Հայաստանի վարչապետ #Փաշինյանի և Ադրբեջանի նախագահ Իլհամ #Ալիևի հանդիպման շուրջ բանակցություններ կան։ Այս մասին այսօր տեղի ունեցած ասուլիսի ժամանակ հայտարարել է ԱԺ արտաքին հարաբերությունների մշտական հանձնաժողովի նախագահ Էդուարդ Աղաջանյանը՝ շեշտելով, որ ժամկետների մասին տեղեկություններ չի կարող հայտնել։
Նա շեշտեց, որ վերջին շրջանում առհասարակ դիվանագիտական հատվածում հանդիպումները բավականին հաճախ են և տարբեր ձևաչափերով։ Անդրադառնալով Հայաստանի և Թուրքիայի հատուկ բանագնացների վերջին հանդիպմանը՝ նա հիշեցրեց ձեռք բերված երկու պայմանավորվածությունների մասին․ «Այս երկու պայմանավորվածությունների շրջանակում, բնականաբար, որոշակի նախնական աշխատանքներ պետք է իրականացվեն, որպեսզի դրանք իրականություն դառնան։ Պայմանավորվածություններն արդեն գործնական փուլ են անցնում, ինչը դրական է»։
Ավելի վաղ Armenia Today-ը հայտնել էր, որ հհուլիսի 16-ին Թբիլիսիում տեղի է ունեցել Հայաստանի ևԱդրբեջանի արտաքին գործերի նախարարներ Սարատ Միրզոյանի եւ Ջայհուն Բայրամովի հանդիպումը։ Հիշեցնենք, որ հուլիսի 1-ին Հայաստանի և Թուրքիայի միջև հարաբերությունների կարգավորման գործընթացի հատուկ ներկայացուցիչներ Հայաստանի Ազգային ժողովի նախագահի տեղակալ Ռուբեն Ռուբինյանը և դեսպան Սերդար Քըլըչը չորրորդ հանդիպումն էին անցկացրել Վիեննայում։
Կողմերը պայմանավորվել են հնարավոր ամենասեղմ ժամկետներում Հայաստան-Թուրքիա ցամաքային սահմանը հատելու հնավորություն ապահովել, համապատասխանաբար, Հայաստան և Թուրքիա այցելող երրորդ երկրների քաղաքացիների համար, և որոշել են սկսել այդ ուղղությամբ անհրաժեշտ գործընթացները: Պայմանավորվել են նաև հնարավոր ամենասեղմ ժամկետներում մեկնարկել Հայաստան-Թուրքիա ուղիղ օդային բեռնափոխադրումների իրականացումը և որոշել են սկսել այդ ուղղությամբ անհրաժեշտ գործընթացները: Միևնույն ժամանակ, մեկնաբանելով Երևանի ևԱնկարայի միջև հարաբերությունների կարգավորման գործընթացը, Թուրքիայի նախագահ Ռեջեփ Թայիփ Էրդողանը հայտարարել է, որ այս հարաբերությունների հիմքում Թուրքիայի համար կարմիր գիծն Ադրբեջան է, և Թուրքիայի ու Հայաստանի միջև կարգավորման գործընթացը հնարավոր կլինի նշված հարցի կարգավորումից հետո:
Հիշեցնենք նաև, որ ավելի վաղ՝ 2022-ի մայիսին, Բրյուսելում տեղի էր ունեցել Հայաստանի վարչապետի, Ադրբեջանի նախագահի և Եվրոպական խորհրդի նախագահի հանդիպումը: Այն Ալիևի և Փաշինյանի երրորդ դեմ առ դեմ հանդիպումն էր Բրյուսելում։ Նրանք հանդիպումներ են ունեցել նաև 2021 թվականի դեկտեմբերին և այս տարվա ապրիլին։