Улар ике меңдән ашыу кешенең ғүмерен ҡотҡарған

27 декабрҙә Өфөлә Башҡортостан Башлығы Радий Хәбиров Рәсәй Федерацияһының Ҡотҡарыусылар көнөнә арналған тантаналы йыйылышта ҡатнашты. Төбәк етәксеһе Рәсәй Ғәҙәттән тыш хәлдәр министрлығының Башҡортостан Республикаһы буйынса Баш идаралығы, Башҡортостандың Ғәҙәттән тыш хәлдәр буйынса Дәүләт комитеты хеҙмәткәрҙәрен һөнәри байрамдары менән ҡотланы һәм дәүләт наградаларын тапшырҙы. Радий Хәбиров сығыш яһап: – Ҡәҙерле дуҫтар! Һеҙҙе Рәсәй Федерацияһы Ҡотҡарыусылары көнө менән ихлас ҡотлайым! Республика халҡы исеменән һеҙгә ихлас рәхмәт һүҙҙәрен еткерәм. Бөтә янғын һүндереүселәргә һәм ҡотҡарыусыларға, Рәсәй Ғәҙәттән тыш хәлдәр министрлығының Башҡортостан Республикаһы буйынса Баш идаралығына, республиканың Ғәҙәттән тыш хәлдәр буйынса дәүләт комитетына батырлыҡ, һөнәри оҫталыҡ, һәр ваҡыт ярҙамға килергә әҙер булғанығыҙ өсөн рәхмәт. Һеҙҙең һөнәрегеҙ – иң мөһим, хөрмәтле һәм изге эштәрҙең береһе. Беҙ һәр ваҡыт үҙ бурысын намыҫлы, фиҙакәр һәм юғары кимәлдә профессиональ рәүештә башҡарған республика ҡотҡарыусылары менән ғорурланабыҙ. Быйыл ғына ике меңдән ашыу кешенең ғүмерен ҡотҡарҙығыҙ. Һеҙ шулай уҡ башҡа төбәктәрҙә һәм илдәрҙә йәшәүселәргә ярҙам итәһегеҙ. Быйыл апрелдә Ырымбур өлкәһендәге емергес ташҡын эҙемтәләрен бөтөрөүҙә ҡатнаштығыҙ. Ырымбур халҡынан ҙур рәхмәт һүҙҙәрен еткерәм. Ҡотҡарыусылар һәм янғын һүндереүселәр махсус хәрби операция биләмәһенә гуманитар ярҙам алып барыуҙа булыша – дөйөм ауырлығы 15 мең тоннанан ашыу булған 142 колонна, шулай уҡ хәрби хеҙмәткәрҙәр оҙатыуында 320-нән ашыу ылау оҙаттылар. Был эште махсус хәрби операция тамамланғанға тиклем дауам итәсәкбеҙ. Беҙ республикабыҙ халҡының именлеген тәьмин итеүгә айырыуса иғтибар бүләбеҙ. Быйыл янғын һүндереү-ҡотҡарыу көстәрен үҫтереү стратегияһын тормошҡа ашырыу сиктәрендә Ишембай районының Һайран һәм Ғафури районының Красноусол ауылдарында ике янғын һүндереү часы төҙөлөшө тамамланды. 24 берәмек янғын һүндереү техникаһы һатып алынған. Хөрмәтле дуҫтар! Бөгөн залда – ғәҙәттән тыш хәлдәрҙә һәм ваҡиғаларҙа кешеләрҙе ҡотҡарыу, гуманитар операциялар үткәреүҙә үҙен лайыҡлы күрһәткән ысын геройҙар. Эҙләү-ҡотҡарыу бүлексәһе начальнигы Евгений Сергеевич Кобыща махсус хәрби операция башланғандан алып ялға ҡайтҡан яугирҙәрҙе 13 тапҡыр оҙатып махсус хәрби операция биләмәһенә бара. 16 йыл хеҙмәт иткән осорҙа янғындар һәм һыу баҫыуҙар ваҡытында халыҡты эвакуациялауҙа күп тапҡырҙар ҡатнаша. Быйыл Белоретта Евгений Сергеевич алты кешене, шул иҫәптән янған бинанан ике баланы ҡотҡарҙы. Йәйге ташҡын ваҡытында Әбйәлил районының Озерное һәм Бөрйән районының Миңлеғол ауылдарының 200 кешеһен эвакуациялауға ярҙам итте. Рөстәм Мөрсәлим улы Әхмәҙиев шулай уҡ республика Башлығының рәхмәт хаты менән билдәләнде. Ул Бәләбәй районының Приют ауылында көнкүреш газы шартлау эҙемтәләрен бөтөрөүгә етәкселек итте. Ҡоролмаларҙы һүтеү барышында биш кеше ҡотҡарыла. 2021 йылдың декабрендә Туймазылағы “Пилот” предприятиеһының нефть ташыу паркында янғын һүндереү менән етәкселек итә. Оҫта ғәмәлдәр һәм ваҡытында ҡабул ителгән ҡарарҙар арҡаһында янғындың артабан таралыуына юл ҡуйылмай. Быйыл Өфөләге күп фатирлы йорттарҙың береһендә янғын эвакуация өсөн берҙән-бер сығыу юлын ҡаплай. Эске хеҙмәт подполковнигы, янғын һүндереү хеҙмәтенең дежур сменаһы начальнигының өлкән ярҙамсыһы Вил Рауил улы Сафин ҡотҡарыу операцияһын оҫта ойоштора. 62 кеше ҡотҡарыла, шуларҙың 27-һе – балалар. Ҡәҙерле дуҫтар! Һеҙҙең һәр берегеҙ тураһында йылы һүҙҙәр әйтергә мөмкин. Башҡортостан һеҙҙең менән ғорурлана. Һеҙ беҙҙең өсөн, Башҡортостан халҡы өсөн – ысын геройҙар. Һеҙгә һәм ғаиләләрегеҙгә ысын күңелдән һаулыҡ һәм именлек теләйем! Яңы йыл каникулы тыныс, ваҡиғаларһыҙ үтһен. Барығыҙҙы ла Яңы йыл менән! Фото: glavarb.ru.