Ангела Твоего Хранителя пристави делу сему, благоуветливе Господи, и еже воспятити вся препятия видимых и невидимых врагов, поспешство же во

Ангела Твоего Хранителя пристави делу сему, благоуветливе Господи, и еже воспятити вся препятия видимых и невидимых врагов, поспешство же во всем ко благополучному совершению делающим сотвори, молим Ти ся, Преблагий Спасе, услыши и помилуй.

В славу Твою вся творити повелеваяй, Господи, рабом Твоим, к Твоей славе дело свое начинающим, благословением Твоим поспешство благополучное с довольством к совершению подаждь, здравие им со благоденствием даруя, молим Ти ся, Вседаровитый Творче, услыши и помилуй.

Еще молимся за всю братию, и за вся христианы.

Возглас: Услыши ны, Боже Спасителю наш, упование всех концев земли, и сущих мори далече, и милостив милостив буди Владыко, о гресех наших и помилуй ны: милостив бо и человеколюбец Бог еси, и Тебе славу возсылаем, Отцу, и Сыну, и Святому Духу, ныне и присно, и во веки веков.

Хор: Аминь.

Молитва в начале всякого доброго дела.

Господи Иисусе Христе, Боже наш, благослови благое намерение рабов Твоих наздателей храмины сея и дело их еже благополучно начати и без всякаго преткновения к славе Твоей совершити: делателем же благопоспеши и дела рук исправи, и в совершение силою Пресвятаго Твоего Духа спешно произвести сотвори, яко Ты еси Творец и Создатель всяческих, и Тебе славу возсылаем, со Безначальным Твоим Отцем, и с Пресвятым, Благим и Животворящим Твоим Духом, ныне и присно, и во веки веков.

Хор: Аминь.

Молитва на основание дома

Боже Вседержителю, сотворивый небеса разумом, и основавый землю на тверди ея, Создателю и Содетелю всяческих, призри на рабы Твоя, изволившия в державе крепости Твоея, воздвигнути храмину сию, и здания ея соорудити: утверди ея на твердом камени, и основай по Твоему Божественному Евангельскому гласу, юже ни ветр, ни вода, ни ино что повредити возможет: благоволи ей спешно в свершение и благий конец привестися, и в ней жити и подвизатися хотящих от всякаго навета сопротивнаго сохрани.

Возглас: Яко Твоя держава, и Твое есть царство, и сила, и слава, Отца, и Сына, и Святаго Духа, ныне и присно, и во веки веков.

Хор: Аминь.

Предстоятель кропит трижды камень в основание храмины, глаголя:

Основывается храмина сия, во Имя Отца, и Сына, и Святаго Духа.

Хор: Аминь.

Свящ. Премудрость: Пресвятая Богородице спаси нас.

Хор: Честнейшую Херувим

Свящ. Слава Тебе, Христе Боже, упование наше, слава Тебе.

Хор: Слава и ныне. Господи помилуй (трижды). Благослови.

Свящ. Христос Истинный Бог наш, молитвами Пречистыя Своея Матери и всех святых помилует и спасет нас яко Благ и Человеколюбец.

Хор: Господи помилуй (трижды).