Август тӱҥалтышыште Историй да археологий тоштерыште «Пӱрымашыш савырныше шонымаш» у ончер почылтын.
Марий да финн-угор археологийын маэстрожо Валерий Степанович Патрушевын 80 ияш лӱмгечыжлан пӧлеклалтше ончерыш 50 утла уна толын.
Тӱвыра, печать да калык-влакын пашашт шотышто министрын алмаштышыже Игорь Геннадьевич Садовин, «Йошкар-Ола» ола округысо администрацийыште тӱвыра пашам виктарен шогышо Надежда Эриковна Логинова, МарНИИЯЛИ директорын сомылжым жаплан шуктышо Людмила Яковлевна Григорьева, тӱҥ этнолог Тамара Лаврентьевна Молотова, археологийыште шуктымо паша нерген МарНИИЯЛИ-н вӱдышӧ пашаеҥже Александр Владимирович Акилбаев, Т.Евсеев лӱмеш национальный тоштерын директоржо Светлана Владимировна Зверева, тыгак юбилярын коллегыже, тунемшыже да йолташыже-влак пайрем озам саламленыт.
«Кунам айдемын шонымашыже пӱрымашыш савырна — тиде кугу пиал, кажне кечын кыртмен ыштыме паша, цель деке ончыко вик ошкылмаш. Тиде ончер наукын чапшым, шинчымашым, тӱвырам нӧлтымаште да ончыкылык тукымым куштымаште кугу верым налын шога», — Валерий Степановичым саламлыме годым тыгай мут йоҥгалтын.
Ончерышке В.С. Патрушевын илыш корныжым да пашажым ончыктышо документ ден фотосӱрет-влакым, археологий ӱзгарлам луктыныт.
Ончер 31 октябрь марте пашам ышта.