Сустрэча з паэзіяй – гэта заўсёды свята. А калі паэт, аўтар выдатных радкоў пра вядомых табе людзей, пра твой горад, пра малую радзіму, знаходзіцца побач, сам чытае свае творы – гэта сапраўдная падзея.
28 лістапада ў Капыльскай раённай цэнтральнай бібліятэцы імя А. Астрэйкі адбылася прэзентацыя зборніка вершаў самадзейных капыльскіх паэтаў"Родныя пагоркі" – удзельнікаў літаратурнага аб’яднання "Вясёлка".
Капыльскі літаратурны альманах №2 "Родныя прагоркі" выйшаў у выдавецтве "Пружмень" пры падтрымцы газеты "Наша слова" і яе рэдактара, публіцыста, паэта і перакладчыка Станіслава Судніка, які быў ганаровым госцем на гэтым мерапрыемстве.
У прывітальным слове Станіслаў Вацлававіч нагадаў пра выпуск першага нумара літаратурнага альманаха, пазнаёміў з асноўнымі старонкамі другога выпуску і перадаў у дар бібліятэцы зборнікі паэзіі самадзейных паэтаў з нясвіжчыны, лідчыны, наваградчыны і дзятлаўшчыны.
На прэзентацыю сабраліся актывісты раённай ветэранскай арганізацыі на чале з яе старшыней Людмілай Камёнка і самі аўтары твораў, змешчаных у зборніку. Прысутныя змаглі пазнаёміцца з творчасцю удзельнікаў літаб’яднананя "Вясёлка".
Увайшлі ў зборнік і паэтычныя творы Леанарда Падгорскага-Аколава, навэла Міхаліны Даманскай "Званы" у перакладзе С. Судніка, якая, дарэчы, нідзе яшчэ не публікавалася, і артыкул Сяргея Чыгрына, прысвечаны доктару філалагічных навук, прафесару, краязнаўцу і літаратуразнаўцу Алесю Бельскаму "Пакуль баліць яго душа літаратурай".
У час прэзентацыі гучалі новыя вершы Аляксея Траццяка, Любові Мотуз, Ядвігі Малевіч і Марыны Коршак, песні ў выкананні самадзейнага паэта Мікалая Майсюка. Да ўдзелу ў мерапрыемстве далучылі і новыя аўтары – Зоя Тароцька і Ніна Краўчанка. Яны расказалі пра сябе, чыталі перад слухачамі свае творы.
З цікавасцю слухалі прысутныя і аповед нашага знакамітага земляка, прафесара, кандыдата тэхнічных навук, пісьменніка, аўтара аўтабіяграфічнай аповесці "Испытатель" Міхаіла Клішэвіча.
У размове пра творчасць, наладжанай гасцямі і работнікамі бібліятэкі, мог прыняць удзел кожны прысутны. Зразумела, чыталі вершы, задавалі пытанні. Былі спрэчкі, заўвагі, меркаванні.
Падчас мерапрыемства мы яшчэ раз ўпэўніліся ў тым, што з паэзіяй у сэрцы крочаць па жыцці людзі цікавыя, з фантазіяй, з марай, летуценнікі. І не важна, у якім ты ўзросце. Важна, што ў сэрцы жыве паэзія і табе хочацца тварыць.
Для больш дакладнага знаёмства з літаратурным альманахам № 2 "Родныя пагоркі", запрашаем вас у Капыльскую раённую цэнтральную бібліятэку імя А. Астрэйкі. А калі вы пішаце вершы, ці прозу, то можаце далучыцца да літаратурнага аб’яднання "Вясёлка", якое працуе пры бібліятэцы.
Ірына Пятровіч, загадчыца аддзела абслугоўвання і інфармацыі раённай цэнтральнай бібліятэкі імя А. Астрэйкі
"Родныя пагоркі" от самодеятельных копыльских поэтов
