Әнүәр Нурғәлиевтең ҡыҙына яҙмыштың ауыр һынауҙары аша үтергә тура килә

Башҡортостандың халыҡ артисы, Татарстандың атҡаҙанған артисы Әнүәр Нурғәлиев үҙ ижадын яратыусыларҙы яңынан-яңы йырҙары, концерттары менән ҡыуандырыуын дауам итә. Ошо көндәрҙә ул зал тулы тамашасы йыйып, концерттар ҡуйып, быйылғы ижад миҙгелен тамамлап ҡуйҙы. Әнүәрҙең өр-яңы “Яратам һине” йырын тамашасылары айырыуса йылы ҡабул итте. Әнүәр Нурғәлиев йыш ҡына төрлө баҫмалаларға интервьюлар бирә. Ул үҙенең тормошо тураһында асыҡтан-асыҡ, тартынмайынса һөйләй. Бына бер интервьюһынан өҙөк. “Элина ҡыҙыбыҙҙы беҙ кескенәнән “Һин – иң яҡшыһы” тип үҫтерҙек. Яҙмыш уның алдында йәш ярымлыҡ сағыда уҡ ауыр һынау ҡуйҙы. Ул көн әле кисәгеләй хәтеремдә. Концертҡа әҙерләнеп йөрөйөм, Ирина костюмды үтекләне лә аш-һыу бүлмәһенә инеп китте. Һүнгән, әммә ҡыҙыу үтек өҫтәлдә ҡалған. Элина әсәһенең ни эшләгәнен ҡабатлайым тип, ике ҡуллап үтекте күтәреп алмаһынмы?! Ҡул усы бешкән, ауыртыуға түҙә алмай, бала үкһеп-үкһеп илай. Башта беҙ быны ул ҡәҙәр етди бешеүҙер тип уйламаныҡ, бинт менән урап ҡуйҙыҡ та, икенсе көнө табипҡа барҙыҡ. Шул көндән төн йоҡолары онотолдо: реанимация, операциялар, дауалау курстары... Тәүге операция уңышһыҙ булды: Элинаның ҡулы үҫеүҙән туҡтаны. Тәжрибәле табиптар табып, икенсе операция яһалды. Күҙгә күренеп торорлыҡ йәрәхәт урындары ҡалһа ла, тфү-тфү, ҡулы үҫә, бармаҡтары эшләй. Ҡайсаҡта балалар: “Һинең ҡулың йәмһеҙ”, – тиҙәр. Элина улар алдында үпкәләгәнен, кәйефе төшөүен бер ҙә күрһәтмәй, ә өйгә ҡайтҡас, үкһеп илай. Характеры ныҡ”, - тип һөйләгән Әнүәр Нурғәлиев бер нисә йыд элек биргән интервьюһында. Шөкөр, был хәлдәр хәҙер артта ҡалған. Элина – бик талантлы ҡыҙ, бала саҡтан бейеү менән шөғөлләнгән. Элинанан тыш, Нурғәлиевтәрҙең өлкән улдары Рафаэль бар. Ул сәнғәт донъяһынан йыраҡ, уның ҡарауы спорт менән әүҙем шөғөлләнә. Сығанаҡ: t.me/tatar_estrada Фото: kiziltan.ru ("Кызыл таң" гәзите сайтынан).