VAZIR MASLAHATCHISI TOSHPTIGA TASHRIF BUYURDI
Kuni kecha O'zbekiston Respublikasi Oliy va o'rta maxsus ta'lim vazirining maslahatchisi professor Jamoliddinova Odina Rasulovna va professor Baxronova Dilrabo Keldiyorovnalar Toshkent pediatriya tibbiyot institutining Talabalar turar joylariga tashrif buyurdilar.
Tashrif doirasida mehmonlar talabalar bilan suhbatlashib, talabalar uchun yaratilgan shart-sharoitlar hamda ularning erishgan yutuqlari bilan tanishdilar.
Suhbat davomida Talabalar turar joylariga joylashgan institut talabalari yaratilgan sharoitlardan mamnun ekanliklarini bildirdilar. Shuningdek, qavat sardori, to‘garak rahbari sifatida institutning faol talabalari ham joylashtirilgan bo‘lib, o‘z vazifalariga mas’uliyat bilan kirishib ketganlar.
Talabalar turar joylariga tashkil etilgan ingliz tili to‘garagi mashg‘ulotlarini olib borayotgan Erkinjonova Navro‘za tengdoshlarining ingliz tilini o‘rganishga qunt bilan kirishganliklari to'g'risida aytib berdi. U davlat granti asosida tahsil oladi. Til bilish darajasi bo‘yicha xalqaro sertifikatga ega bo‘lganligi bois, stipendiyasiga institut tomonidan 100 foiz qo‘shimcha belgilanganligi va har oyda to‘garak mashg‘ulotlarini olib borganligi uchun o‘rtacha 600 ming so‘m daromad topishini mamuniyat bilan aytib berar ekan, mutaxassisligiga oid yangi kitoblarni sotib olishi, kiyim-kechak, oziq-ovqatga bemalol yetishi bilan birga nemis tilini o‘rganish uchun o‘quv kursiga borishiga ham imkon bo‘layotganligini ta’kidladi.
Shuningdek, vazir maslahatchisi Berdaq hayoti va ijodini o‘rganishga qiziqib, to‘plangan materiallari asosida respublika va xorijiy nashrlarda ilmiy maqolalari chop etilgan hamda institut tomonidan ta’sis etilgan Berdaq nomidagi stipendiyasiga sazovor bo‘lgan 3-bosqich talabasi Shukurullo Yo‘lchiyev bilan ma’naviyat xonasida uchrashdi.
“Davlatimiz rahbarining qizlarni oliy ta’lim olishi uchun alohida e’tibor qaratishlari va berilayotgan imtiyozlar mening hayotimni tubdan o‘zgartirib yubordi”, - dedi mehmonlar bilan suhbatda bo'lgan 4-kurs talabasi G‘ofurova Muattar. O‘qishga ikkita qo‘ltiqtayoq bilan kelgan talaba bugun o‘zi bemalol yura olishi, institut unga nafaqat bilim bermoqda, balki uning murakkab jarrohlik operatsiyalarini o‘tkazishi, o‘ziga bo‘lgan ishonchining oshishi va buyuk maqsadlar qo‘yishida g‘amxo‘rlik qilishini aytib o'tdi.
Talaba-yoshlar institut tomonidan talabalarni rag‘batlantirish mexanizmi ishlab chiqilganligini, iqtidorini namoyish etgan talabalar doimiy ravishda taqdirlab borilayotganligi, bu esa boshqalarni ham o‘z ustida ishlashga undayotganligini ta’kidladilar.
