З 19 па 23 верасня ў Рэспубліцы Беларусь праходзіў Тыдзень роднай мовы «Як ты дорага мне, мая родная мова!» Вучні і настаўнікі нашай установы з задавальненнем прынялі ў ім удзел. Галоўная мэта – размаўляць як мага больш на роднай мове, захоўваць традыцыі сваёй краіны і быць годным беларусам.
Якая прыгожая, мілагучная, мяккая і ў той жа час яскравая, звонкая, моцная наша мова! На кожны выпадак знойдзецца ў ёй і трапнае слова. «І ўсё мілагучна для слыху майго: І звонкае «дзе», і густое «чаго»... (Пімен Панчанка).
Падрыхтоўка да правядзення Тыдня роднай мовы пачалася загадзя. Таму 16 верасня ў VIII-XI класах адбыўся рэспубліканскі дыктант, прымеркаваны да Дня народнага адзінства.
У рамках Тыдня роднай мовы «Як ты дорага мне, мая родная мова!» стартавала школьная акцыя «Смак роднай мовы», дзе мы ўспаміналі спрадвечна беларускія словы, вучыліся імі правільна карыстацца, адзначалі лексічнае багацце роднай мовы і мілагучнасць.
Вучні нашай школы Марыя Свешнікава (XI «А» клас) і Яўгенія Аўдзеева (VIII «А» клас) прынялі ўдзел у рэспубліканскай адкрытай дыстанцыйнай паэтычнай акцыі «Мая родная мова, ганаруся табой!» З гонарам можам адзначыць, што відэаролікі вучаніц з запісамі выразнага чытання на памяць вершаў беларускіх паэтаў размешчаны на сайце Нацыянальнага інстытута адукацыі (adu.by.).
Смак роднай мовы не павінен забывацца на наступны дзень. Калі ты нарадзіўся беларусам, калі ты жывеш на гэтай зямлі, нельга не шанаваць родную мову. І пра гэта ў нас добра ведаюць вучні. Таму ярка і запамінальна прайшлі і конкурс «Зямля бацькоў – мая зямля» ў V класах, і віктарына «Шчаслівы выпадак» сярод IX-XI класаў, і турнір знаўцаў «Таямніцы роднай мовы» VII класах, і «Моўны турнір» у VIII класах.
Прыемная нечаканасць – арт-праект «Слова нас аб’ядноўвае» – забяспечыла цудоўны настрой у VI «А» класе. Вучні пасмакавалі гучанне беларускіх слоў праз гексы. Кожная група вучняў прадстаўляла сваю тэматычную групу слоў, а аб’яднанне груп у адно цэлае дало магчымасць уявіць, што словы жывуць не самі па сабе, а з’яўляюцца часткай багатай лексікі нашай мовы. Прэзентацыя віншавальных паштовак у канцы мерапрыемства «Пажаданні роднай мове» ў поўнай меры гэта пацвердзіла. Працягам стала класная гадзіна ў гэтым жа класе «Беларусь – мая краіна».
Веды, цікавасць і добры настрой забяспечылі поспех праведзеных мерапрыемстваў. У канцы Тыдня роднай мовы вучні нашай школы прыйшлі да высновы: «Мы – юныя грамадзяне нашай краіны! Наш абавязак – добра вучыцца, каб мы змаглі ў будучым зрабіць нашу краіну яшчэ больш прыгожай і багатай. Беларусь – гэта краіна нашай будучыні».
Самыя актыўныя ўдзельнікі і пераможцы конкурсаў былі адзначаны і ўзнагароджаны дыпломамі. Тыдзень прайшоў на высокай эмацыянальнай ноце. Усе мерапрыемствы Тыдня роднай мовы, без сумнення, выклікалі высокі душэўны пад’ём і задавальненне.
Святлана Пашкоўская, настаўнік беларускай мовы і літаратуры ДУА «Сярэдняя школа №2 г. Круглае».