Башҡортостан менән Беларусь араһының яҡынайыуы ҡыуандыра

Эльвира Левшевич, Беларусь Республикаһынан килгән делегат, ошо республикалағы “Шишмә” татар-башҡорт ижтимағи-мәҙәни ойошмаһы етәксеһе: – Белоруссияла йәшәгән башҡорттарҙан һеҙгә күп сәләм. Үҙебеҙҙең Башҡортостаныбыҙға – тыуған еребеҙгә ҡайтыуыбыҙға бик шатбыҙ. Белоруссияла 300-ҙән ашыу ғына башҡорт йәшәй, әммә улар үҙ мәҙәниәтен, ғөрөф-ғәҙәттәрен һаҡлап йәшәй. Саҡмағош, Асҡын, Балтас райондарынан яҡташтарыбыҙ бар. Күптәре ижтимағи-мәҙәни ойошмабыҙҙың эшендә бик әүҙем ҡатнаша. Бөтә байрамдарҙы бергә үткәрәбеҙ, төрлө саралар ваҡытында үҙебеҙҙең милли ризыҡтарыбыҙҙы әҙерләйбеҙ, хатта Белоруссия телевидениеһы аша сәксәк, бәлеш, ҡыҫтыбый кеүек милли аш-һыуҙарыбыҙҙы әҙерләү буйынса оҫталыҡ дәрестәре күрһәттек. Һуңғы йылдарҙа Башҡортостан Республикаһы менән Беларусь Республикаһы араһында хеҙмәттәшлектең нығыуы – ҡыуаныслы күренеш. Өфөлә үткән “Китап байрамы"нан һуң Беларусь китап нәшриәте “Сыны Башкортостана в боях за Беларусь” тигән китап сығарҙы. Уның исем туйы бик ҙурлап, матур сара итеп үткәрелде. 2021 йылда, Башҡортостан Башлығы Радий Хәбиров Беларусь Республикаһына эш сәфәре менән килгән ваҡытта, унан тирмә, милли костюмдар йәһәтенән ярҙам күрһәтеүен һорағайныҡ. Әлеге китаптың исем туйы ваҡытында ошо милли костюмдарыбыҙҙы кейеп, башҡортса йырҙар йырлап, матур сығыш яһаныҡ. Ә инде Башҡортостанда “Антология Белорусской литературы” тигән китаптың сығыуы үҙе бер һоҡланғыс күренеш булды. Бөгөнгө ҡоролтайҙа мәҙәниәт секцияһының эшендә ҡатнаштым. Унда “Бөгөнгө заман башҡорто ниндәй булырға тейеш?” тигән һорауға яуап эҙләнек. Был йәһәттән ғаилә тәрбиәһенең роленә ныҡ баҫым яһалды. Автор фотоһы.