Әсәйем изге күңелле кеше ине...

96 йәшлек инәйҙең оҙаҡ йәшәү сере ниҙә? Олоғайһалар ҙа, матур итеп ҡартайған инәй-бабайҙар була. Уларҙың хатта биттәрендәге йыйырсыҡтары ла мөләйемлек өҫтәп торған һымаҡ. Күңеле яҡшы кешеләр генә шундай булалыр. Күптән түгел редакциябыҙға килгән 96 йәшлек Нажиә инәй Ғәниеваны (Исмәтова) күреү менән ошондай фекер ҡабат яңырҙы. – Оҙаҡ йәшәүегеҙҙең сере ниҙә? Нисек шулай матур һаҡландығыҙ? – тигән һорауҙы бирмәй булдыра алманым. – Кешелекле булдым. Ғүмер буйы башҡаларға ярҙам итеп йәшәнем. Уларҙың рәхмәттәрен күп алғанға ла оҙон ғүмерле булғанмындыр. Әсәйем дә шулай изгелекле ине. Әле лә хәтеремдә, мин бәләкәй саҡта хәйер һорап беҙгә бер бабай менән бәләкәй малай килеп керҙе. Ул саҡта әсәйемдең ере бар ине, тары сәсеп үҫтергәйне. Асығып килеп кергән шул бабайҙы йәлләп, уға бер биҙрә тары биреп сығарҙы, ә малайҙы алып ҡалып ҡарап үҫтерҙеләр. Әсәйемдең матур өлгөһөн бала саҡтан күңелемә һеңдереп үҫтергәнмен. Әле лә кемдеңдер ярҙамға мохтажлығын күрһәм, уға битараф ҡала алмайым. Ярҙам итеп, күңелемә ҡәнәғәтлек алам, – тине Нажиә Рәхим ҡыҙы. Бала сағы һуғыш осорона тура килгәнгә, михнәттәр татып үҫкәнгә лә тормоштоң ҡәҙерен белә Ғафури районының Бурлы ауылында тыуып үҫкән әңгәмәсем. - Бәләкәй генә көйө колхозда эшләнек. Йоҡо ла йүнләп эләкмәй торғайны. Ҡул менән иген урған, көлтә бәйләгән, бесән сапҡан ваҡыттар әле лә хәтерҙә. 25-әр сутый ура инек. Кисен һуғыштағы һалдаттарға бирсәткәләр бәйләнек. Кем нисек ярҙам итә, йомортҡа, май – барыһын да еңеү өсөн яугирҙәргә оҙаттыҡ. Үҙебеҙгә кейем-ашау яғы ла наҡыҫ булһа ла, бирешмәнек. Мәктәптән һуң, көрәк тотоп уңышы йыйылған бәрәңге баҫыуына сереген йыйырға сығып китә инек. Тимер мейестә бешереп ашай торғайныҡ, – ул осорҙа барса халыҡ күргән ҡыйынлыҡтарҙы тағы бер хәтергә алды әңгәмәсем. Үҫмер саҡтан колхозда ауыр эштәрҙе башҡарғанға уға “Хеҙмәт ветераны” тигән исем дә бирелә. Бала саҡтан һуғыш ауырлыҡтарын татып үҫкәс, Еңеү көнө уның өсөн айырыуса ҡәҙерле. Бөйөк Еңеүҙең 50, 60, 65, 70, 75 йыллығы уңайынан тапшырылған миҙалдарын ул яратып, ҡәҙерләп таға. Бөйөк Ватан һуғышында ҡатнашҡан атаһы, бер туған ағайҙарын да йылылыҡ менән хәтергә ала. Уҡыуға ынтылышы ла көслө була. Мәктәптән һуң тәүҙә Өфөләге Китапхана техникумында белем ала, аҙаҡ Сауҙа техникумында ла уҡырға өлгөрә. Үҙенең ғүмерен ул сауҙа тармағына арнай. Магазин директоры һымаҡ яуаплы вазифалар башҡарырға ла тура килә. Бар ғүмере тырыш хеҙмәттә үтә. Тормош иптәше менән дүрт балаға матур тәрбиә бирәләр. Уларҙың барыһы ла юрист һөнәрен үҙ итә. Бөгөн биш ейән, ике ейәнсәр, дүрт бүлә-бүләсәргә ҡәҙерле өләсәй ҙә Нажиә Рәхим ҡыҙы. – Йәштәргә теләгем – кешелекле булығыҙ, башҡаларға ярҙам итегеҙ. Нәфселе булмағыҙ, тапҡан малығыҙҙы бүлешергә өйрәнегеҙ. Башҡаларға файҙалы булып, ярҙам итеп йәшәү – үҙе ҙур бәхет, – тине ул, йылмайып. 96 йәшкә етһә лә, тормошто яратыу хисенең көслө булыуы менән һоҡландырҙы ул. Өйөндә ашарға бешерәме, йыйыштырамы – һәр эшен яратып башҡара. Беҙҙең “Башҡортостан” гәзитен дә уҡырға өлгөрә. – Яҡынлашып килгән Яңы йыл байрамы менән редакция коллективын, гәзит уҡыусыларҙы ҡотлайым. Редакцияға килһәм, һәр ваҡыт ихлас итеп ҡаршы алып торалар. Һеҙҙең менән күрешеп, һөйләшеүҙән күңелем күтәрелеп ҡайтам, – тине хеҙмәт ветераны. Тормошҡа зарланмай, булғанына шөкөр итә белеп йәшәргә кәрәклегенә йәнә бер инандыҡ Нажиә инәй менән һөйләшеүебеҙҙән һуң. Тормоштоң һынауҙарын лайыҡлы үтә белеүҙә, бәләкәй генә шатлыҡтарына ла һөйөнә белеүҙә сағыла йәшәүебеҙҙең асылы. Автор фотоһы.