Самырык-влаклан «Кеҥеж сылнымутчо» литератур семинар тений 4-6 августышто Шернур район Поланур ялыште «Веранда» каныме пӧртыштӧ эртаралтын. Тудо ынде кумшо гана тӱрлӧ аланыште тыршыше уста еҥ-влакым чумыра.
Усталык мастаргудо поэт, прозаик, журналист, сӱретче, артист, этнопсихолог, туныктышо-влакым ик верыш ушен. Сылнымутым йӧратыше-влак деке мыят кумылын ушнышым.
Кок кеҥежым шарналтен...
Ушештарена, икымше гана семинар Оршанке районыштоКӧрдӧ ял воктенысе «Большая медведица» каныме базыште лийын. Тудын лектышыже – «Самырык ме улына» сборник. Тушко сылнымутышто икымше ошкылым ыштыше-влакын почеламут ден ойлымашышт пуреныт.
Кокымшо семинар 2021 ийыште Йошкар-Ола администрацийыш пурышо Якимсолаште, «Кумыс.ру» турист комплексыште, эртаралтын. Тушто тӱрлӧ аланыште тыршыше уста еҥ-влаклан вич премийым кучыктеныт. Лауреат лӱмым кинорежиссёр, артист, прозаик, этномузыколог, марий семӱзгарым ыштыше талантан еҥ-влак нумалыт. Мутат уке, самырык-влакын пашаштым эскерымаш да аклымаш ончыкылыкыштлан ӱшанле эҥертышым ыштат.
«Кеҥенж сылнымутчо – 2022» мо дене шарналт кодеш?
Семинарым «ВийАр» тÿвыра да келшымаш кыл мер ушем эртарен. Тудын председательже журналист да мер пашаеҥ Алена Иванова проектлан вуйын шоген. Сылнымут семинарын авторжо да самырык возышо-влаклан полыш кидым пуышо – поэтессе Зоя Дудина.
Шонкалымашлан жапым ойыро
Кумшо семинарын курымсерышыже (летописьше) Тоштер Шернур посёлкышто верланыше А.Конаков лӱмеш тоштер комплекс гыч тӱҥалеш. Семинарыш толшо-влаклан экскурсийым Лариса Еменгулова марла эртарен.
Этнопсихолог Нина Айварова Ханты-Мансийск гыч толын. «Уста еҥын чонжо могай?» темылан лекцийым лудын. Мутланымаш моткоч шонаш таратыше лийын.
«Кырланур – луй модмо вер» экскурсий маршрут нерген видеопрезентацийым Зоя Дудина ямдылен. Семинарын пытартыш кечынже тиде палыме корно дене Йыван Кырлан шочмо ялышкыже миен толынна.
Тулото воктене погынен, семинарист-влаклан поэтессе Татьяна Япаева шке видеопроектше да оҥай шонымашыж дене палдарен.
Кокымшо кече – вашлиймаш кече
Ты кечын паша куткышуэ гай шолын. Прозаик Валерий Бердинский, поэт-влак Анатолий Мокеев, Зинаида Ермакова, Россий Писатель ушемын Марий Элысе пӧлкажын председательжеСветлана Архипова дене вашлийме.
Семинарыш чот толнет гын, нимогай чаракым шотыш от нал. Уке гын, интернет йӧным кучылт.Кусарыше, культуролог да литературовед Ирина Садовина – сылнымут семинарын ӱшанле йолташыже. Кызыт тудо Английыште ила. Ирина дене телемост йӧн дене мутланышна.
Мӧҥгыштӧ тоштерым шке вий дене чумыраш — манашвеле. Акрет годсо марий тӱрым тӱрлызӧ Лидия Веткина шке тӱр кугыжанышыж дене палдарыш. «Кызыт у пашалан пижынам», – Лидия Васильевна палдарыш.
Паша кече мончаш пурымаш, шашлыкым кочмаш да шудо чайым йӱмаш дене мучашлалте.
Вес тыгай Шернурым ом пале…
Зоя Дудинан тыгай почеламут корныж дене сылнымут семинарын кумшо кечыжым кошартена. Эр кочкышым ыштен, семинарист-влак «Веранда» каныме пӧртын ужар кудывечышкыже чумыргышна. Алена Иванова ден Зоя Дудина, кум кечаш пашанам иктешлен, ончыкылыклан сай тыланымашым каласен, участник-влаклан сертификатым да шарнымаш пӧлекым кучыктышт.
Семинарыш толшо-влакын ийготыштым шотыш огыт нал. Тений эн изи семинаристлан 6 ий гына лийын. Тиде сылнымут аланыште палыме самырык автор Светлана Антонован Даша ӱдыржӧ. Сертификатым кучен шогышо изи Дашан кумылжым мут дене каласен пуаш огеш лий…
Жапым шуйкалыде кеҥеж сылнымутчо-влак Йыван Кырлан шочмо Купсола ялышкыже кудална. «Кырланур — луй модмо вер» маршрутым Зоя Михайловна вуйлатен. Экскурсий деч вара мемнам марий кочкыш дене темше поян ӱстел вучен. Сергей Михайлович ден Лидия Гавриловна Глушковмыт шке суртыштышт мемнам порын вашлийыч. Мондалтдыме кече, ушеш кодшо кеҥеж семинар!
«Кеҥеж сылнымутчо» кеҥеж пасушто эрыкан пеледалт кушшо пеледыш гыч кугу аршашым кучыкта: икте-весе кокласе келшымашым, пеҥгыде да тӱрлӧ шӧрынан шинчымашым, вес тӱсан шинчаончалтышым, у шонымашым, ончыкылыклан ӱшаным да чонышто эре чолга да самырык чоным.