ЛЮБОВЬ ЛОДЫГИНА. Кӧч сьӧлӧм. Висьт. Ӧти аньлӧн вӧлі рочӧнкӧ "мечта": петны пенсия вылӧ да овмӧдчины медся ылі да медся ичӧт грездын.

Кӧч сьӧлӧм.

Висьт.

Ӧти аньлӧн вӧлі рочӧн кӧ "мечта": петны пенсия вылӧ да овмӧдчыны медся ылі да медся ичӧт грездын. Быд лун сійӧ водігас тайӧ мӧвпнас шонтысис. Гожӧмнас рай. Абу некутшӧм машина шы. Пукалан ю дорын да вуграсян. Лэбалӧ вертолёт кодь юрсигусь. Турун пиын кылӧны сӧмын чирк да малямуш. Шоныд, онялӧ, а ю дорад лӧсьыд: коктӧ чургӧдан воӧдз. Шыльыд лыа вывті муна кӧмтӧг, став ревматизмӧс бурдӧда. Пӧсь лыа шонтӧ да кыскӧ став висьӧмӧс. Водзӧ видзьяс вывті шлывган, оз дуксьыс коддзан. Регыд кисьмасны чӧд да чӧдлач, мырпом. Тӧвнас усяс пух кодь еджыд лым, быттьӧ выльвося пызан дӧра. Керка дорӧ весиг кӧчильяс воасны. Найӧс чӧсмӧдла морковӧн да серкниӧн. Збыльвылас эськӧ кӧчыд йирӧ бадь да пипу кырсь. Но, ӧти лунӧ Иван Паладьлӧн мечтаыс сылі быттьӧ вый. Звӧнитіс воча чойыс: ёна и варгисны-сернитісны да казьтыліснв. Паладья казьтыліс, мый Марья вежань пырысьӧн нин выльысь петӧма верӧс сайӧ. Челядьыс лэбыштӧмаӧсь бать-мам позйысь, а сійӧ кольӧма тӧвйӧны ӧтнас. Пемыд кадӧ ӧшинь улӧ заводитӧмаӧсь воліны кӧинъяс. Адӧй, адӧй! Мыйнӧ тайӧ, шуис воча чойыс. Кор ми волім сы дорӧ гӧститны грездӧ воліс ош. Ми ӧшиньсянь видзӧдім, кыдзі ошкыд зэв нин кужӧмӧн разис-шыблаліс гидлысь керъяс, перйис баляӧс, чачаӧс моз кватитіс да уйис ю вомӧн. Сӧмын мышкуыс и тыдавліс. Ставӧн быттьӧ кынмим. Ӧньӧ дед сӧмын вермис шуны: "Ай, берданкаӧй гӧбӧчин". Та бӧрын Паладьлӧн коли став окотаыс овны ичӧт да ылі грездын.

Любовь Лодыгина

02.12.2024 во