Өфөгә туған телен яратҡан сит ил студенттары йыйылды

Вуз-ара студенттар кампусы майҙансығында сит ил студенттары араһында Халыҡ-ара телдәр фестивале үтте. Ул Башҡортостан, Санкт-Петербург, Ижевск, Пермь, Түбәнге Новгород һәм Һамар университеттарынан 200-гә яҡын йәш кешене йыйҙы. Уларҙың барыһы ла Рәсәйгә сит илдәрҙән, шул иҫәптән Һиндостан, Нигерия, Мысыр, Иран, Тажикстан, Үзбәкстан, Намибия, Марокко, Алжир, Афғанстан, Берләшкән Ғәрәп Әмирлектәренән юғары белем алырға килгән. Телдәр фестивале - Башҡортостан дәүләт медицина университетында йыл һайын үткәрелгән сара. Уны рус теле уҡытыусылары ойоштора һәм фестиваль төрлө телдәрҙе һәм мәҙәниәттәрҙе өйрәнергә яратыусыларҙы йыя. – Йыл һайын БДМУ бөтә донъянан буласаҡ табиптар өсөн халыҡ-ара студенттар майҙансығына әүерелә. Хәҙерге ваҡытта беҙ донъяның 60 иленән биш меңгә яҡын сит ил студентын уҡытабыҙ. Был Башҡортостан педагогтарының уҡытыу кимәлен һәм лабораторияларыбыҙҙы һәм клиникаларыбыҙҙы йыһазландырыуҙың донъя стандарттарына тап килеүен раҫлай. Беҙҙең өсөн студенттарҙың мәҙәни-ара аралашыуы, уларҙың рус телен белеүе мөһим, – тип билдәләне Башҡортостан дәүләт медицина университеты ректоры, Рәсәй Фәндәр академияһы академигы, профессор Валентин Павлов. Фестиваль программаһына оҫталыҡ дәрестәре, ижади номерҙар һәм конкурстар инә. Мәҫәлән, «Ғилми тикшеренеүҙәр донъяһында медицина лингвистикаһы һәм мәҙәниәте» конкурсына 39 доклад тәҡдим ителгән. Ҡатнашыусылар фестивалде башҡа телдәр тураһында күберәк белергә илһамландырыусы сара тип атай. - Фестиваль минең өсөн сағыу сит телдәр байрамы булды. Бөтә ҡатнашыусылар бер-береһенә шундай матур мөнәсәбәт күрһәтте. Юғары уҡыу йортона сит телдәрҙе үҫтергәне һәм яҡлағаны өсөн ҙур рәхмәт. Фестивалдә еңеү мине бик рухландырҙы, - тине Камерундан килгән Башҡортостан дәүләт медицина университеты студенты Талла Лабелль Ингрид. Сығанаҡ: pravitelstvorb.ru