Ойуунускай Владимир Елисеевич 1947 сыл алтынньы 2 күнүгэр Үөһээ Бүлүү оройуонун Ороһу нэһилиэгэр төрөөбүтэ.
1962 сылтан колхозтаах буолбут.
1965-1966 сылларга Ленинскай оройуонун Маардааҕы СПТУ-3 училищеҕа тракторист-комбайнер идэтин ылан төрөөбүт Ороһутугар Бараахап аатынан колхозка тракториһынан үлэтин саҕалаабыт.
1968 сыллаахха саҥа тэриллибит И.С. Барахап совхоз центрыгар Карл Мааркыска тимир ууһугар С.П. Тумусовка балтаһытынан үлэлээбит. Үлэлиир кэмигэр ыччат киэһээҥҥи оскуолатыгар үөрэммит.
1971 сылга ситэтэ суох орто үөрэхтэммит.
1972 сылтан Намҥа Исидор Бараахап совхозка кэлэн механизаторынан үлэлээн сайынын от оттоһунугар, кыһынын совхоз үрдүнэн общественнай сүөһүгэ эбии аһылык бэлэмнээһиҥҥэ үлэлээбит. Оттооһуҥҥа саҥаны киллэриигэ от кэбиһэр агрегат оҥорбут. Эбии аһылыкка дробилкалары тупсаран оҥорбут. Ити үлэлэригэр «Отличник изобретательства и рационализации ВОиР» диэн знагынан бэлиэтэммит.
1982-1986 сылларга от оттоһуҥҥа пятилетка былаанын аһары толорон «Ударник XI пятилетки СССР» диэн знак ылбыта. Ол кэннэ сылын аайы 1000 тонна оту оттообута.
1982 сылтан КПСС чилиэнэ. КПСС Саха уобаластааҕы комитетын 34-35 уобаластааҕы партийнай конференцияҕа делегатынан ыҥырыллан ОБКОМ чилиэнинэн иккистээн талыллыбыт.
1986-1988 сылларга ССКП райкомун бюротун чилиэнинэн сылдьыбыт. Сельскай совет народнай депутатынынан 4 төгүл талыллыбыт. Үөһээ Бүлүү оройуонун сэбиэтигэр народнай депутатынан талыллан сылдьыбыт.
1981 сыллаахха СССР Верховнай советын Президиумун ыйааҕынан «За трудовое отличие» мэтээлинэн наҕараадалаабыттар.
1982 сыл Саха АССР Верховнай Советын Президиумун ыйааҕынан Бочуотунай грамота ылбыт.
1983 сыл Саха АССР Верховнай Советын ыйааҕынан «Саха АССР норуотун хаһаайыстыбатын үтүөлээх үлэһитэ» диэн бочуоттаах ааты иҥэрбиттэрэ.
2001 сылга «Ороһу нэһилиэгин Бочуоттаах олохтооҕо» буолбута.
2002 сылга «Үөһээ Бүлүү улууһун Бочуоттаах олохтооҕо» диэн ааты сүктэрбиттэрэ.
От кэбиһэр агрегат, комбайн уонна да атын техника араас тимирдэринэн таҥыллан оҥоһуллубут. Агрегаты кытта кэккэлэһэ 150 киилэ истээх емкость баар эбит. Көлөһөлөөх буолан, олус чэпчэки уонна тимиринэн оҥоһуллан бөҕө – таҕа күрүөлэрдээх трактор сыарҕаларын агрегат начаас толортуур эбит. Биир сайын орто үүнүүлээх сирдэргэ агрегатынан 2,5 т оттору ортотунан 27-лии мүнүүтэ кэбиспиттэр. Икки трактор олбу – солбу сылдьар буолан кэбиһии тохтоло суох ыытыллар эбит. Агрегат атыттартан үчүгэйэ - оту сыарҕаҕа дэхситик тарҕатан кэбиһэр. Маннык оту ардах хоппот, от иһиттэн буһан тахсыбат. Орто үүнүүлээх сиргэ куҥҥэ 40-50 т оту кэбиһиэххэ сөп эбит. Боковой кыраабылынан от мустарар, субуутун батыһа МТЗ-52 тракторынан от кэбиһэр агрегатын состорор. МТЗ-82 уонна ДТ-75 трактордарын сыарҕатын агрегакка тоһуйаллар эбит. Үөһэттэн үүнүүлээх от сыарҕа устатын тухары дэхситик тэлгэнэр. От туоллаҕына күрүөҕэ илдьэллэр. Онно тиийэн от кэннинээзи тимир күручүөктэри төлүтэ тардары кытта аҥара сиргэ соһуллан кэлбит от, олорон хаалар эбит. Агрегат элбэх киһи ыарахан үлэтин солбуйбут.
Үрдүк хаачыстыбалаах оту оттуурга агротехническэй кэми тутуһуохха наада. От сиппитин кэннэ 15 күнүнэн иҥэмтэлээх эттиктэрин 20 % сүтэрэр, 20 күнүнэн 25-30 %. Өр турбут от белога 50 % кыччыыр. Хойуутаабыт от кытаатар, ол эбэтэр клеткатыгар лигнин үөскүүр, клетчатката намтыыр, маннык отунан сүөһү үчүгэйдик аһаабат уонна аһы буһарарыгар куртаҕа ыарырҕатар. Агрегатынан от үлэтэ түргэнник барар буолан от саамай сиппит, битэмииннэммит кэмин аһарбакка элбэх оту оттууллар эбит.
Ардаҕа суох, күннээх күҥҥэ от түргэнник куурар. Хомуллар от сиигэ 20% элбэҕэ суох буолуохтаах, 17 % кыччыа суохтаах. От сиигэ 20 % элбэх буоллаҕына от сытыйыан сөп, 17 % аҕыйах буоллаҕына иҥэмтэлээх эттиктэрин сүтэрэр уонна тостумтуо буолар. Охсуллубут от 2-3 күн куурар, үүнүүтүттэн уонна күн туругуттан тутулуктаах. Кэбиһии үлэтэ тургэнник барар буолан от аһары куурбат этэ.
2007 сылга Оҕо творческай киинигэр үлэлээбитэ. Онно оҕолорго араас тыа хаһаайыстыбатыгар туттуллуон сөптөөх техникалары, агрегаттары толкуйдатан оҥорторон международнай выставкаҕа лауреат буолбуттара. Москваҕа, Санкт-Петербурга бастааннар «Национальное достояние» диэн знак отличиянан бэлиэтэммитэ.
Күндүтүк саныыр биир дойдулаахпытын 75 сааскын туолбуккунан итиитик-истиҥник эҕэрдэлиибит! Эн сыралаах үлэҥ кэнэҕэски көлүөнэ ыччакка үтүө холобур буолар. Баҕарабыт эйиэхэ кытаанах доруобуйаны, уйгу-быйаҥ олоҕу!