Тура эфир аша бәйләнеш ваҡытында Башҡортостан етәксеһе Радий Хәбиров стилләштерелгән милли кейем темаһына ла иғтибар бүлде. Был хаҡта фекер ишетергә теләп, студия ҡунаҡтары араһында булған кейем-һалым менән эш иткән эшҡыуар ханыма мөрәжәғәт иттек. Анна Уварова, “Фабрика” универмагы директоры: – Беҙҙең “Фабрика” универмагы өҫ һәм аяҡ кейеме, биҙәүестәр дизайнерҙарын, уны етештереүселәрҙе берләштерә. Компанияла Рәсәй дизайнерҙары эшләй, үҙебеҙҙең яҡташтар – Башҡортостандыҡылар ҙа күп. Радий Фәрит улы тура бәйләнеш аша эфирға сыҡҡан ваҡытта миңә студияла булырға яҙҙы, саҡырылыусылар араһында инем. Ҡатнашыуымдан бик ҡәнәғәт ҡалдым, сөнки үҙ күҙҙәрем менән ҙур команданың эшен күҙәтергә яҙҙы. Республика етәксеһенең һәр һорауға төплө итеп яуап биреүе, һәр мәсьәлә буйынса яуаплы ведомстволарҙың да тиҙ ҡатнашып китеүе шатландырҙы. Үҙемде борсоған һорауҙы ла бирергә уңайы сыҡты. Мин Башҡортостанда етештерелгән кейем-һалым танылып, айырылып торһон өсөн логотип булдырыу идеяһын еткерҙем һәм был уй хуплау табырмы, тип ҡыҙыҡһындым. Шатлығыбыҙға күрә, республика Башлығы фекеребеҙҙе хупланы. Беҙҙән артабан ең һыҙғанып эшләү, проектты тормошҡа ашырырға әҙерләнеү талап ителә. Эшлекле һәм көндәлек кейемдә милли стилде ҡулланыуға килгәндә, шуны әйтер инем: кешеләр уның менән бик ҡыҙыҡһына, был йүнәлеш торған һайын популярыраҡ була бара, ул трендҡа әйләнде, тиергә була. Кейем, әлбиттә, сифатлы булырға, яҡшы туҡыманан, еренә еткереп тегелгән булырға тейеш. Баш ҡалабыҙҙа ғына түгел, бүтән ерҙә лә ҡупшы кейенергә яратыусы ҡатын-ҡыҙҙарҙың көндәлек кейеменә милли ерлектәге биҙәктәр өҫтәгәнен күрәбеҙ. Башҡорт милли биҙәктәре бик ҡупшы, улар Башҡортостандың мәҙәни коды булып тора. Шуға ла ундай биҙәк һалынған кейемде башҡорт халҡы ғына түгел, башҡалар ҙа ҙур теләк менән һатып ала, кейә. Этно стилендәге кейемдең киләсәге ҙур. Һүрәттә: Анна Уварова. Шәхси архивындағы фото.