Аҡса күп булған урында урлау ҙа йышыраҡ була

Чиновниктарға ҡарата енәйәт эштәре — ул көс органдарының ғәҙәти эше. Бында конспирологик теориялар юҡ. Был хаҡта Башҡортостан Башлығы Радий Хәбиров 3 декабрҙә уҙған тура бәйләнеш ваҡытында белдерҙе. “Мин буяуҙарҙы артыҡ ҡуйыртмаҫ инем. Көс структураларының ғәҙәти эше бара. Был даими эштең шаһиттары булған, бар. Аңлайһығыҙмы, чиновник булыу – ул йәмғиәттең сағылышы. Һәм беҙ бер ҡасан да “барыһы ла камил” тип әйтмәйбеҙ. Етәкселәр араһында йүнһеҙҙәр була. Йүнһеҙҙең йүнһеҙҙәре. Улар бер ҡасан да булмаясаҡ тип әйтеп булмай. Тормош шундай. Бурыс – уларҙан ваҡытында ҡотолоу”, – тине Башҡортостан Башлығы. Уның һүҙҙәренсә, көс структураларының ҡарарҙары властарҙың ҡайҙалыр иғтибарһыҙ ҡалыуын һәм иғтибарлыраҡ булырға кәрәклеген аңлата. “Әммә мин ниндәйҙер конспирологик теорияны күрмәйем. Һүрәтләмәҫ инем, – тип билдәләне Радий Хәбиров. – Көс структураларын үҙ эшен башҡарғанда һәм, нигеҙҙә, таҙартҡанда, күренештәрҙең тәбиғи булыуы был. Мин уларға бының өсөн рәхмәтлемен”. Республика Башлығы хаталар, аҡлау хөкөмдәре барлығына иғтибар итте. Миҫал итеп ул Башҡортостандың транспорт һәм юл хужалығы министры урынбаҫары Виктор Жульков менән булған хәлде килтерҙе. “Азат итеү ҡарары килде”, – тип билдәләне ул. Чиновниктарҙы ҡулға алыуға ҡағышлышлы хәл буйынса аңлатма һорап эксперт, Башҡортостан Республикаһының Контроль-иҫәп палатаһы рәйесе урынбаҫары Елена Анатольевна ТЕНЯЕВАға мөрәжәғәт иттек. – Енәйәтселек менән көрәште көсәйтеү – хоҡуҡ һаҡлау органдарының төп бурыстарының береһе. Башҡортостандағы хәл буйынса түбәндәгеләрҙе әйтә алам. Башҡортостан 2023 йылда федераль бюджеттан түләүһеҙ керемдәр күләме буйынса Волга буйы округы төбәктәре араһында беренсе һәм тотош Рәсәй буйынса етенсе урынға сыҡты. Тәү сиратта был - милли проекттарҙы һәм федераль программаларҙы тормошҡа ашырыуға килгән аҡса. Бөтә бюджет сараларынын, бигерәк тә федераль аҡсаны тотоноуҙы контролдә тотоу бик етди башҡарыла, ҡыҙғанысҡа ҡаршы, ҡағиҙә боҙоуҙар ҙа була. Шул уҡ ваҡытта һәр хоҡуҡ боҙоу енәйәткә нигеҙ булып тормай, ҡайһы берҙә был тикшереү барышында ғына асыҡлана. Шуға күрә ҡуҙғатылған эштәр һаны буйынса түгел, ә ғәмәлдәге сығарылған хөкөмдәр буйынса ҡарарға кәрәк. Рәсәй Федерацияһы Генераль прокуратураһы статистикаһы буйынса, коррупция енәйәттәренең иң күп өлөшө Мәскәү өлкәһендә, Мәскәүҙә, Санкт-Петербургта, Краснодар крайында, Волгоград өлкәһендә асыҡланған. Башҡортостан бындай 10 төбәк иҫәбенә лә инмәй. Шуға күрә бында түбәндәге һығымта яһарға мөмкин: бюджет аҡсаһы күп булған урындарҙа ҡағиҙә боҙоуҙар йышыраҡ була. Власть органдарының әүҙем позицияһы һөҙөмтәһендә Башҡортостан Республикаһына ҙур аҡса, шул иҫәптән бюджет саралары йәлеп ителде, әммә был коррупция хоҡуҡ боҙоуҙарының пропорциональ үҫешенә килтермәне. Башҡортостан Республикаһының Контроль-иҫәп палатаһы үҙ тикшереүҙәре барышында ҡағиҙә боҙоу менән тотонолған аҡсаны бюджетҡа ҡайтарыу өсөн бөтә кәрәкле саралар күрә. Был мәғлүмәттәрҙе иҫәпкә алып, республикала ниндәйҙер ғәҙәттән тыш коррупция проблемаһы тураһында һүҙ алып барырға ярамай, тип уйлайым, – тип белдерҙе Елена Теняева. Фото: Елена Теняеваның архивынан.