Հայաստանում գտնվող #Քրդստանի աշխատավորական կուսակցության (ՔԱԿ) երկու անդամներ հանձնվել են #Թուրքիայի Ազգային հետախուզական կազմակերպությանը (#MIT): Այս մասին իր Facebook-յան էջում հայտնել է ԱԺ «Հայաստան» խմբակցության պատգամավոր Գեղամ Մանուկյանը:
Խոսքը Աթիլլա Չիչեքի և Հուսեյին Յըլդրըմի մասին է, որոնք, Մանուկյանի խոսքով, երկու քուրդ ազատամարտիկներ են, հեղափոխականներ, որ պայքարել են սեփական ժողովրդի ազատագրության համար, պայքարել թուրքական բռնատիրության դեմ, ակտիվ գործունեություն են ծավալել նաև Դերսիմում։ Գեղամ Մանուկյանի խոսքով՝ Հայաստանի վարչապետ Նիկոլ Փաշինյանը, որը հոկտեմբերի 6-ին Պրահայում կարող է հանդիպել Թուրքիայի նախագահ Ռեջեփ Թայիփ Էրդողանի հետ, այսպիսով նվեր է արել թուրքերին: Նշենք, որ ըստ դատական տեղեկատվության համակարգում՝ datalex.am հրապարակված տեղեկատվության, նրանց մեղադրանք է առաջադրվել 2021թ. օգոստոսի 16-ին Արաքս գետով ՀՀ սահմանն ապօրինի հատելու և զենքի ու զինամթերքի մաքսանենգության համար: Սյունիքի մարզի առաջին ատյանի դատարանը 2022թ. հունվարին Հուսեյն Յըլդըրըմին և Աթիլ Չիչեքին դատապարտել է 7 տարվա ազատազրկման, եղել է նաև դրամական միջոցները բռնագանձելու որոշում:
Ավելի ուշ Վերաքննիչ դատարանը կրճատել է ՔԱԿ երկու անդամների ազատազրկման ժամկետները՝ պայմանական ազատազրկում՝ 3 տարի փորձաշրջանով: Թուրքական «Անադոլու» գործակալությունը սեպտեմբերի 23-ին հայտնել է, որ Թուրքիայի Ազգային հետախուզական կազմակերպությունը (MIT) Ինտերպոլի գծով միջազգային հետախուզման մեջ գտնվող ՔԱԿ երկու զինյալների ձերբակալման գործողություն է իրականացրել։ Նշվում է, որ Չիչեկին 7 Յըլդըրըմին մեղադրանքներ են առաջադրվել «պետության ամբողջականությունը և միասնականությունը քայքայելու փորձի համար»: Daily Sabah-ի տեղեկություններով՝ նրանք ձերբակալվել են թուրքական հատուկ ծառայությունների կողմից «սահմանին հակաահաբեկչական գործողության» ընթացքում և Թուրքիա են բերվել ուրբաթ օրը:
Լրացուցիչ տեղեկությունների համար այցելեք կայք