән бергә музыка мәктәбенең хореография класын тамамлай, “Аҡ тимгел” бейеү ансамблендә шөғөлләнә. Илгизәр 5-се класта уҡый һәм баян класы буйынса белем ала. Ә кинйәләре Исламға дүрт кенә йәш, уның да ағаларынан ҡалышырға иҫәбе юҡ. Бәхетле осраҡтар Ибраһимовтар тормошонда булып ҡына тора. 2022 йылда йәш белгес “Ауыл мәҙәниәте хеҙмәткәре” программаһына ярашлы бирелеүсе 500 мең һумлыҡ сертификат алыуға ирешә. – Мин был программаға йәш белгес булараҡ эләктем, мәҙәниәт идаралығы етәкселәре ваҡытында кәңәштәре менән ярҙам итте. Сертификат ярҙамында ипотека кредитының бер өлөшөн яптым. Ҙур финанс ярҙамы булды беҙҙең ғаилә өсөн. Был программа йәш белгестәр өсөн бик кәрәкле һәм файҙалы, – ти Алмас ҡәнәғәтлек менән. Эйе, 2021 йылдан алып Башҡортостан Башлығы башланғысы менән эшкә ҡушылған “Ауыл мәҙәниәте хеҙмәткәре” программаһы ауыл ерҙәрендә һәм бәләкәй ҡалаларҙа хеҙмәт иткән байтаҡ белгестәргә 500 мең һум күләмендә түләүҙәр алырға ярҙам итте. Баянсы Алмас Ибраһимовтың төрлө кимәлдәге конкурстарҙа, фестивалдәрҙә ҡатнашып, призлы урындар, дипломдар, иҫтәлекле бүләктәр алыуына ғәжәпләнәһе лә түгел, сөнки ул халыҡ күңеле тыуҙырған ошо мөғжизәле йыр-моң донъяһы, кешегә көс, илһам биреүсе ижад менән ҡанатланып йәшәй. X төбәк-ара “Уйна, гармун!” конкурс-фестивалендә “Иң яҡшы гармунсы”, Фәриҙә Ҡудашева һәм Бәхти Ғайсин ижадына арналған “Ике аҡҡош” Бөтә Рәсәй музыка конкурсында лауреат, VI Бөтә донъя фольклориадаһында яҡшы ойоштороусы булараҡ билдәләнеүе уны тағы ла яңы үрҙәргә әйҙәй. Динә Арыҫланова. Дүртөйлө районы. Айрат Нурмөхәмәтов фотоһы.