Маҥнайгы хаар үллүктүү түһэр биир үтүө күнүгэр почтаттан "Эһиэхэ посылка кэлбит", - диэн үөрүүлээх сонуну истээт, тута ыларга соруннум. Бэркэ диэн кыһамньылаахтык сууламмыт холбуйаны арыйан көрбүтүм, бу аҕыйах хонуктааҕыта билсибит коллегам, Ньурба улууһун Дьиикимдэ нэһилиэгин библиотекаря Светлана Никандровна Павлова кинигэ кэһии ыыппыт. Онтон мин кинини кытары хайдах билсибиппин сырдата түһүүм.
Саха биллиилээх поэта, прозаига Василий Федотович Гольдеров - Ороһу Уола быйыл төрөөбүтэ 90 сылын бэлиэтээтибит. Онон сиэттэрэн республика оскуолаларыгар, культура тэрилтэлэригэр араас хабааннаах тэрээһиннэр ыытылыннылар. Биир үтүө күн киин библиотекаттан сонун кэллэ: "Ньурба куоратыгар Василий Гольдеровка аналлаах библиографическай ыйынньык сүрэхтэниитэ буолар", - диэн. Ыҥырыыны түргэн үлүгэрдик ылынаат айаҥҥа туруннум.
Ыҥырыыга ыйыллыбыт миэстэҕэ, ыйыллыбыт кэмигэр тута тиийдим. Култуура департаменын дьиэтин таһыгар дьон тоҕуоруһа мустубут. Көрбүтүм, саха бастакы поэтессатыгар, Варвара Потаповаҕа аналлаах памятник арыллыыта буолан эрэр эбит. Киирии тылын культура департаменын салайааччыта, Саргылаана Васильевна Гольдерова, ыҥырыллыбыт ыалдьыттар эттилэр. Ньурбатааҕы драматическай театр артыыстара, киһи дууһатын кылын таарыйар хоһоон ааҕан иһитиннэрдилэр. Ону тэҥэ, түмэл-дьиэҕэ кинигэтин сүрэхтэниитэ буолла диэтилэр.
*Потапова Варвара Николаевна — Саха бастакы поэтессата.
Ньурба улууһун Сүлэ нэһилиэгэр ыам ыйын 13 күнүгэр 1946 сыллаахха төрөөбүтэ.
1966 сыллаахха Ньурба маҥнайгы нүөмэрдээх оскуолатын бүтэрээт, СГУ саха тылын уонна литературатын салаатыгар киирбитэ. Ити сылларга "Сэргэлээх уоттара" литературнай куруһуокка дьарыктаммыта.
1967 сыллаахтан республика хаһыаттарыгар, "Хотугу сулус" сурунаалга бэчээттэнэн барбыта.
1972 сыллаахха "Күннээх халлаан" диэн маҥнайгы кинигэтэ тахсыбыта.
1979 сыллаахха хомолтолоохтук өлбүтэ.
Кини туһунан кинигэни «Мин сырдык санньыарым…» диэн ааттаан саха артыыската Зоя Багынанова таһаарбыта. Ньурба куорат Убайааныгар бэйээт дьиэ-түмэлэ баар.
*матырыйаал бу сигэттэн ылылынна: https://sah.wikipedia.org/wiki/%D0%9F%D0%BE%D1%82%D0%B0%D0%BF%D0%BE%D0%B2%D0%B0_%D0%92%D0%B0%D1%80%D0%B2%D0%B0%D1%80%D0%B0
Салгыы култуура департаменын дьиэтин биир эркинигэр библиографическай ыйынньык сүрэхтэниитэ буолла. Дьэ, ол онно Светлана Никандровнаны кытары сирэй көрсөн, ирэ-хоро кэпсэтэн билистим. Василий Гольдеров дьиҥэ, Ньурба улууһун кытары туох да ситимэ суох эрээри, бу тоҕо манна ыйынньык таҕыста диэн ыйытыкпар, Светлана Никандровна бу маннык хоруйдаата: "Дьиикимдэ нэһилиэгэр поэт аллар атаһа, очеркист-суруйааччы Степан Федотов олорбута", - диэтэ. "Степан Федотов Гольдеровтыын бииргэ Болугурга үлэлии баран булсан доҕордуу буолбут дьон. Кинилэр икки эдэр ыал Болугурга "биир дьиэҕэ быыһа тойо суох оһох нөҥүө-маҥаа дьуккаах олорбут кэмнээхтэр эбит. Василий Гольдеровка Степана "өлөр доҕорум" диэн ааттыыр киһитэ буолар. Гольдеров кэргэнэ Фаина Ушницкая-Гольдерова Уус Алдантан төрүттээх. Ушницкая колхозка агрономныы сырыттаҕына Гольдеров куораттан командировкаҕа кэлэ сылдьан көрсөн-билсэн, сөбүлэһэн кэргэн ылан Аммаҕа көһөн тахсар. Онтон Федотовтар, саҥа орто үөрэҕи бүтэрэн, тыа хаһаайыстыбатын эдэр специалистара колхозка ананан кэлэллэр.
