Վարչապետ Նիկոլ Փաշինյանի նախօրեին արված հայտարարությունները մտահոգություն են առաջացրել Արցախում։ Արցախի ԱԺ խմբակցությունների ղեկավարները նախագահ Արայիկ Հարությունյանին առաջարկել են ԱԽ նիստ հրավիրել։ Այս մասին Armenia Today-ի հետ զրուցում հայտնեց Արցախի ԱԺ «Արդարություն» խմբակցության պատգամավոր Մետաքսե Հակոբյանը։
Հարցին, թե հատկապես ինչ մտահոգություններ են առկա, Արցախի ԱԺ պատգամավորը նշեց. «Մտահոգությունները մեղմ է ասված։ Այդ անձը, որը 2019-ին Արցախի մայրաքաղաքի Վերածննդի հրապարակում «կոկորդը պատռում էր», որ «Արցախը Հայաստան է և վերջ», երեկ վերջնականապես հաստատեց, որ Արցախը հանձնողներից է», – նշեց պատգամավորը։
Հիշեցնենք, որ երեկ վարչապետ Նիկոլ Փաշինյանը հարցազրույց էր տվել «Հանրային» հ/ը-ին, որում ընդգծել էր, որ Հայաստանի և Ադրբեջանի միջև խաղաղության պայմանագիրը և միմյանց տարածքային ամբողջականության ճանաչումը պետք է առանձնացնել Արցախյան հիմնախնդրից։
«Մենք կարծում ենք նաև, որ, Հայաստանը և Ադրբեջանը կարող են փոխադարձաբար ճանաչել և պիտի ճանաչեն միմյանց տարածքային ամբողջականությունը, իսկ Ղարաբաղյան հարցի քննարկման հիմնական շահառուն պետք է լինի ԼՂ ժողովուրդը՝ իր ընտրված ներկայացուցիչների միջոցով։ Մեր կարծիքն ի սկզբանե՝ 2018-ից եղել է այն, որ ԼՂ-ն պետք է լինի Ղարաբաղի հարցով հիմնական բանակցողը և շահառուն, և մենք շարունակում ենք այդպես մտածել»,- հայտարարել էր նա։
Լրացուցիչ տեղեկությունների համար այցելեք կայք