“Өләсәй, доғаларыңды уҡы, алышҡа инәбеҙ”

Тормош көтөүҙәре еңел түгел. Яҙмыш шатлыҡтарын да, көтмәгәндә ҡайғы-хәсрәттәрен дә өйөп бирә. Кемдер һына, икенселәр ҡабат тороп баҫырға көс таба. ”Һәр кем күрәсәген күрә. Аллаһ Тәғәлә һынауҙарынан ҡасып булмай”, – ти Бишбүләк районының Йылбулаҡтамаҡ ауылында йәшәгән Миңзилә апай Камалетдинова. Уның сабырлығына, түҙемлегенә һәйкәл ҡуйырлыҡ. Яҙмыш иң ҡаты һынауҙарын ебәргәндә лә ихтыяр көсөн юғалтмай. Етем ҡалған дүрт ейән-ейәнсәрен ҡарап үҫтергән көслө ҡатын ул. Махсус хәрби операция башланғас, Рәмзәл ейәне үҙ теләге менән хәрби хеҙмәткә юллана. Ҡайтҡас, өйләнәм, туй буласаҡ, тип ҙур пландар ҡороп киткән егеттең өмөтөн һуғыш өҙә – 23 йәшендә генә яуҙа һәләк була. Ләкин яҡындарының хәтеренән ул бер ваҡытта ла сыҡмай. Бала саҡтан ысын патриот булып үҫә егет. Ҡаяға үрмәләү менән мауыға, ярыштарҙа юғары һөҙөмтәләргә өлгәшә, Өфөлә көрәш буйынса еңеү яулай. Волейбол, хоккей, футбол кеүек спорт төрҙәрендә лә алдынғылыҡты бирмәй. Ҡурҡыу белмәне, тиҙәр уның тураһында яҡындары. “Һыуҙа батып барған кешене ҡотҡарған өсөн” миҙалы ла уның ҡыйыулығының билдәһе ул. – Патриот ине. Ҡайҙа йөрөһә лә, беренсе булырға тырышты. Ауылда хоккей майҙансығы булдырам тип өйҙән таҡталарҙы алып китеп эшләп ҡуйҙы. Боҙ яһап, йәштәрҙе спортҡа йәлеп итергә тырышты. Ғөмүмән, ололарға ла, кеселәргә лә кешелекле булды. Улың сумкамды илтешеп ҡуйҙы, тип ололарҙан да рәхмәт һүҙҙәре ишетә инем, – Миңзилә апай ғәзиз ейәне тураһында һөйләгәндә тулҡынланыуынан күңеле тула. Сәхнәгә сыҡһа оҫта итеп бейегән, Яңы йыл байрамдарында Ҡыш бабай булып ауылдаштарының күңелен күргән Рәмзәл яҡташтарының хәтерендә мәңгелеккә кешелекле, ысын ир-егет булып ҡалыр. Йәш кенә булһа ла, үҙенән йәшерәктәргә лә матур өлгө күрһәтә белә. Иҫерткес эсемлектәр эсеү, тәмәке тартыу кеүек насар ғәҙәттәрҙе үҙ итмәй. Ваҡыты еткәс, ил алдындағы бурысын үтәргә армияға юллана. Уны ла намыҫ менән үтәй. 9 Май байрамында Мәскәүҙә парадта үтә. Ҡулынан килмәгән эше булмай. Әле Миңзилә Нурый ҡыҙы йәшәгән ҙур, күркәм кирбес йортто төҙөгәндә лә йүгереп йөрөп эшләй. Иретеп йәбештереүсе, водитель һәм башҡа һөнәрҙәргә эйә була. – Шул тиклем ярҙамсыл ине. Төндә дуҫтары ярҙамға саҡырһа, һис “юҡ” тимәне, йүгереп сығып китә торғайны, – Миңзилә апайҙың күңеленән улы тураһында йылы хәтирәләре бер туҡтамай түгелә. Ейәненә үлгәндән һуң бирелгән Ҡаһарманлыҡ ордены өйҙөң түрендә ҡәҙерле иҫтәлек булып һаҡлана. Ғәзизенең үлемен бик ауыр ҡабул итә Миңзилә апай. Бер-бер артлы ауыр операциялар үткәреп, саҡ аяҡҡа баҫа. – Юлда ейәнемдең дуҫтары осраһа, мине машиналарына ултыртып өйгә тиклем килтереп ҡуя. Әллә ҡайҙан танып, ихтирам итеп торалар. Улым кешелекле, алсаҡ булғанға, әле лә дуҫтары аша изгелек күрәм. Ғөмүмән, иғтибарһыҙ ҡалдырғандары юҡ. Ауыл хакимиәтенән Светлана Йәғәфәроваға бигерәк тә рәхмәт. Нимә кәрәк булһа, шуны йүгертеп килтерә. Ирекмәндәр менән бергәләп йортомдо йыйыштырып, йыуып китәләр. Ҡышын мәктәп уҡыусылары ҡарымды көрәй. Игелекле балаларға рәхмәттән башҡа бер һүҙем дә юҡ. Ауыл хакимиәте башлығы Рәсиф Ниғмәтйәнов та хәлемде белешеп тора. Яңыраҡ һыу торбаһында авария булды. Шунда уҡ тейешле кешеләрен табып, проблеманы хәл итеп тә ҡуйҙы. Шулай уҡ район етәкселегенә рәхмәтем ҙур. Яҡындарым, туғандарым береһе лә иғтибарҙан өҙгәне юҡ, – тип үҙенә ярҙам улы һуҙғандарға рәхмәттәрен әйтергә ашыҡты. 75 йәшлек сабыр һәм оло йөрәкле апайҙың үҙе тураһында ла әллә күпме яҙырға мөмкин булыр ине. Бала саҡтан ауырлыҡтан ҡурҡып тормай. Атаһы иртә үлгәс, өлкән балаға эштең дә ауыры төшә. Үҫмер сағынан һыйырын да һауа, сөгөлдөрөн дә утай. Һуңынан да лайыҡлы, абруйы хеҙмәт юлын үтә. Ул хеҙмәт ветераны, өс тапҡыр “Коммунистик хеҙмәт ударнигы” була, “РСФСР-ҙың почетлы доноры” ла. Байтаҡ ваҡыт ситтә йәшәргә тура килһә лә, тыуған ере иң ғәзизе. 2014 йылда тыуған ауылына ҡайтып, олоғайған көнөндә йәнтөйәгендә ғүмер итә. Миңзилә апайға сәләмәтлек, сабырлыҡ теләйбеҙ. Ауыр ҡайғыларҙан ҡанһыраған йөрәгегеҙ яраһы туҡтауһыҙ әренегәндә лә тормошҡа, кешеләргә һөйөү менән баға белгән көслө ҡатын һеҙ. Автор фотоһы.