Степан Федотов (1935-1983) 48 сааһыгар өлөр. Кыра эрдэҕиттэн тыҥатынан ыарыһах. Эрдэ тулаайах хаалан быраатынаан детдомҥа иитиллэр улааппыт дьоннор. Федотов тыыннааҕар биэс кинигэтэ тахсыбыта. Онтон өлбүтүн кэннэ Гольдеров доҕорун 4 кинигэтин хомуйан таһаартарбыта. 1985 сыллаахха Степан Федотов төрөөбүтэ 50 сылын бэлиэтээбиппит. Онно Василий Гольдеров кэлбитэ. Онтон бэттэх доҕорун бэлиэ даталарыгар көтүппэккэ кэлэр этэ. Бүтэһигин 2010 сыллаахха кэлэн барбыта. Уонна ол сырыытыгар сааһыран айаны тулуйбаппын, онон уонна кэлбэтим буолуо диэн барбыта. Уонна 4 сыл буолан баран, 2014 сыллаахха өлбүтэ.
Онон ити үчүгэй бэриниилээх доҕор диэн махтанан, биһиги биир дойдулаахпыт айымньыларын сыа-сым курдук тутан сааһылаан бэчээттэтэн үйэтиппитигэр махтанан оҥордум ыйынньыгы".
Светлана Никандровна иллэҥ кэмигэр библиографическай ыйынньыктары ылсан туран оҥоробун диэн сэһэргиир. Василий Гольдеровка ыйынньык кини бэһис үлэтэ буолар. Ыйынньык матырыйаалын хомуйар үлэ олус уустук, чахчы дьаныардаах эрэ киһи кыайар үлэтэ. Светалана Никандровна уоппускатын кэмигэр, хас эмит сыл, Национальнай библиотекаҕа лигиир олорон үлэлээбитим диир.
Сүрэхтэниигэ "Ньурба уоттара" литературнай түмсүү чилиэннэрэ, культура департаменын үлэһиттэрэ, коллегаларбыт тыа библиотекарьдара кэлэн алгыстаах тылларын анаан бардылар.
Салгыы Ньурба куоратын киин библиотеката тэрийбит, Ньурба улууһа сайдарыгар үгүс кылаатын киллэрбит поэт, публицист, очеркист Сергей Степанович Васильев - Борогонскай 115 сааһыгар аналлаах быыстапка арыллыытыгар ыалдьыттаатыбыт.
Светалана Никандровнаны кытары салгыы билсиэх, уопут атастаһыах, ыалдьыттаһыах буолан үөрэн-көтөн тарҕастыбыт.
Онтон ый кэриҥэ буолан баран, субу маннык соһуччу, эриэккэс бэлэхтэри туттубут:
Күндү ааҕааччыларбыт! Бу кинигэлэр бары биһиги библиотекабытыгар бааллар, ким интэриэһиргээбит кэлэн уларсан ааҕыҥ, көрүҥ, тускутугар туһаныҥ!
P.S. Бүлүү Эбэ өрүһү паромунан туораан иһэн эмискэччи Варвара Потапова кынаттаах тылларын санаан:
"Үчүгэйиэн бу Сиргэ
Үөрэ-көтө сылдьар,
Үгүс дьоннуун сэргэ
Олох дьолун сырсар!" , - күһүҥҥү сөрүүн күҥҥэ сүрэхпэр күн тыкпытын кэриэтэ сылааһынан сылаанньытта.
Уйбаан Ороһуунускай аатынан Ороһутааҕы модельнай библиотека сэбиэдиссэйэ Жанна Иванова.