Каманда яравой сяўбе "на старт" больш чым тыдзень таму ў раёне дадзена без усялякіх замінак.
Сёлетняя вясна запомніцца земляробам не толькі раннімі тэрмінамі яе прыходу, але і сваёй непрадказальнасцю. Чакаць стабілізацыі надвор’я тым не менш асабліва не даводзіцца. Таму аграрыі вырашылі сеяць, бо глеба падсыхае даволі хутка.
– Нават не верыцца, што дачакаліся чарговай пасяўной, па гэтай прыемнай кругаверці спрадвечных вясновых сялянскіх клопатаў за доўгую зіму засумавалі, – гаворыць галоўны аграном сельгасфіліяла "Руднае" Сяргей Кожан. – Вясна прыйшла ў поле: глеба ў нас асаблівая – там, дзе яшчэ ўчора было суха – сёння пасля дожджыкаў ужо і гразкавата. Некалькі апошніх дзён з’яўлялася сонейка, якое прагравала зямлю. Таму трэба лавіць момант.
Сяргей Аляксандравіч расказаў, што рупліўцы "Руднага" ў ліку першых у раёне прыступілі да клопатаў пра ўраджай. Тут, па меры магчымасці, пачалі ўносіць арганіку, падкормліваюць азімыя і шматгадовыя травы, рыхтуюць глебу.
На сяўбе яравых задзейнічаны адзін агрэгат. На гэтым відзе работ заняты Віталь Паграбіцкі – бясспрэчны прафесіянал сваёй справы. Ён распачаў сезон з 20 га аўса, цяпер сее ячмень. На чарзе – кукуруза і цукровыя буракі.
Віталь Казіміравіч заўсёды ў перадавіках: ці то гэта пасяўная, ці то кормаўборачная, ці то жніво. Сёлетняя сяўба яравых – не выключэнне. На рахунку стараннага механізатара толькі за першыя дні звыш 150 засеяных гектараў. У гаспадарцы працуе каля 30 гадоў. За добрасумленныя адносіны да даручанай справы яго імя заносілася на Дошку гонару, атрымліваў розныя ўзнагароды.
Віталь Казіміравіч гаворыць, што прафесіяналу дастаткова ўбачыць поле, каб зразумець, якія настройкі патрэбныя для сяўбы той ці іншай культуры.
Механізатары "Руднага" тонкасці прафесіі часта перадаюць у спадчыну – ад бацькі да сына. Бацька нашага суразмоўцы таксама ўсё жыццё працаваў на гэтых палях і лічыўся адным з найлепшых механізатараў гаспадаркі, дзе вось ужо тры дзесяцігоддзі працуе і яго сын. А наогул, працоўныя дынастыі ў сельгасфіліяле – справа звычайная, як і сямейны падрад, калі ў гаспадарцы, хай і ў розных сферах, працуюць усе члены сям’і. У іх ліку можна назваць Буйкевічаў, Цвілевічаў і інш. І гэта – падмурак адказных адносін да работы, якая пры такім раскладзе становіцца найважнейшай часткай жыцця.
Як адзначаюць спецыялісты, у сучасных сельскагаспадарчых агрэгатах, што задзейнічаны на сяўбе, цэлы шэраг працэсаў аўтаматызаваны і рэгулюецца камп’ютарам. Але, як бы ні развіваліся тэхналогіі, у пасяўную асноўным крытэрыем поспеху становіцца чалавечы фактар – вопыт, добрасумленнасць і талент работнікаў. Таму вопытныя механізатары – сапраўдны "залаты фонд".
– Правільна засеянае поле – гэта скрупулёзна вытрыманая норма высеву на гектар, патрэбная глыбіня закрывання насення, а таксама якасць: каб ніводнае зярнятка не ляжала зверху, не накрытае глебай. У тэорыі ўсё гэта можна рэгуляваць настройкамі сучаснай тэхнікі. Але на практыцы вельмі многае ў да-дзенай сферы па-ранейшаму робіцца толькі з дапамогай асабістага вопыту і інтуіцыі прафесіянала. Зямля на кожным полі розная. Можна выставіць адну глыбіню закрывання на больш лёгкіх і цяжкіх глебах – і атрымаць розны вынік, – тлумачыць значнасць вопыту Сяргей Кожан. – У нас на сяўбе заўсёды працуюць толькі самыя вопытныя механізатары. І Віталь Паграбіцкі – адзін з іх.
Пагаварылі з галоўным аграномам і пра асаблівасці сёлетняй пасяўной. Спецыяліст адзначыў, што акрамя незвычайных пагодных умоў – бясснежнай зімы і, як следства, нізкай вільготнасці глебы – больш адрозненняў у сёлетняй кампаніі няма: тэхніка падрыхтавана належным чынам, людзі маюць настрой на добрасумленную працу, а ў перыяд сяўбы працоўны час доўжыцца ўвесь светлавы дзень. Наконт ранніх тэрмінаў сёлетняй сяўбы Сяргей Кожан адзначыў, што глеба ўжо выспела, гатовая прымаць насенне. Таму няма часу чакаць агратэхнічныя тэрміны, трэба сеяць.
У залежнасці ад пагодных умоў у гаспадарцы вядзецца комплекс веснавых палявых работ. Механізатары ўносяць арганічныя ўгнаенні, узворваюць глебу, ужо поўнасцю закрылі вільгаць. Шмат увагі надаецца падкормцы азімых збожжавых і азімага рапсу цвёрдымі і вадкімі мінеральнымі ўгнаеннямі.
СХФ "Рудное": хозяева весенних полей
