Йошкар-Олаште Благовещенский башньын арке йымалныже чӱчкыдын пианино шоктымо йӱкым колаш лиеш. Ынде тушто нылымше ий ты семӱзгар эртен кайыше еҥвлакым шке йырже пога.
Пианино пеш шуко калык коштмо верыште, «Башня» культурно-выставочный рӱдерыш пурымаште, верланен. Тудлан яра шогаш огыт пу, инструмент дене чӱчкыдын шоктат. Тыге пашам ыштен, семӱзгарын йӱкым лукташ полшышо ужашлаже ягылгат да шоя йӱкым лукташ тӱҥалыт. Семӱзгарым шотыш кондышо, тӧрлен шогышо еҥ лийшаш. Тыгай айдеме уло!
Вадим Анатольевич Яковлев арняште кок-кум гана пианиным тӧрлаташ коштеш. Тудын дене паша верыштыже, арке йымалне, вашлийна.
– Вадим Анатольевич, пианином тышке шогалташ кӧн шонымашыже лийын?
– 2017 ийыште «Чистый Город» организаций Йошкар-Олалан пӧлекым ыштен. Тиде организаций шӱкшак коклаште тошто пианином муын да сайын эрыктен, ачален, тышке шынден, но тудо пудырген. Кызытсе пианино 2018 ий годсек шога. Тудым «Авито» сайт гыч налыныт да, сӱрет дене сӧрастарен, тошто семӱзгар олмеш шынденыт. Мый ынде икмыняр ий пианинын оҥартышыжлан (звучанийжылан) вуйын шогем.
– Те шкеже кушеч улыда?
– Мый Шернур районышто Пӱнчерйымал (Нижний Малый Сернур) ялыште шочынкушкынам. Кызыт Пурсанурышто (Кузнецовышто) илем.
– Пианиным тӧрледа, те тидлан келшыше шинчымашым
налында?
– Шочмо ялыштем кок классым гына тунемынам, вара кумшо классыш талантан йоча-влаклан школ-интернатыш тунемаш пурышым.
Тушто кандаш классым пытаренам. Куд ий баян дене шокташ тунемынам. Мемнан пеш уста туныктышына, баянист Петухов Владимир Ефремович ыле.
Вара И.С.Палантай лӱмеш музыкальный училищыште Калык семӱзгар пӧлкаште баян дене шокташ тунемынам. Станислав Михайлович Элембаевын тунемшыже улам.
Училище деч вара армийыш кайышым.
Пӧртылмек, Озаҥ консерваторийыште заочный отделенийыште
шуаралтым. Вич ий жапыште (1987-1992) кум туныктышо дене тунемынам. Икымше да кокымшо курслаште Валерий Иванович Бирюков дене, кумшо курсышто – Абузар Анварович Файзуллин дене. Тудо ынде Калык семӱзгар кафедрым вуйлата, профессор. Пытартыш кок курсым Александр
Юрьевич Протасов дене тунемынам. Тудо Йошкар-Оласе музыкальный училищын выпускникше лийын.
– Тендан музык деке корныдам йолтошкалтыш дене кӱзымӧ
дене таҥастараш лиеш: ик тунемме вер весым алмашта.
– Училище деч вара Оршанке районысо Тошто Крешын клубышто художественный вуйлатыше лийынам.
Клуб пелен «Эреҥер» мурышо да куштышо ансамбль ыле. Клубышто ик ий (1987-1988) пашам ыштышым. Тиде жапыштак консерваторийыште 1-ше курсышто тунемынам. Тошто Крешыныштак мотор ӱдыр дене палыме
лийынам, да тудын дене пырля ешым погышна. Тыге Пурсанурышко
илаш куснышна. Тунамак консерваторийыште икымше курсым тунем пытарышым.
– Йошкар-Олашке Пурсанур гыч семӱзгарым тӧрлаташ коштыда. А селаште могай пашам шуктеда?
– Кузнецовысо музыкальный школышто (ДШИ) гитар дене шокташ туныктем, ончыч баян дене классым вӱденам. Ик жапыштак Пурсанур клубышко аккомпаниатор да концертмейстерлан коштынам. 2004 ий
годсек И.С.Палантай лӱмеш музыкальный училищыште (кызыт
колледж) баяным шокташ туныктем. Пытартыш выпускник-влакем Александр Лопкин, Иван Каменщиков, Айна Ерофеева да молат улыт. 2010 ий годсек училищысе оркестрыште концертмейстер-иллюстраторлан
пашам ыштем.
– Тендан ешда музыкальный тугеже?
– Туге. Ӱдырем тӱвыра да сымыктыш колледжыште хореографлан тунем пытарыш, Н.К.Крупская лӱмеш Марий кугыжаныш педагогике нститутышто йоча психологлан тунемын, кызыт йочасадыште пашам ышта.
Эргым президент школинтернатыште куд ий пианино дене шокташ
тунемын, но утларакше тудлан технике да ITтехнологий келшат.
– Кунам пианиным тӧрлатыме пашаш шогалында?
– Йоча-влаклан кӧра тӱҥалынам. Икымше гана мӧҥгышкем пианином конден шогалтенам, а настройщик уке. Мом ышташ?
Пырля тунемме йолташемым полшаш йодым. Тудо кӱлеш литературым мыланем пуэн, кузе инструментым тӧрлаташ да молат.
Институт деч вара тудо семӱзгарым ачалаш тӱҥалаш шонен, но ты
паша умбакыже каен огыл. Тыге тудо икмыняр книгажым мыланем коден.
– Студент пагытда годым семӱзгарым тӧрлаташ але ачалаш кумылда лийын?
– Тыгай кумыл чынак ыле, но тудым вияҥден колтен омыл. Йочавлаклан инструментым налын, шке ачалаш тӱҥалме деч вара умылышым: ты сомыл дене умбаке вияҥме жап шуын. Палымем-влак пашаш лекташ йодаш
тӱҥальыч. Угарман консерваторий пелен настройщикым ямдылыше спецкурсышто тунемын, удостоверений дене пӧртыльым. Мый ты пашам пеш йӧратем.
Тудо мыланем куаным конда.
– Семӱзгарым тӧрлатыше тендан гай еҥвлак республикыште
улыт?
– Улыт, но профессионал-влак шуэн вашлиялтыт. Ик ий И.С.Палантай лӱмеш музыкальный училищыште Николай Павлович Петров дене пашам ышташ логале. Тудо пеш мастар, кугу профессионал! Тиде сомыллан
Николай Павлович 39 ийым ойырен. Тыгак П.И.Чайковский лӱмеш
сымыктыш да Йошкар-Оласе 3-шо №-ан школлаште семӱзгарвлакым тӧрлатыше Николай Иванович Рысь пашам ышта.
– Вадим Анатольевич, мутланаш жапым ойырымыланда тау.
Те суапле пашам ыштен шогеда. Шукыжлан пашада койдымо
гынат, лектышыжлан шуко еҥ – колыштшыжат, шоктышыжат – куана.
#йошкарола #марийэл #valentina #pormari #валентинасемёнова #vallen_tinn