Радашковічы зараз ціхі і невялікі гарадскі пасёлак у Маладзечанскім раёне, які, безумоўна, вядомы нам па біяграфіі знакамітага беларускага пісьменніка Янкі Купалы. Але Радашковічы маюць багатую хаця і пазабытую гісторыю. Так першыя звесткі пра Радашковічы датуюцца 1447 года, а з 1549 года яны атрымалі статус горада бо былі дастаткова буйным месцам і налічывалі 130 двароў, 8 корчмаў і розныя майстэрні і таксама свой драўляны замак для абароны.
Неўзабаве, усяго праз 20 гадоў, пасля таго як Радашковічы атрымалі статус горада, у 1569 годзе Вялікі Князь Літоўскі і Кароль Польскі Жыгімонт Аўгуст надаў гораду прывілей на Магдэбургскае права і Раашковічы сталі сапраўды самастойным і еўрапейскім горадам. А 23 лютага 1792 Кароль Рэчы Паспалітай Станіслаў Аўгуст Панятоўскі сваім прывілеям надаў гораду і ўласны герб "У срэбным полі барочнага шчыта паясная выява Святога Стэфана, закіданага камянямі"
Мабыць Вам цікава, чаму для герба горада быў абраны Святы Стэфан? Гэта было зроблена не выпадкова,а таму, што ў 15 стагоддзі ў 1447 годзе смаленскі стараста і кашталян віленскі Пётр Сенька Гедыгольдавіч і яго жонка Багуміла заклалі падмурак будучага Касцёла. Гэты Касцёл быў зроблены з дрэва і асвечаны пад тытулам Найсвяцейшай Тройцы і Святога Стэфана пакутніка. Так Святы Стэфан стаў ахоўнікам Радашковіцкай парафіі і праз стагоддзі быў абраны сімвалам горада.
Род Гедыгольдавічаў і далей падтрымліваў святыню ў Радашковічах. У 1485 годзе яны павялічылі фундуш Касцёлу, што было зацверджана прывілеем Вялікага Князя Аляксандра Ягелончыка ў 1503 годзе.
Ішлі гады, змяналіся ўладары Радашковічаў: Вярэйскія, Гаштольды, Глябовічы і іншыя, а драўляны Касцёл увесь гэты час стаў на сваім месцы і яго дзверы былі адчыненныя для вернікаў. Таксама пры Касцёле працавала парафіяльная школа і бібліятэка.
Але час нікога не шкадуе і таму ў 1734 годзе, падчас службы ў храме ксяндза Сымона Міхоўскага, адбылася перабудова храма. Новы будынак быў пабудаваны на тым жа месцы, што і стары. Ён таксама быў зроблены з дрэва і меў тытул Найсвяцейшай Тройцы і Святога Стэфана пакутніка. Гэта быў сапраўды вялікі храм, які меў даўжыню каля 80 метраў, у неба глядзелі 6 вежаў і было 7 алтароў, галоўны з якіх быў шасцікалоны са статуямі Святых Пятра, Паўла, Яна і Тадэвуша.
Нажаль у 1853 годзе ў будынак храма трапіла маланка з якой здарыўся моцны пажар і святыня цалкам згарэла. А ў 1855 годзе пачалося будаўніцтва новага мураваннага Касцёла. Будаўніцтва вялося пад руплівым наглядам ксяндза Пятра Жылінскага, на сродкі мясцовай парафіі і ахвяраванні памешчыкаў Валадкавічаў. У 1859 годзе храм быў пабудаваны, а ў наступным годзе, 3 верасня 1860 года святыню кансэкравалі пад гістарычным тытулам Найсвяцейшай Тройцы.
Ну і як я пісаў раней 12 ліпеня 1882 годзе ў гэтым Касцёле быў ахрышчаны маленькі Ян Луцэвіч, які калі вырасце стане сусветнавядомым беларускім пісьменнікам Янкай Купала.
Трэба сказаць, што храм дзейнічаў да 1946 года, калі ён быў зачынены савецкімі ўладамі. Таксама быў арыштаваны ксёндз Стэфан Шыманскі. Вернікам Радашковічаў прыходзілася праводзіць імшу быз ксяндза. Рабілі яны гэта на квартэры жыхаркі горада Сайкоўскай куды прыходзіла да 50 чалавек. Таксама былі звароты ў Маскву, каб вярнулі святыню, але яны таксама поспеху не мелі, бо была адпіска, што будынак знаходзіцца ў аварыйным стане. Магчыма гэта было так, бо пасля таго як храм зачынілі, яго прыстасавалі пад цэх суседняга завода "Беларуская кераміка" і з працягам часу ён сапраўды дайшоў да аварыйнага стану.
30 лістапажа 1955 з турмы вярнуўся Стэфан Шыманскі, але ўлады не далі яму права далей быць пробашчам у Радашковічах і Касцёл зноў стаяў пусты. На гэты раз першы паверх быў адданы пад сховішча завода "Белмастацкераміка", а на другім рабілі свечкі.
І толькі ў 1990 годзе быў вернуты каталікам пры дапамозе ксяндза Эдмунда Даўгіловіча-Навіцкага. Пачалася рэканструкцыя храма якая доўжылася амаль 13 гадоў. Паўторнае асвечанне святыні адбылося ў 2003 годзе.
Дзякуй Вам, што даглядзелі і дачыталі гэты допіс. Калі Вам падабаўся допіс, калі ласка, падпісывайцеся на мой канал, будзе яшчэ шмат чаго цікавага і таксама не забывайцеся паставіць лайк да гэтага допіса.