Радий Хәбиров Вероника Никишина менән осрашты

6 декабрҙә Республика Йортонда Башҡортостан Башлығы Радий Хәбиров Халыҡ-ара бизнес аҙналығы сараларында ҡатнашыу өсөн Өфөгә килгән Рәсәй экспорт үҙәгенең генераль директоры Вероника Никишина менән осрашты. Көн тәртибендә - республика продукцияһын экспортҡа оҙатыуҙы киңәйтеү һәм ойошма менән хеҙмәттәшлекте үҫтереү мәсьәләләре. Вероника Никишина билдәләүенсә, Башҡортостан үҙ тауарҙарын тышҡы баҙарҙарға сығарыуҙа уңыштар күрһәтә, төбәктә сеймал булмаған энергетикаға ҡарамаған экспорт әүҙем үҫешә. 2024 йылдың 10 айы йомғаҡтары буйынса республика 2.0 Төбәк экспорт стандартын индереү һөҙөмтәлелеге рейтингында алдынғы урындарҙы биләй. -Башҡортостан - экспортта иң әүҙем төбәктәрҙең береһе. Урындағы компаниялар 75 илдән партнерҙар менән хеҙмәттәшлек итә. Төбәктәрҙең экспортерҙарҙы алға ебәреү мәсьәләһендә әүҙемлеге, федераль үҙәк менән тығыҙ кооперация - компанияларға һөҙөмтәле ярҙам күрһәтеү һәм милли маҡсаттарға өлгәшеү өсөн мөһим аҙымдар. Республика Хөкүмәтенең эше -быға сағыу миҫал, - тине Вероника Никишина. Экспортты уңышлы үҫтереү әүҙем тышҡы иҡтисади эшмәкәрлек, күп ҡатмарлыҡтарҙы еңеп сығыу һәм Рәсәй экспорт үҙәге кеүек төп партнерҙар менән тығыҙ хеҙмәттәшлек итеүҙе талап итә, тип һыҙыҡ өҫтөнә алды Башҡортостан Башлығы. 2025 йылға бурысыбыҙ – ошо йүнәлеште артабан үҫтереү, яңы партнерҙар эҙләү, тине төбәк етәксеһе. Белешмә: АО “Рәсәй экспорт үҙәге” сеймал булмаған экспортҡа ярҙам итеү дәүләт институты, ул компанияларға тышҡы баҙарҙарға сығыуҙың бөтә этаптарында, шул иҫәптән “Халыҡ-ара кооперация һәм экспорт” милли проекты сиктәрендә финанс һәм финанс булмаған ярҙам күрһәтә. Башҡортостандың экспортҡа булышлыҡ итеү үҙәге республика етештереүселәренә продукцияһын сит илгә сығарыуҙа булышлыҡ итеү өсөн булдырылған. Мәғлүмәт һәм фото: https://glavarb.ru/rus/press_serv/novosti/187808.html