«ՏաԹևեր» ճոպանուղին երրորդ անգամ արժանացել է զբոսաշրջության ոլորտում ամենահեղինակավոր միջազգային մրցանակներից մեկին՝ World Travel Awards 2024-ին` հաղթելով «աշխարհի առաջատար ճոպանուղի» անվանակարգում, հայտնել է IdeA հիմնադրամը։
Հայկական ճոպանուղին առաջ է անցել այնպիսի մրցակից երկրներից, ինչպիսին է Բոլիվիան, Բրազիլիան, Վիետնամը, Կանադան, Նոր Զելանդիան, ԱՄՆ-ն և ՀԱՀ-ը:
«Բաց քվեարկության արդյունքներով «ՏաԹևեր»-ի հաղթանակը հայտարարվել է նոյեմբերի 24-ին Պորտուգալիայի Մադեյրա կղզում World Travel Awards 2024 պաշտոնական մրցանակաբաշխության ժամանակ»,- ասված է հայտարարության մեջ։
Պատվավոր մրցանակը ստացել է նախագծի հիմնադիր, Արցախի նախկին պետնախարար Ռուբեն Վարդանյանի որդին՝ Դավիթ Վարդանյանը, քանի որ հայրն ապօրինի պահվում է Բաքվի բանտում։
«Արդեն երրորդ անգամ նման հեղինակավոր մրցանակի արժանանալը վկայում է այն մասին, որ Հայաստանում ունենք աշխարհի մասշտաբով եզակի զբոսաշրջային ենթակառուցվածք, որը մի կողմից նպաստում է մարզի ու նրա զբոսաշրջային ներուժի զագացմանը, մյուս կողմից երկրի հյուրերին ներկայացնում է այն հոգևոր ու մշակութային հսկայական ժառանգությունը, որն ունի հայ ժողովուրդը:
Երկրորդ տարին է, որ հայրս հնարավորություն չունի անձամբ ստանալ այս մրցանակն ու շարունակել իր բարեգործական ու մարդասիրական ծրագրերը, քանի որ շինծու մեղադրանքով ապօրինի պահվում է Բաքվի բանտում: Հպարտ եմ, որ նրա ծրագրերն աշխարհով մեկ ճանաչելի են դարձնում Հայաստանը: Վստահ եմ, որ նա դեռ շատ նոր նախագծեր կիրականացնի»,- ասել է Դավիթ Վարդանյանը:
Նախագիծն առաջին անգամ այս անվանակարգում հաղթել էր 2021 թվականին, իսկ երկրորդ անգամ՝ 2023 թվականին։
Ճոպանուղու նախագիծն իրականացվում է Վարդանյանի և նրա կնոջ՝ Վերոնիկա Զոնաբենդի նախաձեռնած «Տաթևի վերածնունդ» ծրագրի շրջանակներում։
Նորություններին հետևեք մեր կայքում, ինչպես նաև Telegram-ում և YouTube-ում