4.1. О Адамо сыс э Еваса, пэскирэ ромняса; и ёй пхария, тэ бияндя Каинос, тэ пхэндя: мэ кэрдём манушэс, парикирав э Дэвлэскэ!
4.2. Тэнчи ёй бияндя лэскэ пшалэс, Авелёс. О Авелё чяравэлас бакрэн, а Каино кэрэлас буты прэ пхув.
4.3. О времё прогыя, о Каино яндя Дэвлэскэ со бияндя э пхув,
4.4. о Авелё выкэдыя бакрорэн, савэ фэдыр, тэ яндя лэнгиро тхулыпэ. О Дэвэл дыкхья прэ Авелёстэ и прэ дова, со ёв яндя.
4.5. тэ на дыкхья прэ Каиностэ и прэ дова, со ёв яндя. Каиноскиро йило захачия, и ёв кэрдя о муй тэлэ.
4.6. О Дэвэл пучья: состыр ту на сан лошало, и муй тыро тэлэ?
4.7. кон кэрэл лачипэ, на дыкхэл ли одолэскиро муй упрэ? а коли ту на кэрэс лачипэ, пашло пашо удара о грэхо; тэ ёв кхарэл тут кэ пэ, нэ ту яв учедыр лэстэр.
4.8. О Каино ракирэлас пшалэса, Авелёса. Тэ коли ёнэ сыс дрэ фэлда, о Каино чюрдыяпэ тэ умардя пэскирэ пшалэс, Авелёс.
4.9. О Дэвэл пучья: кай сы Авелё, тро пшал? Ёв пхэндя: на джином, разве мэ дыкхав пал мирэ пшалэстэ?
4.10. О Дэвэл пучья: со ту кэрдян? трэ пшалэскиро рат кхарэл ман пхувьятыр,
4.11. тэ кана клининэл тут э пхув, кай откэрдя пэскиро муй тэ лэл о рат трэ пшалэстыр коли тро васт умардя лэс;
4.12. коли ту лэса тэ кэрэс буты прэ пхув, ёй на дэла тукэ зор; ту лэса тэ псирэс сыр чюжо прэ сари пхув.
4.13. О Каино пхэндя Дэвлэскэ: чювэс прэ мандэ дякэ бут со нашты тэ лыджяв;
4.14. ту традэс ман э пхувьятыр, и мэ гарадёвава трэ мостыр, и лава тэ псирав сыр чюжо прэ сари пхув; нэ кон удыкхэла ман, ёв умарэла ман.
4.15. О Дэвэл пхэндя лэскэ: кон умарэла тут, одолэскэ ада рисёла дрэ эфта молы бутыр. О Дэвэл чюдя прэ Каиностэ знако тэ на умарэл лэс никон коли удыкхэла лэс.