Үҙ эшеңде асырға теләһәң...

Башҡортостандың барлыҡ ҡала һәм райондарында үҙ эшеңде асыу мәсьәләләре буйынса Берҙәм консультациялар көнө үтәсәк. Осрашыуҙарға ғәмәлдәге эшҡыуарҙар ҙа, үҙ эшен башлап ебәрергә уйлаусылар ҙа саҡырыла. Эшҡыуарҙарға ярҙам көнөн республиканың мәшғүллек үҙәктәре үткәрә. Унда шулай уҡ республикала бизнесты үҫтереүгә булышлыҡ итеүсе башҡа профилле ойошмаларҙың вәкилдәре ҡатнашасаҡ. Шуны билдәләп үтәйек: мәшғүллеккә булышлыҡ итеү "Демография" милли проекты сиктәрендә граждандарҙың көнкүрешен яҡшыртыу буйынса милли маҡсаттарға өлгәшеүҙең төп аспекттарының береһе булып тора. – Әлеге ваҡытта мәшғүллек хеҙмәте эшһеҙ граждандарға 165 мең һум күләмендә бер тапҡыр бирелә торған финанс ярҙамы күрһәтә, йыл башынан алып уны 160 кеше алған да инде. Аҙ тәьмин ителгән граждандар социаль контракт төҙөп, үҙ эшен аса ала - түләү күләме бизнес-план менән билдәләнә һәм 350 мең һумға тиклем тәшкил итеүе мөмкин. Быйыл 1200-ҙән ашыу кеше социаль контракт төҙөнө. Бынан тыш, өҫтәмә һөнәри компетенциялар кәрәк булғанда яңы эш башлаған эшҡыуар 30 мең һумға тиклем курсты һайлап, бушлай уҡый ала, – тип һөйләне Башҡортостандың ғаилә, хеҙмәт һәм халыҡты социаль яҡлау министры вазифаһын башҡарыусы Ленара Иванова. Өфө һәм Өфө районы халҡы Тыныслыҡ урамы, 37а (конференц-зал, 2-се ҡат) адресы буйынса осрашыуға саҡырыла, сара иртәнге сәғәт 11-се яртыла башлана. Унда алдан теркәлеү кәрәк. Берҙәм консультация көнөндә ҡатнашыусылар мәшғүллек хеҙмәте вәкилдәренә, шулай уҡ Республика халыҡҡа социаль ярҙам үҙәге, “Минең бизнесым” үҙәге, Өфө бәләкәй эшҡыуарлыҡты үҫтереү һәм уға ярҙам итеү ҡала фонды, Ер һәм мөлкәт мөнәсәбәттәре идаралығы, Рәсәйҙең Федераль һалым хеҙмәте, Роспотребнадзор идаралығы эксперттарына һорауҙар бирә ала, улар ҙа сараның спикерҙары буласаҡ. Билдәле булыуынса, “Демография” (национальный проект “Демография”) милли проекты Рәсәй Президенты Владимир Путиндың май указы менән булдырылды. Фото: Башҡортостандың Ғаилә, хеҙмәт һәм халыҡты социаль яҡлау министрлығы.