Ադրբեջանի նախագահ Իլհամ Ալիևը հայտարարել է, որ շուտով սպասվում է Ադրբեջանի և Հայաստանի արտգործնախարարների երկրորդ հանդիպումը, ադրբեջանական կողմն առաջարկում է, որ երկու երկրների աշխատանքային խմբերը հանդիպեն և մի քանի օրվա ընթացքում և պատրաստեն խաղաղ համաձայնագրի տեքստը: «Ինչպես հայտնի է, Ադրբեջանի և Հայաստանի արտգործնախարարներն առաջին հանդիպումն են անցկացրել, և մենք կարծում ենք, որ այդ գործընթացը չպետք է ընդհատվի», – ասել է Ալիևը Պրահայում ադրբեջանական հեռուստաալիքներին տված հարցազրույցում:
«Շուտով նախարարները պետք է հանդիպեն երկրորդ անգամ, և մենք առաջարկում ենք, որ դրանից հետո երկու երկրների աշխատանքային խմբերը հանդիպեն և մի քանի օրվա ընթացքում զբաղվեն խաղաղ պայմանագրի տեքստի պատրաստմամբ։ Այսինքն՝ մեր մտադրություններն այդպիսին են», – ընդգծել է նա։ Նա նաև հայտնել է, որ Ֆրանսիայի նախագահ Էմանուել Մակրոնի, Եվրախորհրդի ղեկավար Շառլ Միշելի և Հայաստանի վարչապետ Նիկոլ Փաշինյանի մասնակցությամբ քառակողմ հանդիպումը դրական ազդակ է հաղորդել Բաքվի և Երևանի միջև խաղաղ գործընթացին:
«Այդ հանդիպման ժամանակ քննարկվել են կարևոր հարցեր, և ես կարծում եմ, որ այդ հանդիպումը ևս կարևոր կլինի խաղաղ համաձայնության հասնելու համար։ Կոնտակտները դեռ շարունակվում են։ Մենք պայմանավորվել ենք կրկին հանդիպել ընթրիքից հետո։ Ամեն դեպքում, արդեն խթան է տրվել խաղաղ գործընթացին», – ասել է Ալիևը։
Պրահայում այսօր տեղի է ունեցել Հայաստանի վարչապետ Նիկոլ Փաշինյանի, Ադրբեջանի, Ֆրանսիայի նախագահներ Իլհամ Ալիևի և Էմմանուել Մակրոնի ու Եվրոպական խորհրդի ղեկավար Շառլ Միշելի հանդիպումը։ Սա Փաշինյանի և Ալիևի առաջին հանդիպումն է շաբաթներ առաջ Հայաստանի վրա իրականացված ադրբեջանական ագրեսիայից հետո, որի հետևանքով Ադրբեջանը օկուպացրել է Հայաստանի որոշ տարածքներ։ Նշենք, որ Փաշինյան-Ալիև-Միշել եռակողմ ձևաչափով վերջին հանդիպումը կայացել է օգոստոսի 30-ին։
Լրացուցիչ տեղեկությունների համար այցելեք կայք