Көрәш һарайындағы секцияларға нисек яҙылырға?

Быйыл август аҙағында Өфөлә асылған Көрәш һарайында “Рәсәй – спорт дежаваһы”, Рәсәй менән Ҡаҙағстандың ХХ төбәк-ара хеҙмәттәшлеге, Ялта халыҡ-ара форумдары үткәрелде. Бында Рәсәйҙең күп кенә төбәктәренән, унлаған сит илдән ҡунаҡтар булды, күп иҡтисади килешеүҙәргә ҡул ҡуйылды. Бөгөн донъя кимәлендәге уникаль объект ғәҙәти эш графигы буйынса эшләй, йәш спортсылар күнекмәләр үткәрә. Дзюдо, көрәш, грэпплинг һәм көрәштең башҡа төрҙәре буйынса шөғөлләнергә теләүсе балаларҙы йыйыу дауам итә. Күнекмәләр үткәрелгән шарттар, нисә йәштән һәм нисек секцияға яҙыуҙары тураһында Көрәш һарайы директоры Эдуард Абдядилов һөйләне. - Эдуард Юрьевич, Көрәш һарайы халыҡ-ара форумдар тарафынан һынауҙар үтте. Төп күнекмәләр процесына күсеү нисек бара? - Өс айҙан күберәк ваҡыт эсендә форумдарҙы нисек үткәреү тураһында ныҡлап тәжрибә тупланыҡ. Хәҙер күнекмәләр үткәреү процесын көйләйбеҙ. Күнекмәләрҙең беренсе көнө үтте инде. Унда күп кенә балалар йыйылды. - Хәҙер ниндәй секциялар эшләй? - Дзюдо, грэпплинг һәр ирекле көрәш секциялары эшләй, самбо буйынса күнекмәләр башлана. Көрәш һәм билбаулы көрәш буйынса күнекмәләр залын әҙерләйбеҙ. Яңы йылға тиклем республика грек-рим көрәше мәктәбен ҡабул итергә иҫәп тотабыҙ, улар өсөн ике зал әҙерләйбеҙ. - Секцияларға күпме бала йыйҙығыҙ? Теләк белдереүселәр күпме? - Беҙҙең туплау менән шөғөлләнеүсе махсус бүлексә бар, сөнки был – мөһим йүнәлеш. Яҡын-тирәләге райондарға мәғлүмәттәр таратырға тырыштыҡ. Барыһының да Көрәш һарайының асылыуы тураһында белмәүе асыҡланды. Бөгөн 1500 тирәһе бала йыйҙыҡ. Күптәр секцияға яҙыла, әммә беҙгә килергә, ҡалырға теләргә тейеш. Шуға күрә һандар үҙгәрәсәк әле. Һөҙөмтәлә 1200 тирәһе бала күнекмәләргә йөрөр тип ышанабыҙ. Спортсыларҙың йәше көрәштең һайланған төрөнә бәйле. Дзюдо, самбо һәм грэпплингҡа дүрт йәштән ҡабул итәбеҙ. - Малайҙарҙы ғына алаһығыҙҙыр, моғайын? - Малайҙарҙы ла, ҡыҙҙарҙы ла алабыҙ. Көрәш – ҡыҙҙар өсөн дә шәп спорт төрө, тип иҫәпләйем. Ул сыныҡтыра, ышаныслыраҡ итә, үҙ-үҙеңде яҡлай алыу мөмкинлеген бирә. Шуға күрә ҡыҙҙарҙы бигерәк тә көтәбеҙ. Секцияларға һайлау йыл буйына дауам итә. Балалар килә, үҙен һынап ҡарай, ҡала йәки башҡа спорт төрөн һайлай. - Балаларын һеҙгә алып килергә теләүселәргә ҡайҙа мөрәжәғәт итергә? - (347) 299-20-99 телефоны буйынса шылтыратһындар. Секциялар, көрәштең айырым бер төрө буйынса тулы мәғлүмәттәр бирәсәктәр, ҡайһы ваҡытта килеү, үҙең менән нимә алыу тураһында әйтәсәктәр. Был – иң ябай һәм уңайлы ысул. - Тренерҙар менән хәл нисек? Штат тулғанмы? - Тренерҙар коллективы тупланған, остаздар балалар менән эшләй башланы. - Көрәш һарайы үҙен халыҡ-ара форумдар, концерттар үткәреү майҙансығы кеүек күрһәтте. Был тәжрибә дауам итерме? Күнекмәләргә был ҡамасауламаҫмы? - Төрлө сараларҙы ойоштора алабыҙ. Объект логистика йәһәтенән грамоталы эшләнгән. Халыҡ-ара форумдар ваҡытында бында төрлө саралар – түңәрәк өҫтәлдәр, һөйләшеүҙәр, концерт программаһы ойошторолдо. Беҙҙең маҡсатыбыҙ ойоштороу, кешеләр өсөн уңайлы итеү ине. Бында бер ниндәй ҙә ҡатмарлылыҡтар юҡ. Беҙҙең 3500 тамашасыға иҫәпләнгән төп арена бар, партерҙа тағы 1500 кеше ултыра ала. Йәғни 5 мең тирәһе кешене ҡабул итә һәм уларҙы күнекмәләргә килгән балалар, концерт тамашасылары менән ҡабул итә алабыҙ. - Көрәш һарайының асыҡ майҙансығы ла бар. Уның нисек файҙаланырға уйлайһығыҙ? - Ҡыш көндәрендә каток эшләргә, хоккей ҡаптары ҡуйырға уйлайбыҙ. Йылдың йылы ваҡытында футбол, баскетбол һәм волейбол секциялары эшләйәсәк. Эргә-тирәлә йәшәүселәрҙең еңел атлетика һуҡмаҡтарын файҙалана алырлыҡ итеп эшләйбеҙ. Автор: Роман Якимчук (“Башинформ”). Фото: Олег Яровиков.