Ҡурайыбыҙҙың киләсәге бар

Башҡортостан Башлығы Радий Хәбировтың халыҡ менән сираттағы тура бәйләнешендә яңы төҙөлгән Дәүләт ҡурайсылар ансамбле тураһында һорау яңғыраны. Һорауҙы Өфөнөң 7-се балалар музыка мәктәбе уҡыусыһы Данил Никитин бирҙе. Әйтеп үтергә кәрәк, Дәүләт ҡурайсылар ансамбле бер нисә ай эсендә генә ойошоп, тәүге клиптарын сығарып, Республика көнөнә үҙҙәренең тәүге концертын ҡуйып барыһын да таң ҡалдырып өлгөргәйне инде. Ансамблдең тәүге концерты ул халҡыбыҙҙың ҙур байрамына әүерелде, республика Башлығы тарафынан артистарға автобус бүләк ителде, ә иң мөһиме - быйылғы йылдан алып 10 октябрҙе Ҡурай көнө итеп иғлан ителде. – Беҙ Милли ҡурайсылар ансамбле булдырҙыҡ! Ансамбль халҡыбыҙҙың ҡурай сәнғәтен һаҡлау һәм үҫтереү йәһәтенән әйҙәүсе көс булараҡ сығыш яһай. Унда эләгергә мөмкинме? Әлбиттә, ҡурайҙы мотлаҡ уйнарға өйрәнергә кәрәк! Беҙҙең балаларға музыка мәктәптәрендә, сәнғәт училищеларында, сәнғәт институтында ҡурайҙа уйнарға өйрәнеү өсөн махсус бүлектәр бар. Унда мотлаҡ юғары белем алырға кәрәк һәм артабан ансамблгә эләгеү өсөн үҙеңә ышаныу мөһим, – тип яуап бирҙе республика Башлығы йәш ҡурайсы Данил Никитиндың һорауына. Өҫтәүенә, республика Башлығы Данилдың башҡорт телендә бик яҡшы һөйләшеүен билдәләп үтте. Һәм видеоға һорау яҙҙырған үҫмерҙәргә һоҡланып ҡараны. Егеттәр үҙҙәренең һәләттәрен асып һалды, ә төбәк етәксеһе уларҙың музыкаль яҡтан шәхестәргә хас гармониялы үҫешен баһаланы. Эйе, республика Башлығы башланғысы менән күп ҡурайсылар хыялланған дәүләт кимәлендәге ансамбль юҡҡа ғына барлыҡҡа килмәне. Ул – халыҡ уйын ҡоралында уйнап концерттар биреүсе генә түгел, ә халҡыбыҙҙың рухын күтәреүсе, тарихын һаҡлаусы һәм аҡ киләсәген билдәләүсе бер аҙан да кеүек яңғырай. Әйткәндәй, Башҡортостандың халыҡ артисы Азат Миңлеғәле улы Айытҡолов шулай уҡ был ансамблгә нигеҙ һалыусы һәм етәксеһе булараҡ йәш ҡурайсының һорауына яуап бирҙе: – Ансамблгә эләгер өсөн башта музыка мәктәбендә шөғөлләнергә, аҙаҡ колледжды тамамларға кәрәк (сәнғәт училищеһы). Колледждан һуң беҙҙең сәнғәт институтында юғары белем ала егеттәр. Дәүләт ҡурайсылар ансамблендә уйнаусыларҙың 100 проценты тиерлек юғары белемгә эйә. Иң мөһиме, бында уйнаған егеттәр бөтәһе лә рухлы. Шуға ла ҡурайҙа уйнар өсөн иң тәүҙә рухлы булыу кәрәк. Күңелеңдән ҡурайҙы ныҡ итеп яратырға кәрәк. Ошо ансамблдә йыйылған егеттәрҙең күбеһенең үҙ уҡыусылары бар. Үҙҙәре ансамблдәр менән эшләй белгән егеттәр. Әйткәндәй, республика Башлығына һорау биреүсе егеттәрҙең уҡытыусылары Айҙар Байтимеров үҙе шулай уҡ Дәүләт ҡурайсылар ансамблендә уйнай. Ул башта Сибайҙағы балалар музыка мәктәбендә уҡыған һәм Өфө сәнғәт училищеһын, сәнғәт институтын ҡыҙыл дипломға тамамлап, шунда уҡ Башҡорт музыка факультеты оркестрының дирижеры булып эшкә ҡалған. Республика Башлығына һорау биргән уҡыусылары Данил Никитин, Арслан Латипов, Роберт Быков, Рафаэль Баһауетдинов, Максим Петров, Эрнест Мөхәмәтйәновтар ҙа - республика конкурстарында ҡурай буйынса алдынғы урын алған егеттәр. Был егеттәргә ҡарап, республика Башлығы, беҙҙең ҡурайыбыҙҙың киләсәге бар, тине. Һәм был ысынлап та шулай: башҡорт халҡының милли уйын ҡоралы ҡурайҙы һәр егет уйнарға өйрәнгәндә, уны профессионал кимәлдә уҡығанда, Дәүләт ҡурайсылар ансамбленә эләгергә хыялланғанда... Таңсулпан БАЙТИМЕРОВА. Фото: Дәүләт ҡурайсылар ансамбленең матбуғат хеҙмәтенән.